Read gen Ɛzrà 10 Bible Online

Ɛzrà 10 - gen bible

Ɛzrà 10

¹Ɛsdràs jèklò lè mawuxɔa mè le fã àvi. E fãkue sɔ biɔ Mawu sɔsɔkè. Izràɛlvi sùgbɔ ŋusù, nyɔ̃nù kudo vifɛ̃wo bɔ̀ pòxla ɛ̀. Woa kpata le fã àvi blòblòblò.

²Nène a ye Yehìɛl be èvi Cèkanìa kè gbà nyi Elàm be jìjimèvia, gblɔ̃ na Ɛsdràs be: “Mi ɖè àfɔ̀ bàɖà ɖe yì miabe Mawu a gbɔ, wàlɛbɛ kè mi yì ɖè àmèjro nyɔ̃nù kèwo lè èdù kèa mèa. Co gãkea, ŋùɖo viɖe gbà lè na Izràɛl.

³Fifìa mi la kã àtãŋu lè miabe Mawu be ŋùkɔ̀ be mi la nyà àmèjrovi nyɔ̃nùawo kudo woabe èvi sɔ zɔ̃ ɖo èwò kudo àmè kèwo kpɔna miabe Mawu a be èsea jia be ètopòɖo ji. Mi ɖo la wɔ̀ ɖo èsea ji.

⁴Sitè kplà! Ɖo ènyà kpɔ ŋùkumè na wò. Mi la do wò àlɔ̀. Mù gbà vɔ̃ ò!”

⁵Ɛsdràs sitè eye e na hũbonɔ gãwo ku Levìwo kudo Izràɛlviwo kpata tà ènu ɖo ènyà kè Cèkanìa gblɔ̃a ji wɔ̀wɔ ɖo. Eye woa kpata dà àsi ɖo ji.

⁶E yomè a, Ɛsdràs jo lè mawuxɔa mè. E yì Eliacìb be èvi Yohanàn be àxomè eye e ci funu. Co mu le ɖù ènu ɖe kaka la va nù èsì ò. Nyàwoa, e lè èfũ mè ɖo èhlɔ̃dãnu kè àhùaleawo wɔ̀a ŋuti.

⁷Wo ɖogà lè Yèruzàlɛm kudo Yudà nyigbã kpata ji sɔ bɔ̀ àhùale xoxoawo ɖo Yèruzàlɛm.

⁸Lè ègàɖoɖo ŋua yomè a, àmè kè mu la va funua lè ŋùkèkè ètɔ̃ mè òa, wo la xɔ̀ yebe ènuwo kpata lè e si eye wo la ɖè è to lè dùkɔ̃a dòmè.

⁹Yudà kudo Bɛnyamìn be ŋusùwo kpata va bɔ̀ lè Yèruzàlɛm lè ŋùkèkè ètɔ̃a mè. E le nyi wètri àsiɖèkɛgɔ̃a be ŋùkèkè èwìgɔ̃a gbè. Dùkɔ̃a kpata ye bɔ̀ lè mawuxɔa be gbàjà ji. Àmè sia àmè le hũhũ tìtìtì ɖo ènyà kè lètèa ŋuti kudo èji kè le jà gà ŋua mèa ŋuti.

¹⁰Hũbonɔ Ɛsdràs sitè, gblɔ̃ na wo be: “Izràɛlviwo mì wɔ̀ èhlɔ̃dãnu, va yì ɖè àmèjrovi nyɔ̃nùwo. Nène a ye mì gbà sɔ gbegble kpe Izràɛl be gbledoa.

¹¹Mì ɖo la do jèsi mìabe dàdawo lè Tɔhonɔ̀, mìa tɔgbewo be Mawu a be ŋùkɔ̀ fifì. Eye mì wɔ̀ ɖo yebe ɖoɖowo ji. Mì klã lè àmèjrovi nyɔ̃nù kudo dùkɔ̃ kèawo ŋuti.”

¹²Àmè kèwo va gòdoa mèa, do àpa be: “Ènyà wòa sɔ̀gbè! Mi ɖo la wɔ̀ ɖo ènyà kè wò gblɔ̃a ji.

¹³Co, dùkɔ̃mèviwo sùgbɔ eye mi gbà lè èji be gàmè. Mu nyɔ be mia nɔ̀ xixenu ò. Sɔ yì ejia, mi mu la teŋu wɔ̀ ènyà kèa lè ŋùkèkè ɖèka àlo èvè mè ò. Ɖo ènu kèa kã àmè sùgbɔ.

¹⁴Mi jro be xòmègawo ne sɔ̀gbè ɖo dùkɔ̃a ŋuti. Eye Izràɛlvi kèwo ɖè àmèjro nyɔ̃nùa, la yì xòmèga, dùmèmègã kudo kòjoɖotɔwo be ŋùkɔ̀ lè àzã kè wo la na woa ji. Funu ye wo la teŋu wɔ̀ ènyà kèa lè kaka ne miabe Mawu a be àdɔ̀mèzea nu ne fa.”

¹⁵Àsaɛl be èvi Yonatàn kudo Ticbà be èvi Yazìa kèwo be ŋùgbe Mèculàm kudo Levì Càbetayì lèa, kpò ye sitè ɖo sùsu kèa ŋuti.

¹⁶Izràɛlvi àhùale kpɔ̀tɛawo lɔ̃ ɖo sùsua ji. Ɛsdràs ŋutɔ ye cã xòmè gawo lè hɛ̃nuwo kpata mè. Àmè cãcã kèawo nɔ̀ ànyi lè wètri èwogɔ̃a be ŋùkèkè cucugbãa gbè sɔ jrà ènyàa kpata ɖo.

¹⁷Eye lè èpè kè kplɔ̀ ɛ̀ do a be wètri cucugbãa be ŋùkèkè cucugbãa gbèa, wo kpɔ àmè sia àmè kè ɖè àmèjro nyɔ̃nùa be ènyà gbɔ.

¹⁸Lè hũbonɔ kèwo yì ɖè àmèjro nyɔ̃nùa dòmèa, mi la kpɔ: Yecùa be jìjimè kudo nɔ̀viawo, Yòsadàk be èviwo: Màseyà, Èliezà, Yàrib kudo Gedalìa;

¹⁹wo lɔ̃ ɖoji tututu be yèwo la nyà nyɔ̃nùawo eye yèwo la na àgbò ɖèka na àmèdòmè jàjràɖo vɔsa na sɔsɔkè;

²⁰Imèr be jìjimè: Hànanì ku Zebadìa;

²¹Harìm be jìjimè: Màseyà, Èli, Sèmayà, Yehìɛl kudo Uzìa;

²²Pàcehùr be jìjimè: Ɛlyòhenayì, Màseyà, Ismàɛl, Netanèl, Yòzabàd kudo Èlasà.

²³Lè Levìwo dòmèa, mi la kpɔ: Yòzabàd, Sìmeyì, Kèlayà kè wo gbà yɔna be Kèlità, Pètahìa, Yèhudà kudo Eliezɛr.

²⁴Lè èhàjìtɔwo dòmèa, mi la kpɔ Eliacìb. Lè àgbojikpɔtɔwo dòmèa, mi la kpɔ: Sàlum, Telɛ̀m kudo Urì

²⁵Lè Izràɛlvi gbalowo dòmèa, mi la kpɔ: Parɔ̀c be jìjimè: Ramìa, Izìa, Malkìa, Mìamìn, Èlazàr, Malkìa kudo Bènayà;

²⁶Elàm be jìjimè: Màtanìa, Zakarìa, Yehìɛl, Abdì, Yeremɔ̀t kudo Èli;

²⁷Zàtu be jìjimè: Ɛlyòhenayì, Eliacìb, Màtanìa, Yeremɔ̀t Zàbad kudo Àzizà;

²⁸Bèbayì be jìjimè: Yohanàn, Hànanìa, Zàbayì kudo Àtlayì;

²⁹Banì be jìjimè: Mèculàm, Màluk, Adayà, Yàcub, Cèal kudo Yeremɔ̀t;

³⁰Pàhat-mɔ̀ab be jìjimè: Adnà, Kèlal, Bènayà, Màseyà, Màtanìa, Besàlɛl, Bìnuì kudo Manasè;

³¹Harìm be jìjimè: Eliezɛr, Isìa, Malkìa, Sèmayà, Simeɔ̀n,

³²Bɛnyamìn, Màluk kudo Sèmarìa;

³³Hacùm be jìjimè: Màtenài, Màtatà, Zàbad, Elifɛlɛ̀t, Yèremayì, Manasè kudo Sìmeyì;

³⁴Banì be jìjimè: Màdayì, Amràm, Uɛ̀l,

³⁵Bènayà, Bedìa, Kèluhù,

³⁶Vanìa, Mèremɔ̀t, Eliacìb,

³⁷Màtanìa, Màtenài, Yàsayì,

³⁸Banì, Bìnuyì, Sìmeyì,

³⁹Sèlemìa, Natàn, Adayà,

⁴⁰Màknàdebàyì, Sàsayì, Sàrayì,

⁴¹Àzarɛ̀l, Sèlemìa, Sèmarìa,

⁴²Sàlum, Àmarìa kudo Yosɛ̀f;

⁴³Nebò be jìjimè: Yeìɛl, Màtitìa, Zàbad, Zèbinà, Yàdayì, Yoɛ̀l kudo Bènayà.

⁴⁴Ŋusù kèawo kpata ɖè àmèjro nyɔ̃nùwo. Nyɔ̃nù sùgbɔ jì èvi lè woa dòmè.