Read gen Ɛzrà 5 Bible Online

Ɛzrà 5 - gen bible

Ɛzrà 5

¹Vɔ̀a gbè ɖèkaa, gblɔ̃ɖɛtɔ Hagài ku Zakarìa, Idò be èvia gblɔ̃ Mawu be ènyà na Izràɛlviwo lè Yèruzàlɛm kudo Yudà nyigbã ji.

²Ekèa wɔ̀ be Zòrobabɛ̀l, Cɛltìɛl be èvi ku Yecùa, Yòsadàk be èvi trɔ yì mawuxɔa be tùtu be èdɔawo ji lè Yèruzàlɛm. Mawu be gblɔ̃ɖɛtɔwo do wo àlɔ̀.

³Troloa, Tàtenayì, ènutomèjikpɔtɔ lè Efratà be èwèɖoxɔ̀pe, kè do Cetàr-Bòznayì kudo woabe èhadɔwɔ̀tɔwo kplɔ̀a, va kɔ̀ ɖo woa ji, biɔ wo sè be: “Àmè kɛ ye ɖègbè na mì be mìa tù mawuxɔa eye mìa ɖo èglìkpaa ò?

⁴Mì na mi àmè kèwo le wɔ̀ èdɔ kèa be nyikɔ!”

⁵Eye Mawu be ŋùkuvi lè Yudà be ŋùkɔ̀nɔ̀tɔawo ji kaka be wo mu nɔ̀tè èdɔa na wo ò, ɖo wo le tɔtè kpɔ àŋɛ̀ kè wo do ɖoɖa èfìɔ Dàrius be ŋuti ɖoɖo a.

⁶Xoma kè nutomèjikpɔtɔ Tàtenayì ku Cetàr-Bòznayì kudo woabe èhadɔwɔ̀tɔwo lè Efratà be èwèɖoxɔ̀pea ŋlɔ̀ ɖoɖa èfìɔ Dàrius be ènyàwo.

⁷Xoma a be ènyàtiwo yekè: “Mi biɔ ŋuti fàfa fɛ̀ɖɛ̀ na èfìɔ Dàrius!

⁸Mi ji be èfìɔ ne nya be mi yì Yudà be ànyigbã ji lè Mawu gãa be àxomè. Wo le tù ì kudo èkpe kpàkpa, eye wo le ɖo àtikpo ɖo èglìa ji. Wo le wɔ̀ èdɔ kèa àɖàŋùtɔ̀ eye e le zɔ̃ cã nyuɛ̃ ɖe.

⁹Nène a ye mi biɔ ènyà ŋùkɔ̀nɔ̀tɔawo. Mi gblɔ̃ na wo be: Àmè kɛ na mì èmɔ̃ be mìa tù àxuea eye mìa ɖo èglìkpa ò?

¹⁰Mi gbà biɔ woabe nyikɔwo, ne mia teŋu ŋlɔ̀ wo ɖoɖa ne èfìɔ bèa nya àmè kèwo le wɔ̀ èdɔ kèa.

¹¹Wo ɖo e ŋuti na mi gblɔ̃ be: “Mi nyi jiŋùkusi ku ànyigbã be Mawu a be sumɔ̃viwo. Mi trɔ le tù mawuxɔ kè Izràɛl be èfìɔ ɖìnyi gãa tù, wu yebe èdɔa nu so kaka blèmà mè ke.

¹²Vɔ̀a, mia tɔgbewo na Mawu do àdɔ̀mèze so jiŋùkusi. E ɖè wo do àsi na Babɛ̀l be èfìɔ Nèbukàdnezà. Èfìɔ kèa ye gbã mawuxɔa, kplɔ̀ dùkɔ̃a yì gàtɔnugbe lè Kaldea nyigbã ji lè Babɛ̀l.

¹³Co gãke lè Babilɔ̀ be èfìɔ Sìrus be èfìɔɖùɖu be èpè cucugbã tɔ̀a mèa, èfìɔ Sìrus na èmɔ̃ be mia trɔ tù mawuxɔa.

¹⁴Èfìɔ Nèbukàdnezà na wo lɔ mawuxɔa mè be ènuzãzã kèwo wo wɔ̀ ku sìka kudo klòsalòa, sɔ yì kɔ̀ ɖo vòduxɔ mè lè Babɛ̀l. Èfìɔ Sìrus na wo trɔ lɔ wo lè Babɛ̀l, sɔ wo do àsi na èdùjikpɔtɔ Cɛ̀cebasàr kè ye ŋutɔ cã a.

¹⁵E do ègbè kèa àsi na ɛ̀ be ne trɔ lɔ ènuzãzãwo yì kɔ̀ ɖo Yèruzàlɛm be mawuxɔa mè, ne wo trɔ tù ì ɖo yebe tèpe xoxoa vɔ̀a.

¹⁶Nène a ye Cɛ̀cebasàr kèa va Yèruzàlɛm fikèa. Eye e trɔ ɖo mawuxɔa be dodoe yeyewo. So kaka gà ŋua mèa, wo le tù ì, vɔ̀ èdɔa mu kpɔ vɔ̀ ò.”

¹⁷Fifìa, ne èfìɔ kpɔ ɛ̀ be e jèa, wo ne kpɔ èxotùnya be xoma a mè, sɔ kpɔ be èfìɔ Sìrus na èmɔ̃ tututu be woa trɔ tù mawuxɔa lè Yèruzàlɛm maa. Eye woa na ne mia nya ɖoŋutia.”