Read gen 2Kronikà 8 Bible Online

2Kronikà 8 - gen bible

2Kronikà 8

¹Lè èpè èwì kèwo mè Salomɔ̀n tù Tɔhonɔ̀ be àxuea ku ye ŋutɔ be àxuea lèa yomè a,

²e gbìgbɔ̀ tù èdù kèwo Hiràm sɔ na ɛ̀awo, eye be na Izràɛlviwo yì nɔ̀ woa mè.

³Ekèa yomè a, Salomɔ̀n zɔ̃ ɖo Hamat-Sova be èdùa ji, eye be ɖo àsi e ji[14].

⁴E sò Tadmɔ̀r be èdùa lè zògbè a ji, ku àgbãpòtɛpe be èdù kèwo keŋu be sò lè Hamàt be àgo jia.

⁵E sò Bɛt Horɔ̀n be èto ji be èdùa ku Bɛt Horɔ̀n be èto gɔ̃mè be èdùawo. Èdù kèawo nyi èdù sɛ̃ŋu kèwo wo ɖo èglì trɔ doawo, eye àgbo ku lɔkèwo lè woa nu.

⁶E gbà tù Baalat ku èdù kèwo nyi àgbãpòtɛpe be èdù kèwo keŋu Salomɔ̀n gbà sò, na àhùakɔ̃wo ku àhùakèkeviwo, kudo èsɔdotɔwo. Salomɔ̀n gbà tù èxɔ̀ kèwo be jro a ɖo Yèruzàlɛm be èdùa mè, ɖo Libàn be èdùwo mè ku ànyigbã kèwo keŋu lè yebe èse gɔ̃mèawo ji.

⁷Dùkɔ̃ kèwo keŋu kpɔ̀tɔ̀, so Hitìtɔwo, Àmorìtɔwo, Perizìtɔwo, Hivìtɔwo ku Yebusìtɔwo dòmè, ekèwo mu nyi Izràɛlviwo ò a.

⁸Lè woabe èvi kèwo ci èdùa mè, lè woa yomè, eye Izràɛlviwo mu crɔ̃ ò a, dòmè ye Salomɔ̀n sɔ àmè kèwo ye la wɔ̀ kluvi be èdɔ lè, kaka va na egbè.

⁹Vɔ̀a, Salomɔ̀n mu sɔ Izràɛlviwo dòmètɔ ɖekpe wɔ̀ kluvi-dɔ na ye ɖokoe ò. Ɖoa, àhùawɔ̀tɔwo ye wo nyi. Woawo ye nyi Salomɔ̀n be àhùa be ŋùkɔ̀nɔ̀tɔwo be ègawo. Woawo ye lè ŋùkɔ̀ na yebe àhùakèkèviwo ku èsɔdotɔwo.

¹⁰Èfìɔ Salomɔ̀n be èdɔjikpɔtɔwo be ègawo kpata lè àgbètɔ àlɔ̀ èvè èkà ci èwo lè dùkɔ̃a nu.

¹¹Salomɔ̀n kplɔ̀ Ejiptè be èfìɔ, Faraɔ̀n be nyɔ̃nùvi, so David be èdùa mè, va àxue kè be tù na ɛ̀, lè èto jia mè. E gblɔ̃ be: “Èsrɔ̃ nyè mu ɖo la nɔ̀ Izràɛl be èfìɔ David be àxomè ò, ɖoa, tèpe kèwo Tɔhonɔ̀ be Zòɖùɖu-Ɖakà a ɖoa, Tèpe Kɔ̀kɔ̀ɛ ye wo nyi.

¹²Ekèa yomè a, Salomɔ̀n wɔ̀ ènumème vɔsa na Tɔhonɔ̀, lè Tɔhonɔ̀ be vɔsakpe kè be tù ɖo àsaa ji be ŋùkɔ̀a ji.

¹³E savɔ ɖo ŋùkèkè ɖe sia ɖe nu, sɔ zɔ̃ ɖo Mosè be ɖoɖo a ji: lè jɛ̃gbɔ̃zã gbè, lè wètri ye yèwo ku àzãɖùɖu tɔ̀xɛwo ji, zè ètɔ̃ lè èpè ɖèka mè: lè kpɔ̃nɔ àkpiti, kuasiɖawo ku gòxɔwo be àzãwo ji.

¹⁴Sɔ zɔ̃ ɖo ètɔa David be ɖoɖo nua, Salomɔ̀n ɖo hũbonɔwo be èhawo, ɖo woabe èdɔwo nu. E ɖo Levìwo ɖo woabe ɖoɖo nu, ne woa nɔ kafu, eye woa nɔ sɛ̃ Mawu, lè hũbonɔwo gbɔ, sɔ zɔ̃ ɖo gbè sia gbè be ɖoɖo nu. Àgbonu ɖiatɔwo lè woabe ɖoɖo nu, lè àgbo sia àgbo nu, ɖoa, ekèa ye nyi David, Mawu be àmèa be ɖoɖo.

¹⁵Wo mu ɖè ɖekpe lè èfìɔ be ɖoɖoawo mè, so hũbonɔwo, Levìwo ku ènuwo keŋu be ɖoɖo, kudo ènuwlapeawo ŋuti ò.

¹⁶Nène a ye wo wɔ̀ Salomɔ̀n be èdɔ bliboa, so gbè kè gbè wo tɔ Tohonɔ̀ be àxuea tùtu, kaka va na yebe ènuwuwu, eye wo wu Mawu be àxuea nu.

¹⁷Ekèa yomè ye Salomɔ̀n yì Ezeɔ̀n-Gebɛr ku Elàt, lè àpùa to, lè Edɔ̀m-nyigbã ji.

¹⁸Eye Huram do àpùjihũwo àsi na yebe sumɔ̃viwo, ɖoɖa ɛ̀, ku àpùji-dɔwɔ̀tɔwo. Woawo ku Salomɔ̀n be sumɔ̃viwo yì Ɔfìr, yì hɛ̃ sìka kpɛ̃kpɛ̃ mè talɛ̃ŋutò àlɔ̀ ènè èkà ci èwo gbɔ̀, va na èfìɔ Salomɔ̀n.