Read gen Ɛzrà 4 Bible Online

Ɛzrà 4 - gen bible

Ɛzrà 4

¹Wàlɛbɛ kè Bɛnyamìn ku Yudà be kɛ̃tɔwo sè be Izràɛlvi kèwo gbɔ̀ so gàtɔnugbea trɔ le tù mawuxɔa,

²wo va Zòrobabɛ̀l kudo xòmègawo gbɔ eye wo gblɔ̃ na wo be: “Mi jro la do mì àlɔ̀ lè mawuxɔa be tùtu mè. Ɖo Mawu ɖèka kpò mi le sumɔ eye mi wɔ̀nà vɔsa na ɛ̀ so kaka kè Àsirìa be èfìɔ Àsaradɔ̀n ɖo mi ɖoɖa fikèa.”

³Vɔ̀a, Zòrobabɛ̀l, Yecùa kudo Izràɛl be xòmèga kpɔ̀tɛawo ɖo e ŋuti gblɔ̃ be: “Mu nyɔ be mìa do mi àlɔ̀ sɔ tù mawuxɔ na miabe Mawu ò. Mia ŋutɔ ɖèka kpò ye la wɔ̀ ɛ̀, ɖo Tɔhonɔ̀ Izràɛl be Mawu a be èxɔ̀ ye. Pɛrsìa be èfìɔ Sìrus ŋutɔ cã dàsi ɖo ekèa ji.”

⁴Nène a ye àmè kèwo lè èdùa mèa, le do gbɔ̀jɔ̀ gbɔjɔ èdɔwɔ̀tɔwo mè. Wo gbà le do vɔ̃vɔ̃ na wo ne wo mu gbà teŋu yì mawuxɔa be tùtu ji ò.

⁵Lè Pɛrsìa be èfìɔ Sìrus be èfìɔɖùɖu mè kaka va ɖo èfìɔ Dàrius jia, wo dà èfìɔsaa be ètopòɖotɔwo ɖo woa ŋuti ne woa tɔtè Izràɛlviwo be èdɔa.

⁶Lè èfìɔ Zɛ̀rzɛs be èfìɔɖùɖu be gɔ̃mè jèjea, wo ŋlɔ̀ xoma ɖo Yudà ku Yèruzàlɛm ŋuti.

⁷Lè Pɛrsìa be èfìɔ Àrtazɛ̀rzɛs be èfìɔɖùɖu hùenua, Bislàm, Mìtredàt, Tabɛ̀l kudo nɔ̀viawo gbà ŋlɔ̀ ènu ɖoɖa èfìɔ. Wo ŋlɔ̀ ènua lè Aràmgbe mè, gbà hlɛ̃ ɛ̀ lè Aràmgbe mè.

⁸Nutomèjikpɔtɔ Rehùm ku ènuŋlɔ̀tɔ Simsài gbà ŋlɔ̀ xoma so Yèruzàlɛm ŋuti ɖoɖa èfìɔ Àrtazɛ̀rzɛs. wo ŋlɔ̀ be:

⁹“Xoma kèa so Nuto mèjikpɔtɔ Rehùm, ènuŋlɔ̀tɔ Simsài, woa nɔ̀vi kèwo lè Din, Àfarsatàk, Tarpɛ̀l, Àfaràs, Erɛ̀k, Babɛ̀l, Suzè, Dehà kudo Elàm be àgowo jia gbɔ.

¹⁰Kudo àmè kpɔ̀tɛ kèwo yì gàtɔnugbe eye wo kplɔ̀ wo ɖo Sàmarìa be èdùwo mè kudo Efratà be èwèɖoxɔ̀pea be nyikɔ mè.

¹¹Woabe xoma mè be ènyàwo yekè: “Mia àpo sumɔ̃viwo so Efratà be èwèɖoxɔ̀pea le ŋlɔ̀ xoma kèa na èwò èfìɔ Àrtazɛ̀rzɛs.

¹²Miabe èfìɔ bùbùtɔ, mi le na wòa nya be Izràɛlvi kèwo jo lè gbɔ wòa, va ɖo Yèruzàlɛm kudo sùsu be yèwoa trɔ tù èdù jèagla bàɖà ŋua. Wo trɔ jrà glìkpoawo ɖo, le ɖo dodoeawo.

¹³Èfìɔ ne nya be ne wo trɔ tù èdùa, eye wo trɔ jrà glìkpaa ɖoa, èdùmèviwo mu la gbà nɔ tu àmlɔ̀kɔɛ ku èfɛ̃ ɖekpe ò. Ekèa la hɛ̃ màsɔ̀ mà-sɔɛ gã ɖe va fìɔsaa be ègànyàwo mè.

¹⁴Mi àmè kèwo le wɔ̀ èdɔ kudo wòa, mi mu la teŋu bɔ̀nu ne woa ɖì wò ègbɔ ò. Ekèa ŋuti ye mi le sìa wò ɖo.

¹⁵Na ne woa kpɔ èxotùnya xomawo mè. Wò la kè ɖo nyàwoa ŋuti be Yèruzàlɛm nyi èdù ɖe kè jèaglaa. E dona nupo na èfìɔwo ku èdùjikpɔtɔwo kòɖò. Ekèa ŋuti ye wo gbã ɛ̀ ɖo.

¹⁶Èfìɔ bùbùtɔ mi jro la sìa wò. Ne wo trɔ tù èdùa eye wo jrà yebe èglìkpaa ɖoa, wò mu la gbà teŋu ɖo ŋusɛ̃ ɖo Efratà be èwèɖoxɔ̀pe kèa ji ò.”

¹⁷Èfìɔa na wo ŋlɔ̀ ɖoŋuti kèa ɖoɖa wo be: “Mù do ègbè na Nutomèjikpɔtɔ Rehùm, na ènuŋlɔ̀tɔ Simsài kudo woa nɔ̀vi kèwo lè Sàmarìa ku Efratà be èwèɖoxɔ̀pea kpata.

¹⁸Wo hlɛ̃ xoma kè mì ŋlɔ̀ ɖoɖa mù sɔ ɖè egɔ̃mèa, na mù.

¹⁹Mù na ègbè ne woa ji ènuawo be gɔ̃mè eye wo kpɔ ɛ̀ nyàwo be so xoxoa, èdù kèa sinatè ɖo èfìɔwo ŋuti. Wo hɛ̃nà tùkaɖa vana.

²⁰Sãa, èfìɔ ŋusɛ̃tɔwo nɔ̀ èdùa mè. Wo xɔ̀ ètaci kudo èmɔ̃zɔ̃ ci lè àmèwo si lè Efratà be èwèɖoxɔ̀pea kpata.

²¹Fifìa, mì gblɔ̃ na Izràɛlvi ŋuawo be woa tɔtè èdɔawo, kaka ne woa xɔ̀ ègbè so gbɔ nyè gbɔ̀xue woa yì eji.

²²Mì kpɔ e gbɔ be ènu ɖekpe mu gbà xe èmɔ̃ kaka ne àfɔ̀klɛ̃ ɖe ne va èfìɔdua ji ò.”

²³Wàlɛbɛ kè wo hlɛ̃ èfìɔ Àrtazɛ̀rzɛs be xoma a lè Rehùm, ènuŋlɔ̀tɔ Simsài ku nɔ̀viawo be ŋùkɔ̀a, wo ɖèbla yì Yèruzàlɛm, ne woa yì nɔ̀tè èdɔawo ku àkpasɛ̃sɛ̃.

²⁴Wo tɔtè mawuxɔa be tùtu be èdɔa lè Yèruzàlɛm. Èdɔ kèa ci nènea kaka ɖo Pɛrsìa be èfìɔ Dàrius be èfìɔɖùɖu be èpè èvègɔ̃a mè.