Read gen Ɛzrà 6 Bible Online

Ɛzrà 6 - gen bible

Ɛzrà 6

¹Èfìɔ Dàrius na ègbè be woa ji ènyà kèa lè èxotùnya xoma a mè lè èxɔ̀ kèwo mè wo wlana èxotùnu tɔ̀xɛwo ɖo lè Babɛ̀l nyigbã jia.

²Vɔ̀a, àgbògbò be èdù xoxo, Ɛkbatàn mè ye wo va kpɔ èxotù xoma kè ji wo ŋlɔ̀ ènu kèa ɖoa lè. Wo ŋlɔ̀ be:

³“Lè èfìɔ Sìrus be èfìɔɖùɖu hùenu be èpè cucugbãa, èfìɔ Sìrus na wo ɖè xoma kèa to be: Wo ɖo la trɔ tù Mawu be àxuea lè Yèruzàlɛm, fikè wo la nɔ wɔ̀ vɔ̀sawo lè. Wo la trɔ tù ì ɖo dodoe xoxoawo be tèpe. E la yìji metà ègbã, la gbà kèkè metà ègbã.

⁴Wo la ɖo èkpe kpàkpa àgbàkà ètɔ̃. Eye wo la dà àtikpo àgbàkà ɖèka ɖo ji. Eye èfìɔsa be àdɔ̀kùnuwo ye la kpɔ zãzãwo gbɔ.

⁵Yèruzàlɛm be mawuxɔa mè be ènuzãzã kèwo èfìɔ Nèbukàdnezà lɔ va kɔ̀ ɖo Babɛ̀l be vòduxɔ mèa, la trɔ yì yebe tèpe lè Yèruzàlɛm.”

⁶Ekèa ŋuti èfìɔ Dàrius ŋlɔ̀ xoma kèa ɖoɖa nutomèjikpɔtɔ Tàtenài, na ènuŋlɔ̀tɔ Cetàr-Bàznayì kudo yebe èhadɔwɔ̀tɔwo lè Efratà be èwèɖoxɔ̀pe gblɔ̃ be: “Mì ɖè ènu lè ènyà kèa mè.

⁷Mì na vòvo Izràɛlviwo ne woa tù Mawu be èxɔ̀a fàa: Èdùjikpɔtɔa kudo Yudà be àgbònùglawo la kpɔ yebe tùtu ɖo yebe tèpe xoxoa.

⁸Mù le biɔ so mìa si be mìa do àlɔ̀ Yudà be àgbònùglawo ne woa teŋu tù mawuxɔa. Mì kpɔ gbɔ be èfìɔsa be àdɔ̀kùnu kèwo mì le xɔ̀ lè Efratà be èwèɖoxɔ̀pea ne sù na zãzãwo, ne èdɔa mu gbà ci àkpò ji ò.

⁹Gbè sia gbèa, mì la nɔ na Yèruzàlɛm be hũbonɔwo ènu kè wo hiã na vɔ̀sawo wɔ̀wɔ: ènyì-su viwo, àgbò ku àlɛ̃wo na ènumème vɔsa na jiŋùkusi be Mawu a. Mì ɖo la na wo èlù, èjè, vɛ̃ kudo àmì.

¹⁰Nène a ye wo la teŋu nɔ wɔ̀ kukuɖèɖe be vɔ̀sawo na Mawu eye wo la gbà nɔ fãkue ɖo èfìɔ kudo yebe àxuedo a ta.

¹¹Ne àmè ɖe mu kpɔ ègbèɖèɖe kèa ji òa, ènu kè wo la wɔ̀ kudo èa yekè: Wo la ɖè yebe èxɔ̀ti ènu piɖɔɛ ɖe, eye ne wo ɖì àtia vɔ̀a, wo la sɔ ye ŋutɔ trɔ̃ àtia nu eye yebe àxue la trɔ zũ ègbeɖiɖɔɛ ɖèɖe sɔ̃ŋu.

¹²Mawu kè ɖènà yebe gogo fiɔ lè Yèruzàlɛm nyigbã jia, ne dɔ̃ èto na èfìɔ àlo dùkɔ̃ kè la ji be yèa gbã yebe mawuxɔa, sɔ sitè ɖo ègbèɖèɖe nyèa ŋutia. Ènyè èfìɔ Dàrius ŋutɔ ye ɖè ègbè kèa ne woa wɔ̀ ɖo eji tututu!”

¹³Efratà be èwèɖoxɔ̀pe be nutomèjikpɔtɔ Tàtenài, ènuŋlɔ̀tɔ Cetàr-Bàznayì kudo woabe èhadɔwɔ̀tɔwo wɔ̀ ɖo èfìɔ Dàrius be ègbèɖèɖea ji tututu.

¹⁴Izràɛlviwo be àgbònùglawo yì mawuxɔa be èdɔa ji ku àwuyaya, wàlɛbɛ kè gblɔ̃ɖɛtɔ Hagài ku Idò be èvi Zakarìa be ènyàgblɔ̃ɖɛwo do wo ŋusɛ̃a. Wo yì mawuxɔa be tùtu ku yebe jàjràɖo ji kaka wu e nu sɔ zɔ̃ ɖo Izràɛl be Mawu a be ègbè do àsi kudo Pɛrsìa be èfìɔwo Sìrus, Dàrius kudo Àrtazɛ̀rzɛs be ɖoɖowo ji.

¹⁵Lè èfìɔ Dàrius be èfìɔɖùɖu be èpè àdɛ̃gɔ̃a mè, lè Àdar be wètri be ŋùkèkè ètɔ̃gɔ̃a gbèa, wo wu mawuxɔa be èdɔa nu.

¹⁶Izràɛlviwo, hũbonɔwo, Levìwo kudo àmè kèwo trɔ gbɔ̀ so gàtɔnugbea, ɖù àzã sɔ kɔ̀ mawuxɔa ŋuti lè jìjɔɛ mè.

¹⁷Gà ŋua mèa, wo wɔ̀ vɔsa ku ènyì-su àlɔ̀ ɖèka, àgbò àlɔ̀ èvè kudo àlɛ̃ àlɔ̀ ènè, gbàkudo gbɔgbɔɛ woèvè. Gbɔgbɔɛ ɖèka na kɔ̀ta ɖèka, sɔ biɔ Mawu be sɔsɔkè ɖo Izràɛl dùkɔ̃ ta.

¹⁸Wo mã hũbonɔ kudo Levìawo ɖo èha sòsoe nu, sɔ zɔ̃ ɖo èdɔ kè kã àmè sia àmè lè mawuxɔa mèa ji, sìgbè àlekè be lè lè Mosè be xoma a mèa nène.

¹⁹Izràɛlvi kèwo trɔ gbɔ̀ so gàtɔnugbea, ɖù toŋutivayì-lɛ̃vi be àzãa lè èpè kè jè e yomè a be wètri cucugbãa be ŋùkèkè woènègɔ̃a gbè.

²⁰Hũbonɔwo kudo Levìawo lè woa ɖokoe ɖì ɖodu. Vɔ̀a, dùkɔ̃mèvi kpɔ̀tɛawo mu wɔ̀ ɛ̀ ò. Levìawo kɔ̀ eye wo la teŋu wù toŋutivayì be àlɛ̃awo ɖo dùkɔ̃a nu, ɖo woa nɔ̀vi hũbonɔwo kudo woa ɖokoe nu.

²¹Eye Izràɛlviwo ɖù toŋutivayì be ènuɖùɖua; àmè kèwo gbɔ̀ so gàtɔnugbea kudo àmè kèwo trɔ lè vòdu sùmɔ̀ sumɔwo yomè, sɔ sumɔ Tɔhonɔ̀ Izràɛl be Mawu a.

²²E yomè a, wo ɖù kpɔ̃nɔ àkpiti be àzã, ŋùkèkè adrɛ̃ sɔ̃ŋu lè jìjɔɛ mè. Ɖo Tɔhonɔ̀ do jìjɔɛ na wo to lekè be trɔ Àsirìa be èfìɔ be èjì ɖoɖa woa gbɔ ɖoa ji. E do wo ŋusɛ̃ lè Izràɛl be Mawu a be mawuxɔa be èdɔwo mè.