Read gen 2Kronikà 6 Bible Online

2Kronikà 6 - gen bible

2Kronikà 6

¹Ekèa yomè a Salomɔ̀n, gblɔ̃ be: “Tɔhonɔ̀ be yèa nɔ̀ lili babla mè.

²Vɔ̀a, nyè yaa, mù tù èfìɔsa ɖo àcɔ, na wò, ekè la nyi nɔ̀pe kòkòɖàbì na wòa.”

³Izràɛlviwo be àmèhaa kpata lè ètènu. Èfìɔa trɔ, eye be tusì na Izràɛlviwo be àmèhaa keŋu.

⁴Èfìɔa gblɔ̃ be: “Mia kafu Tɔhonɔ̀, Izràɛl be Mawu kè ŋutɔ pò nupo na ètɔ nyè David, eye be wɔ̀ ɖo ènu kè be gblɔ̃a ji. E gblɔ̃ be:

⁵“'So gbè kè gbè mù kplɔ̀ dùkɔ̃ nyè, Izràɛl to so Ejiptè-nyigbã jia, nyè mu cã èdù gã ɖekpe, lè Izràɛl be kɔ̀tawo be èdùwo dòmè, ne woa tù àxue kè ŋuti nyikɔ nyè la nɔ̀a ɖo èdùa mè na mù ò, eye nyè mu cã àmè ɖekpe, ne bèa kplɔ̀ Izràɛl, dùkɔ̃ nyèa ò.

⁶Vɔ̀a, mù cã Yèruzàlɛm, ne nyikɔ nyè ne nɔ̀ e ŋuti, eye mù cã David, ne bèa nɔ̀ dùkɔ̃ nyè, Izràɛl nu.”

⁷Eye David, ètɔ nyè ɖo è ɖo ètamè be yèa tù àxue na Tɔhonɔ̀, Izràɛl be Mawu a be nyikɔ.

⁸Vɔ̀a, Tɔhonɔ̀ gblɔ̃ na David, ètɔ nyè be: “'Ekè wò ɖo è be yèa tù àxue na nyikɔ nyè be gogoa, wò wɔ̀ ɛ̀ nyuɛ̃ ɖe.

⁹Gãkea, mu nyi èwò ye la tù àxue kèa ò. Vɔ̀a, àpo àdɔ̀mè-vi jìji ye la tù àxue kèa na nyikɔ nyèa be gogo.”

¹⁰Eye Tɔhonɔ̀ wɔ̀ ɖo àjɔ̀gbè kè be fìãa ji: Mù va lè ètɔ nyè David tèpe, mù bɔ̀bɔ̀ nɔ̀ ànyi ɖo Izràɛl be èfìɔzìkpea ji, eye sìgbè lekè Tɔhonɔ̀ gblɔ̃ ɛ̀a nènea, mù tù àxue kèa na Tɔhonɔ̀, Izràɛl be Mawu a be nyikɔ,

¹¹eye mù sɔ àɖakà kè mè èzò kè Tɔhonɔ̀ ɖù ku Izràɛlviwoa ɖo e mè.”

¹²Salomɔ̀n tɔtè ɖo Tɔhonɔ̀ be vɔsakpea be ŋùkɔ̀, jè ŋùkɔ̀ Izràɛlviwo be àmèhaa keŋu, eye be kɔ àbɔ yì ji, fãkue.

¹³Salomɔ̀n sɔ gàjɛ̃ wɔ̀ kpoku kɔ yì ji ɖe ɖo èxɔ̀a mɔnu be gbàjàa ji be dòdòmè. Kpoku kèa dìdì àbɔglìgo àtɔ̃; e kèkè àbɔglìgo àtɔ̃; eye be kɔ yì ji àbɔglìgo ètɔ̃. Salomɔ̀n lia e ji, eye be jè èklò. E kɔ àlɔ̀ yì ji, lè Izràɛl be dùkɔ̃a keŋu be ŋùkɔ̀,

¹⁴eye be gblɔ̃ be: “Tɔhonɔ̀, Izràɛl be Mawu, mawu bu ɖe mu lè, sɔ̀ ku wò, lè jiŋùkusi, àlo, lè ànyigbã ji, kè la teŋu le zòɖùɖu ku màje ɖo àsi na sumɔ̃vi wò kèwo ye le zɔ̃ lè ŋùkɔ̀ na wò ku èjì bliboa ò.

¹⁵Wò wɔ̀ ɖo àjɔ̀gbè kè wò fìã na sumɔ̃vi wò, David ètɔ nyèa ji. Ènu kè wò gblɔ̃ ku àpo ènua, wò wɔ̀ ɛ̀ ku àpo àlɔ̀, sìgbè lekè mi le kpɔ ɛ̀ egbèa nène.

¹⁶Fifìa, Tɔhonɔ̀, Izràɛl be Mawu, le ènu kè wò gblɔ̃ be yè la wɔ̀ na sumɔ̃vi wò, David èto nyèa, ɖo àsi be: “Jìjimèvi wòwo mu la dɛ̃ lè Izràɛl be èfìɔzìkpea ji, lè ŋùkɔ̀ na mù, ne èvi wòwo gbe jè àyè, lè woabe èdɛ̃ ŋuti, wàlɛbɛ kè wo le wɔ̀ ɖo àpe èse ji kpò, sìgbè lekè wò ŋutɔ, wò zɔ̃ lè ŋùkɔ̀ na mùa nène ò.”

¹⁷Ɛ̃ɛ, fifìa, Tɔhonɔ̀, Izràɛl be Mawu, na ènyà kè wò gblɔ̃ na David sumɔ̃vi wòa ne va e mè!

¹⁸Vɔ̀a ɖe, Mawu la teŋu nɔ̀ àgbètɔwo gbɔ, lè ànyigbã ji nyàwo a? Kpɔɖa! Jiŋùkusiwo ku jiŋùkusiwo be jiŋùkusiwo ŋutɔ cã mu sù na wò ò! Ekɛ va le nyi èxɔ̀ kè mù tùa ò?

¹⁹Tɔhonɔ̀, Mawu nyè, ɖo èto sumɔ̃vi wòa be kuefã ku yebe koko pòpo jro! Ɖo èto àpa kè sumɔ̃vi wòa le do, le na àle, lè àpo ŋùku mèa.

²⁰Ŋùkuvi wòwo ne nɔ̀ hũhũ ɖo àxue kèa ji, èzã ku kedè. Tèpe kèa ye wò gblɔ̃ be wo ne sɔ nyikɔ wò ɖo! Ɖo èto kuefã kè sumɔ̃vi wò le wɔ̀ ɖo tèpe kèa taa.

²¹Ɖo èto àle kè sumɔ̃vi wò ku Izràɛl dùkɔ̃ wòa, le na ɖo tèpe kèa taa. Èwò yaa Tɔhonɔ̀, nɔ ɖo èto, so kaka jiŋùkusi, àfi kè wò nɔ̀nàa, eye ne wò sè a, wòa sɔ èvuɛ̃wo kè mi.

²²Ne àmè ɖe jè àgɔ̀ do nɔ̀via, eye wo biɔ so e si be ne kã àtãŋu, eye be va kã àtãŋu kèa lè àpo vɔsakpea be ŋùkɔ̀, lè àxue kèa mèa,

²³èwò Tɔhonɔ̀ yaa, ɖo èto so kaka jiŋùkusi, ne wòa vlũ àlɔ̀, ne wòa sò kòjo lè sumɔ̃vi wòawo dòmè. Wòa dɔ̃ èto na àmè kè jè àgɔ̀a, ne bèa kpã ŋùkɔ̀ yebe àgɔ̀jèje, ne yebe nuvuɛ̃a ne nɔ̀ èkɔ̀ na ɛ̀, ne wòa sɔ àpo jɔ̀jɔɛwɔ̀wɔ sɔ kplɔ̀ ɛ̀.

²⁴Ne Izràɛl, dùkɔ̃ wòa jè àgɔ̀ do wò, eye kɛ̃tɔ ɖe ɖù e jia, ne e trɔ èjì mè, eye be kafu àpo nyikɔa, ne e fãkue eye be blìbɔ̀ na èwò kè lè àxue kèa mèa,

²⁵èwò Tɔhonɔ̀ yaa, ɖo èto è, so kaka jiŋùkusi, ne wòa sɔ Izràɛl dùkɔ̃ wòa be èvuɛ̃ kè è, ne wòa kplɔ̀ ɛ̀ gbɔ̀ va ànyigbã kè wò na ɛ̀ ku tɔgbeawoa ji.

²⁶Ne dùkɔ̃a wɔ̀ èvuɛ̃ ɖo ŋuti wò, eye wò tu jiŋùkusi, eye èji mu le jà ò a, ne wo trɔ ɖoɖa tèpe kèa, eye wo fãkue, eye wo kafu àpo nyikɔa, ne wo trɔ lè woabe nuvuɛ̃ kèwo ŋuti wò dɔ̃ èto na wo ɖoa yomè a,

²⁷èwò Tɔhonɔ̀ yaa, ɖo èto è, so jiŋùkusi. Sɔ sumɔ̃vi wòwo ku Izràɛl, dùkɔ̃ wòa be èvuɛ̃ kè wo, ne wòa fiɔ wo èmɔ nyuɛ̃ kè ji wo la zɔ̃a, eye na èji ne jà ɖo ànyigbã wòa ji, ànyigbã kè wò sɔ wɔ̀ ècrɔ̃nu, do àsi na dùkɔ̃ wòa.

²⁸Ne àdɔ̀ to lè ànyigbãa ji, àlo èdɔ̀ vuɛ̃, àlo èlùwo jè èdɔ̀, àlo hùesuviwo va cɔ̃ àgblèwo ji, àlo kɛ̃tɔwo va xa èdù gãawo lè dùkɔ̃ wò be ànyigbã jia, gbledo kè la nyi gbledoa, èdɔ̀ kè la nyi èdɔ̀a,

²⁹ènu ɖekpekpe ènu kè be kuefã wo wɔ̀a, ènu ɖekpekpe ènu kè be àle wo la na a, e teŋu so àmè ɖe gbɔ, àlo Izràɛl dùkɔ̃ wòa keŋu gbɔa, ne àmè ɖe sia ɖe jèsi yebe èfũkpekpe ku yebe vevesèse, eye wo vlũ àlɔ̀ ɖoɖa àxue kèa gbɔ lɔ̀gea,

³⁰èwò, Tɔhonɔ̀ yaa, sè è jro, so kaka jiŋùkusi lè àpo nɔ̀pea, wòa sɔ kè, eye wòa ɖo e tèpe na àmè sia àmè, ɖo ye ŋutɔ be àzɔ̃lì nu, ɖoa, wò ŋutɔ wò nya àmè sia àmè be èjì mè. Wò ɖèka tigɔ̃ kpò ye jèsi àgbètɔ be èjì.

³¹Àleke be, dùkɔ̃ wòa ne si wò, ne woa nɔ zɔ̃ lè àpo èmɔ ji, lè woabe àgbè ŋùkèkè kèwo keŋu wo la wɔ̀ lè ànyigbã kè wò sɔ do àsi na mia tɔgbewoa ji.

³²Nène a ke, ne àmèjro kè mu nyi dùkɔ̃ wò, Izràɛl mèvi ŋutɔ cã ò, vɔ̀a, be so èdù dìdì ɖe mè vaa, ɖo àpo nyikɔ gãa ŋutia, ɖo, àpo àlɔ̀ sɛ̃sɛ̃ ku àpo àbɔ kè wò kɔ do èjia ŋutia, ne e va fãkue ɖoɖa àxue kèa gbɔa,

³³èwò Tɔhonɔ̀ yaa, ɖo èto è, so kaka jiŋùkusi, lè àpo nɔ̀pea, eye wòa vlũ àlɔ̀, ne wòa wɔ̀ ènu kèwo keŋu àmèjroa la biɔ wòa, àleke be ànyigbã ji be dùkɔ̃wo keŋu ne jèsi wò, ne woa si wò. Sìgbè lekè dùkɔ̃ wò, Izràɛl sina wòa nène. Wo ne vɔ̃ wò, ne woa nya be nyikɔ wò ye wo yɔ ɖo àxue kè mù tù na wòa ŋuti.

³⁴Ne dùkɔ̃ wòa yì kpe àhùa ku yebe kɛ̃tɔwo, zɔ̃ ɖo èmɔ kè nu wò la ɖo woa jia, ne wo trɔ ɖoɖa gbɔ wò, fãkue, jè ŋùkɔ̀ èdù gã kèa, kè wò cã a, ku èxɔ̀ kè mù tù na àpo nyikɔa be gogoa,

³⁵ɖo èto woabe kuefã ku woabe àlenana jro, so kaka jiŋùkusi, eye wòa na woabe jɔ̀jɔɛwɔ̀wɔ ne ɖùji.

³⁶Ne wo wɔ̀ èvuɛ̃ ɖo ŋuti wò, ɖoa, àmè ɖekpe mu lè kè mu wɔ̀nà èvuɛ̃ ò, eye wò bijì do wo, do wo àsi na kɛ̃tɔwo, eye woabe jiɖùtɔwo kplɔ̀ wo yì gàtɔnugbe, lè èdù dìdi ɖe, àlo èdù sɔ̀ àxue gbɔ ɖe mèa,

³⁷ne, lè èdù kè mè wo le wo yì gàtɔnugbe lèa mèa, wo bù èta mè, trɔ èjì mè, eye wo ɖè kuku na wò, lè woabe gàtɔnugbea, gblɔ̃ be: 'Mi nyi èvuɛ̃ wɔ̀tɔwo, mi wɔ̀ ènu dakà, mi jè àgɔ̀a',

³⁸ne wo trɔ gbɔ̀ va gbɔ wò ku èjì bliboa, kudo èkla blibo, lè woabe ègàtɔnugbe be ànyigbãa ji, àfi kè wo kplɔ̀ wo yìa, ne wo fãkue yɔ wò, lè ànyigbã kè wò sɔ na woa tɔgbewoa ji, ɖoɖa èdù gã kè wò cã a, ku àxue kè mù tù na àpo nyikɔa be gogoa,

³⁹Tɔhonɔ̀ ɖo èto wo, so kaka jiŋùkusi, so kaka tèpe kè wò nɔ̀nàa, ɖo èto woabe kuefã ku woabe àlenana, na ne woabe jɔ̀jɔɛ ne ɖùji eye wòa sɔ kè dùkɔ̃ wò kè wɔ̀ èvuɛ̃ ɖo ŋuti wòa.

⁴⁰Fifìa, Mawu nyè, ŋùkuvi wòwo ne nɔ̀ hũhũ, èto wòwo ne nɔ̀ hũhũ, na kuefã kè wo la wɔ̀ lè tèpe kèa jro!

⁴¹Fifìa, Tɔhonɔ̀ Mawu, so ne wòa va tèpe kè nyi àpo jɛ̃gbɔ̃pea! Èwò ku àpo ŋusɛ̃ be Zòɖùɖu-Ɖakà a! Tɔhonɔ̀ Mawu, hũbonɔ wòwo ne sɔ hlùɛ̃gã do àwù, eye ànùkuamewo ne gli ku jìjɔɛ, lè jɔ̀gbènyuɛ̃ mè!

⁴²Tɔhonɔ̀ Mawu, mù gbà gbe àpo àmè kè wò kɔ̀ àmì ɖo èta na a ò! Ɖoŋù àdɔ̀mènyuɛ̃ kè wò wɔ̀ na David, sumɔ̃vi wòa.”