Read gen Ɛzrà 7 Bible Online

Ɛzrà 7 - gen bible

Ɛzrà 7

¹Lè ènu kèawo yomè a, lè èfìɔ Àrtazɛ̀rzɛs be èfìɔɖùɖu hùenua, Ɛzrà kè nyi Serayà be èvi, Àzarìa be èvi, Hilkìa be èvi,

²Sàlum be èvi, Sadɔk be èvi, Ahitub be èvi,

³Àmarìa be èvi, Àzarìa be èvi, Mèrayɔ̀t,

⁴Zèrayà be èvi, Uzì be èvi, Bùki be èvi,

⁵Àbicuà be èvi, Pìneà be èvi, Eleazàr be èvi, hũbonɔ gã Arɔ̀n be èvia.

⁶Ɛzrà kèa va Babɛ̀l. Mosè be èse kè Tɔhonɔ̀ Izràɛl be Mawu a sɔ na woa be ènuŋlɔ̀tɔ be nyi. Kè Mawu be àlɔ̀ lè e jia, èfìɔa lɔ̃ ɖo ènu kè be biɔa ji.

⁷Lè èfìɔ Àrtazɛ̀rzɛs be èfìɔɖùɖu be èpè adrɛ̃gɔ̃ a, wàlɛbɛ kè Izràɛlviwo, hũbonɔwo, levìwo, èhàjìtɔwo, àgbojikpɔtɔwo kudo mawuxɔa be sumɔ̃viwo trɔ gbɔ̀ va Yèruzàlɛm be èdùa mèa,

⁸Ɛsdràs cã gbɔ̀ va kudo wo lè wètri àtɔ̃gɔ̃a mè.

⁹E so lè wètri cucugbãa be ŋùkèkè cucugbãa gbè jè èmɔ̃, eye e yì kɔ̀ ɖo Yèruzàlɛm nyigbãa ji lè wètri àtɔ̃gɔ̃a be ŋùkèkè cucugbãa gbè. Ɖo Mawu be àlɔ̀ sɛ̃sɛ̃a cɔ̃ e ji.

¹⁰Nyàwoa, Ɛsdràs sɔ ye ɖokoe na Tɔhonɔ̀ be èsea be nyanya ne bèa teŋu fiɔ Izràɛlviwo ne woa kpɔ eji, gbà nɔ wɔ̀ ɖo yebe ɖoɖowo ji.

¹¹Xoma kè èfìɔ Àrtazɛ̀rzɛs ŋlɔ̀ do àsi na Ɛsdràs, hũbonɔ ku ènuŋlɔ̀tɔ gã lè Tɔhonɔ̀ be èsea kudo ɖoɖowo na Izràɛlviwoa ye nyi ekèa:

¹²“Ènyè Àrtazɛ̀rzɛs, èfìɔwo be èfìɔ ye le ŋlɔ̀ xoma kèa ɖoɖa hũbonɔ Ɛsdràs, kè nyi jiŋùkusi be Mawu a be èse ŋlɔ̀tɔa.

¹³Mù le na ègbè be woa tàsi Izràɛlvi kèwo kpata lè fìɔdu nyèa mè, hũbonɔwo, Levìwo kudo àmè gbalo kèwo jro la trɔ yì Yèruzàlɛm nyigbã jia ne woa yì fàa.

¹⁴Ènyè ŋutɔ kudo cãmì adrɛ̃ nyèwo ye le ɖo wò ɖoɖa Yèruzàlɛm ku Yudà nyigbãa ji, ne woa yì kpɔ lekè wo la wɔ̀ ɖo àpo Mawu be èsea ji ɖoa.

¹⁵Lè ègo kèa mèa, wò la lɔ sìka ku klòsalò nunana kèwo ènyè kudo cãmì nyèwo, mi wɔ̀a, yì na lè Izràɛl be Mawu a be àxuea mè lè Yèruzàlɛm.

¹⁶Sìka ku klòsalò be ènunana kèwo Babɛ̀ltɔwo la na woa cã la yì na Yèruzàlɛm be mawuxɔa.

¹⁷Funua, wò la sɔ ègà kèa sɔ plè ènyì-suwo, àgbòwo, àlɛ̃wo kudo ènu kèwo hiã lè àgblèmènukuwo mè ku vɛ̃ na vɔ̀sawo be wɔ̀wɔ lè mìabe Mawu be vɔsakpea ji lè mawuxɔa mè lè Yèruzàlɛm.

¹⁸Eye èwò ku nɔ̀vi wòwo, mìa wɔ̀ ènu kè jro mìa kudo ègà kpɔ̀tɛa, sɔ zɔ̃ ɖo Mawu be èjro ji.

¹⁹Wò la sɔ sùmɔ̀ sumɔ be ènuzãzã kèwo wo sɔ na wòa yì kɔ̀ ɖo àpo Mawu a be àxuea mè lè Yèruzàlɛm.

²⁰Ne ènu buwo gbà hiã na mawuxɔa, èfìɔsaa be àdɔ̀kùnuwo ye la plè wo na wò.

²¹Ènyè ŋutɔ èfìɔ Àrtazɛ̀rzɛs, ye le ɖègbè na ègàjikpɔtɔ kèwo lè Efratà be èwèɖoxɔ̀pe be àgoa kpata jia be mìa wɔ̀ ɖo ènu kè hũbonɔ Ɛsdràs, Mawu jihũitɔa be ènuŋlɔ̀tɔa la biɔ so mìa sia ji.

²²Wo lɔ ènuwo na ɛ̀ sìgbè klòsalò kìlo àkpe ètɔ̃, èlù sako ègbã, vɛ̃ lità hotu èvè, àmì lità hotu èvè kudo èjè lè gbɔsùsu mè.

²³E jè be ènu kèwo kpata jiŋùkusi be Mawu a biɔa, woa wɔ̀ ɛ̀ na ɛ̀ tɔ̀xɛ. Nène a, Mawu kèa mu la gbà do àdɔ̀mèze ɖo fìɔdua, ènyè kudo àxuedo nyèa ŋuti ò.

²⁴Wu ekèa, ègàjikpɔtɔwo mu ɖo la xɔ̀ ègà ɖe, ètaci àlo èmɔ̃zɔ̃ci ɖe lè hũbonɔwo, Levìwo, èhàjìtɔwo, àgboɖiatɔwo, èdɔwɔ̀tɔwo kudo mawuxɔa be sumɔ̃viwo si ò.

²⁵Eye, na èwò Ɛsdràs, sɔ zɔ̃ ɖo Mawu be nyanya kè lè àsi wòa jia, ɖo kòjoɖotɔwo kudo ègawo ne woa nɔ kpɔ Efratà be èwèɖoxɔ̀pe be àgoa ji lè àmè kèwo nya àpo Mawu a be èseawo dòmè. Fiɔ èsea àmè kèwo mu nya ɛ̀ òa.

²⁶Ne lè e yomè a àmè ɖe gbe be yè mu la wɔ̀ ɖo e ji òa, èsea ne pò è ku ènu kè jèa, na èku, na àmè ɖè to lè èdù mè, àlo woa xɔ̀ yebe ènuwo, àlo woa do è ègàkpa mè.”

²⁷“Sìtu na mia tɔgbewo be Mawu kè be àlɔ̀ lè èfìɔa ji eye be na gogo Tɔhonɔ̀ be mawuxɔa lè Yèruzàlɛm-a.

²⁸Lè èfìɔ ku cãmìwo kudo èfìɔvi sɛ̃sɛ̃wo be ŋùkɔ̀a, Tɔhonɔ̀ kɔ̀ yebe àdɔ̀mè ɖo ŋuti nyè. E do mù ŋusɛ̃ eye mù teŋu bɔ̀ Izràɛl be xòmègawo gbɔ̀ va Yudà nyigbã ji kudo mù.”