Read gen 2Kronikà 5 Bible Online

2Kronikà 5 - gen bible

2Kronikà 5

¹Ekè èdɔ kèwo keŋu lè àxue kè Salomɔ̀n le tù na Tɔhonɔ̀ ŋutiawo ɖo ènuwuwua, e na wo fɔ̀ ènu kèwo ŋuti ètɔa David kɔ̀[7], ekèwo nyi: klòsalò, sìka ku ègà-nuzãzãwo keŋuã, eye be sɔ wo ɖo mawuxɔa be àdɔ̀kùnuwo ɖope

²Ekèa yomè a, Salomɔ̀n yɔ Izràɛl be àmèsĩsĩwo bɔ̀ ku kɔ̀tawo be ŋùkɔ̀nɔ̀tɔwo, ne woa kɔ Tɔhonɔ̀ be Zòɖùɖu-Ɖakà a, so David be èdù Ziɔ̀n mè va.

³Eye, Izràɛlviwo kpata va bɔ̀, lè èfìɔ Salomɔ̀n gbɔ, lè àzãa gbè, àzã[8] kè nyi wètri adrɛ̃gɔ̃ a be àzãa.

⁴Wàlɛbɛ kè Izràɛl be àmèsĩsĩwo keŋu va bɔ̀a, Levìwo kɔkɔ àɖakàa.

⁵Wo kɔkɔ àɖakàa va, bɔ̀ ɖo ègòdodo be gòxɔa ku ènu kɔ̀kɔ̀ɛ kèwo keŋu lè àɖakàa mèawo ŋuti. Hũbonɔwo ku Levìwo ye kɔ wo va.

⁶Èfìɔ Salomɔ̀n ku Izràɛlviwo be àmèha kè kpata va bɔ̀ lè èfìɔa gbɔ, lè Zòɖùɖu-Ɖakà a be ŋùkɔ̀a, wo wù àlɛ̃ ku ènyì sùgbɔ, kaka be wo mu teŋu hlɛ̃ wo ò.

⁷Hũbonɔwo sɔ Tohonɔ̀ be Zòɖùɖu-Ɖakà a yì ɖo ye tèpe, lè èxɔ̀ kè mè ŋuti wo kɔ̀, lè Mawu be àxuea mèa mè, lè kɔ̀kɔ̀ɛpewo be Kɔ̀kɔ̀ɛpea, lè Kèrubimwo be àwà gɔ̃mè.

⁸Kèrubimwo vlũ woabe àwàdawo ɖo àfi kè Zòɖùɖu-Ɖakà a lèa ji, eye àwàdaawo cɔ̃ Zòɖùɖu-Ɖakà a ku yebe àlɔ̀ kèwo wo lena, sɔ kɔna ɛ̀a.

⁹Ekè àlɔ̀ kèawo dìdìa, woabe ènugbɔwo zena, so àɖakà a gbɔ, ne àmè ɖe so xixenu, ɖo èxɔ̀ kɔ̀kɔ̀ɛa mèa; vɔ̀a, wo mu kpɔna wo, ne àmè lè xixenu ò. E gbà lè funua egbè egbè.

¹⁰Ènu ɖekpe mu lè Zòɖùɖu-Ɖakà a mè, tovò na èkpe èvè kè Mosè sɔ na lè Horɛb be ètoa gbɔ, wàlɛbɛ kè Tɔhonɔ̀ ɖùzò ku Izràɛlviwo[9], ekè wo to so Ejiptè yomè a ò.

¹¹Wàlɛbɛ kè hũbonɔwo to so kɔ̀kɔ̀ɛpea, ekè hũbonɔ kèwo lè funuawo keŋu lè woa ɖokoewo ɖìa, vòvòtoto mu gbà ze lè woabe èhasòsòwo mè ò[10].

¹²Levì hàsìnɔ̀wo keŋu sɔ̀gbè: Àsaf, Henàn, Yedutun, woabe èviwo ku woa nɔ̀viwo do àklàla be àwù, eye wo le ègàkokoewo, sãŋùguwo ku èkà-sãŋùguwo, lè èwèzɛ̃pe na vɔsakpea. Hũbonɔ kèwo be hɛ̃hlɛ̃ mè lè èkà ètɔ̃awo (120) le ku èkpɛ̃.

¹³Èkpɛ̃kutɔwo ku èhàjìtɔwo le jìhà ɖodu, sɔ le kafu, eye wo le mlã Tɔhonɔ̀. Wàlɛbɛ kè èkpɛ̃awo, ègàkokoeawo ku èhũawo le ɖìa, wo le kafu Tɔhonɔ̀ ɖodu be: “Mì kafu Tɔhonɔ̀, ɖo yebe àdɔ̀mè nyɔ, eye yebe ànùkua wɔ̀wɔa lè tɛ̀gbɛ̀[11]!” Wàlɛbɛ ŋua, Tɔhonɔ̀ be lili ɖe ɖɔ mawuxɔa.

¹⁴Lili kèa na be hũbonɔwo mu gbà teŋu le yì sɛ̃sɛ̃dɔa ji ò, ɖoa, Tɔhonɔ̀ be gogo ɖɔ mawuxɔa.