Read gen 2Kronikà 7 Bible Online

2Kronikà 7 - gen bible

2Kronikà 7

¹Ekè Salomɔ̀n fãkuea vɔ̀a, èzò ɖiɖi so jiŋùkusi, va fiɔ̃ ènu nana a ku vɔsaawo, eye Tɔhonò be gogoa va ɖɔ àxuea[12].

²Ekèa na be hũbonɔwo mu teŋu ɖo Tɔhonɔ̀ be àxuea mè ò, ɖoa, Mawu be gogoa ɖɔ mawuxɔa.

³Izràɛlviwo keŋu kpɔ èzòa ɖì ku Tɔhonɔ̀ be gogo ɖo mawuxɔa ji, eye wo jè èklò, cɔ̃ ŋùmè ànyi ɖo ànyigbã-kpea ji, eye wo jè èɖɛ̀ na Mawu, do àkpe na ɛ̀, “Ɖoa, yebe àdɔ̀mè nyɔ, eye yebe ànùkua lè tɛ̀gbɛ̀.”

⁴Èfìɔa ku dùkɔ̃a keŋu savɔ lè Tɔhonɔ̀ be ŋùkɔ̀.

⁵Èfìɔ Salomɔ̀n sɔ ènyì hotu woeɖèka ku àlɛ̃, kudo ègbɔ hotu èkà takpo savɔ. Nène a ye èfìɔa ku dùkɔ̃a keŋu kɔ̀ Mawu be àxuea ŋutia yeŋu.

⁶Hũbonɔwo lè ètè, lè woabe nɔ̀pewo. Levìwo le èhàjìnu kèwo èfìɔ David na, wo wɔ̀ na woawo ɖo àsi, sɔ le kafu Tɔhonɔ̀, le gblɔ̃ be: “Ɖoa, yebe ànùkua lè tɛ̀gbɛ̀!” Sɔ zɔ̃ ɖo kafu-ha kè David do àsi na woa ji, wo le ku èkpɛ̃, eye Izràɛlviwo keŋu lètè, jè ŋùkɔ̀ wo.

⁷Salomɔ̀n kɔ̀ Tɔhonɔ̀ be àxuea be gbàjà ji kè lè mawuxɔa be ŋùkɔ̀a be dòdò mèa ŋuti. Funua ye be fiɔ̃ ènumème vɔsa ku ŋuti fàfa vɔsa be àmìawo lè, ɖoa, gàjɛ̃ vɔsakpe kè Salomɔ̀n wɔ̀a, mu teŋu xɔ̀ ènumème vɔsaawo, ènu nanaawo ku àmìawo ò.

⁸Gà ŋua mèa, Salomɔ̀n ɖù àzã ŋùkèkè adrɛ̃ ku Izràɛl be dùkɔ̃ bliboa. Àmèha gã ɖe va, so Lebò-Hamat, lè àvego, kaka yì ɖo Ejiptè be ètɔ̀ gãa be èsì wɔ̀adãa nu, lè àpùgo.

⁹Ŋùkèkè ènyigɔ̃a gbè nyi àmèha be gòdo gbè, ɖoa, wo sɔ ŋùkèkè adrɛ̃ kɔ̀ vɔsakpea ŋuti, eye wo sɔ ŋùkèkè adrɛ̃ ɖù àzã.

¹⁰Lè wètri adrɛ̃gɔ̃ a be ŋùkèkè èwì vɔ ètɔ̃gɔ̃a gbèa, èfìɔa ɖo dùkɔ̃a ku jìjɔɛ ɖoɖa woabe àxuewo mè. Woabe èjìwo le sò àyo, ɖo ènyuɛ̃ kè Tɔhonɔ̀ wɔ̀ na David, na Salomɔ̀n ku Izràɛl, yebe dùkɔ̃a ŋuti.

¹¹Kè Salomɔ̀n tù Tɔhonɔ̀ be àxuea ku èfìɔ be àxuea vɔ̀, eye be wɔ̀ ènu kèwo keŋu be ɖo be yèa wɔ̀ ɖo Tɔhonɔ̀ be àxuea ku ye ŋutɔ be àxuea mè vɔ̀a,

¹²Tɔhonɔ̀ ze ɖo e ji, èzã mè, eye be gblɔ̃ na ɛ̀ be: “Mù sè kuefã wòa, eye mù cã tèpe kèa sɔ ɖo vɔsa tèpe.

¹³Ne mù tu jiŋùkusi, be èji mu gbà jà ò, ne mù ɖè ègbè na hùesuviwo be wo ne ɖù ànyigbã be nukuwo, ne mù dɔ̃ èdɔ̀ vuɛ̃ ɖoɖa dùkɔ̃ nyèa,

¹⁴eye, ne dùkɔ̃ nyè kè ŋuti nyikɔ nyè lèa, bɔ̀bɔ̀ ye ɖokoe, ne e fãkue, ji ŋùku nyè mè, eye be trɔ so yebe èmɔ vuɛ̃wo jia, nyè yaa, mù la ɖo èto è, so jiŋùkusi, mù la sɔ yebe èvuɛ̃ kè è, eye mù la dà èdɔ̀ na yebe ànyigbãa.

¹⁵Fifìa, ŋùkuvi nyèwo lè hũhũ, eye èto nyèwo lè kèke na kuefã kè wo la wɔ̀ lè tèpe kèa.

¹⁶Eye fifìa, mù cã, eye mù kɔ̀ àxue kèa ŋuti, àleke be nyikɔ nyè ne nɔ̀ e ji, kaka sɔ yì.

¹⁷Èwò yaa, ne wò zɔ̃ lè ŋùkɔ̀ na mù, sìgbè lekè ètɔ wò David zɔ̃a nène, le wɔ̀ ɖo ɖoɖo kèwo keŋu mù do àsi na wòawo ji, eye wò le èse nyèwo ku èkɔ̀nu nyèwo ɖo àsia,

¹⁸mù la le fìɔzìkpe wòa ɖo ètè, sìgbè lekè mù fìã yebe àjɔ̀gbè na David ètɔ wòa nène be: “Àpo jìjimèvi mu la dɛ̃ lè Izràɛl be fìɔzìkpea ji ò[13].

¹⁹Vɔ̀a, ne mì trã èmɔ, eye mì gble èse ku ɖoɖo nyè kèwo mù sɔ ɖo ŋùkɔ̀ na mìa, ne mì yì sɛ̃ vòdu buwo, eye mì jè èɖɛ̀ na woa,

²⁰eŋuã, mù la hɔ̃ mì jo lè ànyigbã nyè, kè mù sɔ na mìa ji, eye mù la gbe ènu lè àxue kè ŋuti mù sɔ nyikɔ nyè sɔ kɔ̀a ŋuti, mù la ɖìgbɔ ɛ̀, eye be la ɖì kòkoe lè dùkɔ̃wo dòmè,

²¹eye àxue kèa kè ŋuti wo dona bùbu lekea, la dãŋù do àmè ɖekpekpe kè la to e gbɔ va yìa, eye wo la gblɔ̃ be: “Nukɛ ŋuti ye Tɔhonɔ̀ wɔ̀ ènu kèa na èdù kèa ku àxue kèa ɖo ò?”

²²Wo la ɖo e ŋuti be: “Ɖoa wo gble woa tɔgbewo be Mawu kè ɖè wo to so Ejiptè-nyigbã jia ɖɛ, eye wo yì ca ku vòdu buwo, wo jè èɖɛ̀ na wo, eye wo sumɔ vòduawo. Ekèa ŋuti ye Tɔhonɔ̀ na gbledo kèawo keŋu jɔ̀ ɖo woa ji.”