Read gen Ɛzrà 3 Bible Online

Ɛzrà 3 - gen bible

Ɛzrà 3

¹Kè èpèa be wètri adrɛ̃gɔ̃ a sùa, Izràɛlvi kèwo lè woabe èdùawo mèa, pò ɖodu sɔ bɔ̀ lè Yèruzàlɛm.

²Yòsadàk be èvi hũbonɔ, Yecùa ku nɔ̀via hũbonɔ kèwo ŋuti Zòrobabɛ̀l, Cɛltìɛl be èvi kudo yebe xòmètɔwo bɔ̀ ɖoa, tɔ Izràɛl be Mawu a be vɔsakpe, ne woa teŋu nɔ wɔ̀ numème vɔsa kè Mawu be àmè Mosè be èsea ɖo ànyi a, tùtu.

³Àmè kèwo lè èdùa mè gbɔ̀xue wo trɔ gbɔ̀ vaa, be vɔ̃vɔ̃ do na àmèwo mu gbe be wo mu gbà wu èdɔa nu ò. Wo tù vɔsakpea eye wo wɔ̀ vɔsa ŋùdekɛ̃nyɛ ku wètrɔ mètɔ̀wo na Mawu.

⁴E yomè a, Izràɛlviwo ɖù èbègloewo be àzã, sìgbè àlekè ɖoɖo a biɔa nène, wo wɔ̀nà numème be vɔsa zè nenèɖe lè ŋùkèkèa mè.

⁵So kaka gà ŋua mèa, wo wɔ̀nà vɔsa wè sia wè na wètri yeye be toto kudo àzã ɖè ɖovòwo na Tɔhonɔ̀. Wo wɔ̀nà ènunana vòvòvòwo cã na Tɔhonɔ̀.

⁶Nène a ye, so wètri adrɛ̃gɔ̃ a be ŋùkèkè cucugbãa gbèa, wo gbà trɔ tɔ ènumème be vɔsawo ji na Tɔhonɔ̀. Wo mu kpɔ trɔ ɖo mawuxɔa be dodoewo ŋutɔ cã gà ŋua mè ò.

⁷E yomè a, Wo na ègà èkpedɔwɔ̀tɔwo ku èxɔ̀gbatɔwo. Wo gbà na wo ènuɖùɖu, àhà kudo àmì sɔ na Sidɔ̀ntɔ ku Tiròtɔwo, ne woa yì ji Libàn be sedàtiwo lè Yàfa be èdùa mè; woa lɔ wo to àpù ji sɔ va sɔ zɔ̃ ɖo Pɛrsìa be èfìɔ Sìrus be ègbèɖèɖea ji.

⁸Èpè kè kplɔ̀ woabe gbɔ̀gbɔ va Yèruzàlɛm, Mawu be àxue be èdùa do, lè wètri èvègɔ̃a mèa, Cɛltìɛl be èvi Zòrobabɛ̀l, Yòsadàk be èvi Yecùa kudo woa nɔ̀vi hũbonɔ ku Levìwo kudo àmè kèwo trɔ gbɔ̀ so gàtɔnugbea, tɔ mawuxɔa tùtu be èdɔawo ji. Wo cã Levì kèwo ɖo èpè èwìvɔ àtɔ̃ (25) ku wu nèneawo ne woa kpɔ èdɔawo be zɔ̃zɔ̃ sui.

⁹Yecùa ku èviawo kudo nɔ̀viawo, Kadmìɛl ku èviawo kudo nɔ̀viawo, so Yudà be hɛ̃nu, lè ègbènɔ̀du mèa, wo le kpɔ mawuxɔa be èdɔwo ji. Henadàd be Levìwo le do wo àlɔ̀.

¹⁰Wàlɛbɛ kè èdɔwɔ̀tɔwo tɔ mawuxɔa be dodoewo ɖoɖo a, wo kplɔ̀ hũbonɔ kèwo lè èɖɛ̀wuwo mèawo, le ku èkpɛ̃; eye Levì kèwo nyi Àsaf be jìjimèviwo, le pò gàkokoewo sɔ kafu Tɔhonɔ̀, sɔ zɔ̃ ɖo Izràɛl be èfìɔ David be ɖoɖowo ji.

¹¹Wo kafu Tɔhonɔ̀ gbà na ɛ̀ gogo kudo ènyà kèa be: “Tɔhonɔ̀ nyɔ eye yebe lɔ̃lɔ̃ na Izràɛl mu la vɔ̀ kpɔ ò!” Dùkɔ̃a cã le xɔ̀ ɖo ji kudo àpa lelele. Ɖo èxɔ̀tùtɔwo le ɖo mawuxɔa be dodoewo.

¹²Hũbonɔwo be hasòsoe gã ɖe kudo xòmèga, kèwo sĩ eye wo kpɔ mawuxɔa sãa, tɔ àvi fãfã wàlɛbɛ kè wo trɔ le ɖo dodoeawo lè ŋùkumè na woa. Vɔ̀a, àmè sùgbɔ buwo le do àpa, le kpɔ jìjɔɛ.

¹³Wo mu gbà teŋu nya ènukòkoewo lè àvifãfãwo gbɔ ò, ɖo woa kpata ye le do àpa kè le ɖì lè àzɔ̀ge booa.