Read gen 2Kronikà 9 Bible Online

2Kronikà 9 - gen bible

2Kronikà 9

¹Ekè Sebà be èfìɔ nyɔ̃nùa sè lekè Salomɔ̀n be nyikɔ le ɖì ɖoa, e va Yèruzàlɛm ku àmèha gã ɖe, kudo èsɔ kpotɔnɔ̀ kèwo dro àmì hɔ̃hɔ̃ɛ fuu, sìka sùgbɔ, gbàkudo èkpe xɔ̀asìwo be àgbã. E va Yèruzàlɛm be yèa sɔ àlòbalò do Salomɔ̀n kpɔ, eye be gblɔ̃ ènyà kèwo ye lè èjì mè na ɛ̀a na Salomɔ̀n[15].

²Salomɔ̀n ɖo yebe ènyàbiɔseawo keŋu ŋuti, eye, ɖekpe mu sɛ̃ŋu kaka, ne Salomɔ̀n mu gbà teŋu ɖo e ŋuti ò.

³Kè Sebà be èfìɔ nyɔ̃nùa kpɔ Salomɔ̀n be ènunyaa, àxue kè be tùa,

⁴ènu ɖùɖu kè nɔ̀nà yebe èkplɔ̃ ji, yebe sumɔ̃viwo be nɔ̀pewo, yebe ŋutimewo be sumɔ-dɔwo ku woabe àwùwo, yebe àhàkùtɔwo ku woabe àwùwo, ènumème vɔsa kèwo be wɔ̀nà lè Tɔhonɔ̀ be àxuea mèa, nyɔ̃nùa be ènu ku.

⁵Sebà be èfìɔ nyɔ̃nùa gblɔ̃ na èfìɔa be: “Nyàwo ye nyi ènyà kè mù sè lè àpe ànyigbã ji, so àpo ènuwɔ̀nawo ku àpo ènunya ŋutia.

⁶Nyè mu xɔ̀ ènyà kèa ji sè sãa, wàlɛbɛ kè nyè ŋutɔ, nyè mu va kpɔ ku àpe ŋùkuviwo ò. Gãkea, kpɔɖa, ènu kè mù sè a, mu sù mamãmè na ènu kè mù kpɔa ò. Àpo ènunya wu ènyà kè mù sè so ŋuti wòa fuu!

⁷Ŋutime wòwo tɔ̀ nyɔ ŋutɔ, eye sumɔ̃vi wòwo tɔ̀ nyɔ ŋutɔ! Woawo yaa, wo lè gbɔ wò gà sia gà mè, la nɔ sè àpo àɖàŋù be ènyàwo!

⁸Kafu na Tɔhonɔ̀, Mawu wò kè àpo ènu jɔ̀jì na, eye be ɖo wò èfìɔ, ɖo ye ŋutɔ be fìɔzìkpe ji, ne wòa ɖùfìɔ, sɔ wɔ̀ èdɔ na Tɔhonɔ̀, Mawu wòa! Mawu lɔ̃ Izràɛl be dùkɔ̃a, eye ne bèa na Izràɛl ne nɔ̀ ànyi tɛ̀gbɛ̀, ŋuti ye be ɖo wò èfìɔ ɖo e nu ɖo, ne wòa nɔ̀ wɔ̀ ènu nyuɛ̃ ku ènu jɔ̀jɔɛ.”

⁹E yomè a, èfìɔ nyɔ̃nùa na sìka kpɛ̃kpɛ̃mè talɛ̃ŋutò èkà ètɔ̃, èfìɔ Salomɔ̀n, ku àtikè hɔ̃ɛ titi gbãŋu gbãŋu, kudo èkpe xɔ̀asìwo. Eye àtikè hɔ̃ɛ titi ɖekpe mu gbà nɔ̀ ànyi sìgbè ekè Sebà be èfìɔ nyɔ̃nùa na Salomɔ̀n nène ò.

¹⁰Sɔ kpe ekèa, Hiràm be sumɔ̃viwo ku Salomɔ̀n tɔ̀ kèwo ye yì hɛ̃ sìka gbɔ̀ so Ɔfìr be èdùa mèa, hɛ̃ sãtal-ti ku èkpe xɔ̀asìwo cã gbɔ̀.

¹¹Èfìɔa sɔ sãtal be àti kèa do ànyigbã lè Tɔhonɔ̀ be àxuea ku èfìɔa be àxuea mè. Wo gbà sɔ ɛ̀ wɔ̀ sãŋùgu ku èkà-sãŋùguwo na èhàjìtɔwo, eye àmè ɖe mu kpɔ èhàjìnu kèawo hati kpɔ, lè Yudà be ànyigbã ji ò.

¹²Èfìɔ Salomɔ̀n cã na Sebà be èfìɔ nyɔ̃nùa, ènu kèwo keŋu èfìɔ nyɔ̃nùa jro, eye be biɔ ɛ̀a; ènu kèwo Salomɔ̀n na èfìɔ nyɔ̃nùa wu ènu kèwo èfìɔ nyɔ̃nùa hɛ̃ va na èfìɔ Salomɔ̀n. Ekèa yomè a, Sebà be èfìɔ nyɔ̃nùa trɔ jo yì àxue ku yebe sumɔ̃viwo.

¹³Sìka kè vana na Salomɔ̀n, lè èpè ɖèka mèa be kpɛ̃kpɛ̃mè lè nyi sìka talɛ̃ŋutò àlɔ̀ àdɛ̃ èkà takpo ci àdɛ̃.

¹⁴Ekèa, wo mu bù ekè ènusàtɔwo ku àsìsàtɔwo hɛ̃nà vaa, ɖo e mèa ò. Àrabìa be èfìɔwo keŋu ku ànyigbã ji be èdùjiɖùtɔwo hɛ̃nà sìka ku klòsalò va na na Salomɔ̀n[16].

¹⁵Èfìɔ Salomɔ̀n na wo sɔ sìka kè wo pò kpɛbɛa wɔ̀ àkpoxɔ̀nu gã àlɔ̀ èvè. Wo pò sìka talɛ̃ŋutò àlɔ̀ àdɛ̃ kpɛbɛ na àkpoxɔ̀nu ɖe sia ɖe.

¹⁶Wo gbà sɔ sìka kè wo pò kpɛbɛa, wɔ̀ àkpoxɔ̀nu vi àlɔ̀ ètɔ̃, ekè wo zã sìka kpɛ̃kpɛ̃ mè sekɛ̀l àlɔ̀ ètɔ̃ na a. Èfìɔa na wo fɔ̀ wo ɖo èfìɔsa kè wo ɖo nyikɔ na be Libàn be Àve mèa be fìɔsaa mè[17].

¹⁷Èfìɔa wɔ̀ ènyìɖu be fìɔzìkpe gãɖe, eye be fã sìkami àdodoe do è.

¹⁸Wo liana sìka-crɔkpe àdɛ̃, sɔ yìnà fìɔzìkpea ji, eye be ɖo sìka-fɔ̀ɖojinu. Àbɔ èvè lè àzìkpea be àkpa èvèawo, eye jãŋùta èvè lètè lè àbɔawo gbɔ,

¹⁹eye jãŋùta woèvè lètè ɖo àcrɔkpe àdɛ̃awo dòmètɔ ɖe sia ɖe ŋuti èvè èvè. Àmè ɖe mu wɔ̀ ènu kèa hati, lè fìɔdu ɖekpekpe mè kpɔ ò.

²⁰Wo sɔ sìka wɔ̀ èfìɔ Salomɔ̀n be èsìnù kogòwo keŋu, eye wo sɔ sìka meme wɔ̀ ènu ɖùɖu be ènuzãzã kèwo keŋu lè Libàn àve be fìɔsaa mèa. Lè Salomɔ̀n be hùenua, wo mu kpɔna klòsalò ɖo èmɔ ɖe nu ò.

²¹Ɖoa, èfìɔa ɖo àpùjihũ kèwo yìnà Tarsìs ku èfìɔ Huram be àpùjihũ kùtɔwo, eye, zè ɖèka lè èpè ètɔ̃ mèa, àpùjihũawo trɔna gbɔ̀ so Tarsìs, hɛ̃nà sìka, klòsalò, ènyìɖu, èfiowo ku àcɔ-sàxewo vana.

²²Èfìɔ Salomɔ̀n va trɔ zũ èfìɔ kè wu ànyigbã ji be èfìɔwo kpata, lè àdɔ̀kùnuwo ku ènunya mè.

²³Ekèa ŋutia, ànyigbã ji be èfìɔwo keŋu ji be yèwoa kpɔ èfìɔ Salomɔ̀n be ŋùmè, ne yèwoa ɖo èto ènunya kè Mawu sɔ ɖo yebe èjì mèa.

²⁴Woa dòmètɔ ɖe sia ɖe hɛ̃nà yebe ènu nana kèwo nyi: klòsalò ku sìka be ènuwo, àwùwo, àhùawɔ̀nuwo, ègbe hɔ̃ɛ titiwo, èsɔwo, èsɔ-àkɛtɛwo, eye wo wɔ̀ nà ekèa èpè sia èpè.

²⁵Salomɔ̀n ɖo èsɔ nyìpe hotu èvè, àhùakèkeviwo ku èsɔdotɔ hotu àdɛ̃, wo sɔ wo ɖo àhùakɔ̃-dùwo mè ku Yèruzàlɛm, lè èfìɔ be nɔ̀pea gbɔ[18].

²⁶E ɖùfìɔ ɖo èfìɔwo kpata nu, so Efratà be ètɔ̀ sàsraa nu, kaka va sɛ̃ Filistìtɔwo be ànyigbã ji ku Ejiptè be lipòwo ji.

²⁷Èfìɔa na be klòsalò sùgbɔ lè Yèruzàlɛm, sìgbè lekè èkpewo sùgbɔ lè ànyigbã jia nène, eye sedàtiwo sùgbɔ sìgbè lekè gbovitiwo sùgbɔ lè èto gɔ̃mè-nyigbã gbàjàwo jia nène[19].

²⁸Wo hɛ̃nà èsɔwo vana na Salomɔ̀n, so Ejiptè[20] ku èdùwo keŋu mè.

²⁹Salomɔ̀n be ŋutinya kpɔ̀tɛawo, so gɔ̃mèjèje a kaka yì ènuwuwua, wo ŋlɔ̀ wo ɖo gblɔ̃ɖɛtɔ Natàn be èdɔwɔ̀wɔwo mè ku Ahiya, Silò ŋusùa be nyàgblɔ̃ɖɛwo kudo ènumèkpɔtɔ Yɛdo be ènu mèkpɔkpɔwo mè, so Yèrobòam, Nevat be èvia ŋuti.

³⁰Salomɔ̀n ɖùfìɔ lè Izràɛl be dùkɔ̃a nu, lè Yèruzàlɛm, èpè èkà.

³¹Ekèa yomè a, Salomɔ̀n jo yì tɔgbeawo gbɔ, lè kuwode. Wo ɖì ì ɖo David, ètɔa be èdùa mè, eye èvia Robòam ɖùfìɔ ɖo e tèpe.