Read gen Ɛzrà 8 Bible Online

Ɛzrà 8 - gen bible

Ɛzrà 8

¹Izràɛlviwo be xòmèga kèwo lè èxotùxoma a mè eye wo gbɔ̀ so Babɛ̀l kudo mù va Yèruzàlɛm, lè èfìɔ Àrtazɛ̀rzɛs be hùenua yekè.

²Gɛrsɔ̀n so Pinàs be hɛ̃nu; Dàniɛl so Itamàr be hɛ̃nu; Hàtuc so David be hɛ̃nu;

³Cèkanìa be èvi ŋusù ɖèka; Zakarìa so Parɔ̀c be hɛ̃nu, ku ŋusùti èkà ètɔ̃ takpo ci èwo so yebe xòmè mè;

⁴Zèrayà be èvi ŋusù Èlìhoenayì so Pàhat-Mòab be hɛ̃nu, ku ŋusùti àlɔ̀ èvè (200);

⁵Yazìɛl be èvi ŋusù Cèkanìa so Zàtu be hɛ̃nu, kudo ŋusùti àlɔ̀ ètɔ̃ (300);

⁶Yonatàn be èvi ŋusù Ebɛ̀d so Adìn be hɛ̃nu, kudo ŋusùti èkà ci èwo (50);

⁷Àtalìa be èvi ŋusù Ezayà so Elàm be hɛ̃nu, kudo ŋusùti èkà takpo ci èwo (70);

⁸Mikàɛl be èvi ŋusù Zebadìa so Cèfatìa be hɛ̃nu kudo ŋusùti èkà èvè (80);

⁹Yehìɛl be èvi ŋusù Obadìa so Yoab be hɛ̃nu kudo ŋusùti àlɔ̀ èvè ci woènyi (218);

¹⁰Yosifà be èvi ŋusù Cèlomìt so Banì be hɛ̃nu kudo ŋusùti èkà ènè (160);

¹¹Bèbayì be èvi Zakarìa so Bèbayì be hɛ̃nu kudo ŋusùti èwì vɔ ènyi (28);

¹²Hàkatàn be èvi ŋusù Yohanàn so Azgàd be hɛ̃nu kudo ŋusùti àlɔ̀ ɖèka ci èwo (110);

¹³Elifɛlɛ̀t, Yeìɛl ku Sèmayà, nɔ̀vi ètɔ̃ so Àdonikàm be hɛ̃nu kudo ŋusùti èkà takpo (60);

¹⁴Utài ku Zàkur so Bìgvayì be hɛ̃nu kudo ŋusùti èkà takpo ci èwo (70).

¹⁵Mù bɔ̀ àmè kèawo kpata ɖo ètɔ̀ kè to Àhavàa eye mi ci funu xɔ̀ ŋùkèkè ètɔ̃. Wàlɛbɛ kè mù kpɔ ɛ̀ be Levì ɖekpe mu lè hũbonɔ kudo àmè gbaloawo dòmè òa,

¹⁶mù na wo yɔ Eliezɛr, Arìɛl, Sèmayà, Ɛlnatàn, Yàrib, Ɛlnatàn, Natàn, Zakarìa, Mèculàm kudo èsefiɔtɔ Yòyarib ku Ɛlnatàn;

¹⁷Mù dɔ̃ wo ɖoɖa Idò kè nyi Kàsifìa jikpɔtɔa gbɔ. Mù gblɔ̃ ènu kè wo la gblɔ̃ na ɛ̀ kudo yebe èhadɔwɔ̀tɔwo gbàkudo woabe sumɔ̃viwoa na wo. Nène a ye wo la teŋu kplɔ̀ mawuxɔa mè be èdɔwɔ̀tɔwo va na Mawu be àxuea.

¹⁸Kè e tɔ̀ be Mawu be àlɔ̀ lè mia jia, wo yì kplɔ̀ Cèrebìa, àmè ɖè sùsu kè so Mahlì be hɛ̃nu lè Levì be kɔ̀ta, Yakɔb be jìjimèvi kudo nɔ̀viawo ŋusùti woenyi.

¹⁹Wo gbà kplɔ̀ Hàcabìa ku Ezayà lè Merarì be èviwo dòmè bɔ̀ ɖo e ŋuti, sɔ kpe woa nɔ̀viwo kudo woabe èviwo. Wo nɔ̀ ŋusùti èwì.

²⁰Lè sumɔ̃viwo dòmèa, wo cã ŋusùti èkà àtɔ̃ takpo (220) sɔ zɔ̃ ɖo woabe nyikɔ ji, sìgbè lekè David ku xòmègawo sɔ wo na Levìawo nène na sùmɔ̀ sumɔ.

²¹Lè Àhavà be ètɔ̀a toa, mù na mi blanu sɔ blìbɔ̀ na Mawu ne mia teŋu zɔ̃ èmɔ̃ bɔ̀bɔɛɖe, mia ku miabe xòmèwo.

²²Ɖo èŋù kpɛ̃ mù ne ma biɔ gbãdãgbãwo, èfìɔ ne woa kplɔ̀ mi lè èmɔ̃zɔ̃zɔ̃a mè.

²³Ekèa ŋuti mi blanu sɔ biɔ Mawu be àmè kpɔ̀kplɔ eye e sè miabe kuefã.

²⁴E yomè a, mù ɖè hũbonɔ gã woèvè ɖovò, Cèrebìa ku Hàcabìa kudo woabe èhadɔwɔ̀tɔ èwo buwo cã.

²⁵Eye mù dà klòsalò, sìka kudo ènu vòvòvò kèwo èfìɔ, yebe cãmìwo, yebe èhadɔwɔ̀tɔwo kudo Izràɛlvi kèwo lè èdùa mèa wɔ̀ na miabe Mawu be àxuea.

²⁶Mù sɔ klòsalò kìlo hotu èwo (20000) kudo klòsalò be ènuzãzã kìlo àkpe ètɔ̃ (3000), sìka kìlo àkpe ètɔ̃ (3000),

²⁷Sìka kɔpò èwì (20) kèwo be xòmè nyi sìkaga àkpe ɖèka (1000), kudo gàjɛ̃ be àyawa kèwo xɔ̀ àsì sìgbè sìka tɔ̀ kea nène.

²⁸Mù gblɔ̃ na wo be: “Wo ɖè mì ɖovò na Tɔhonɔ̀; wo ɖè ènuzãzã kèawo cã ɖovò. Klòsalò ku sìka kèawo nyi ènunana fàa na Tɔhonɔ̀, mìa tɔwo be Mawu.

²⁹Mì lebè na àdɔ̀kùnu kèawo kaka yì Yèruzàlɛm. Funu ye mì la dà wo kpɔ lè hũbonɔ gãwo kudo Levìawo gbàkudo xòmègawo be ŋùkɔ̀ lè Tɔhonɔ̀ be mawuxɔa be ènuwlape be èxɔ̀awo mè.”

³⁰Hũbonɔawo ku Levìawo xɔ̀ klòsalò ku sìka be ènuzãzã kèwo wo dà a, eye wo kpɔ wo ji kaka yì kɔ̀ ɖo Yèruzàlɛm lè miabe mawuxɔa mè.

³¹Wètri cucugbãa be ŋùkèkè woèvègɔ̃a gbèa, mi so lè Àhavà be ètɔ̀a to, jè èmɔ̃ tùtà Yèruzàlɛm. Miabe Mawu be àlɔ̀a cɔ̃ mia ji lè kɛ̃tɔwo ku èmɔ̃sòtɔwo be èxadodowo be ŋùkɔ̀.

³²Wàlɛbɛ kè mi va yì ɖo Yèruzàlɛm be èdùa mèa, mi gbɔ̃jɛ̃ ŋùkèkè ètɔ̃ sɔ̃ŋu.

³³Ŋùkèkè ènègɔ̃a gbèa, mi dà klòsalò, sìka kudo ènuzãzãwo lè Tɔhonɔ̀ be mawuxɔa mè. Eye mi sɔ klòsalò ku sìka be ènuzãzã kèawo do àsi na Urìa be èvi, hũbonɔ Mèremɔ̀t kè ŋuti Pinàs be èvi Eleazàr kudo Levìwo Yòzabàd, Yecùa be èvi ku Bìnuyì be èvi Nɔ̀adìa bɔ̀ ɖoa.

³⁴Wo dà ènu sia ènu kpɔ, wo sɔ̀gbè pɛpɛpɛ eye wo ŋlɔ̀ ɛ̀ ɖo xoma mè.

³⁵Àhùale kèwo trɔ gbɔ̀ so gàtɔnugbea wɔ̀ ènumème be vɔsa na Izràɛl be Mawu a. Wo na ènyì-su woèvè, àgbò èkà èvè ci woeàdɛ̃ (96) kudo àlɛ̃ èkà takpo ci woeadrɛ̃ (77) na ènumème vɔsa na Tɔhonɔ̀.

³⁶E yomè a, wo sɔ èfìɔ be ègbè do àsiwo sɔ na fìɔgbɔfìɔ kudo èdùjikpɔtɔ kèwo lè Efratà be èwèɖoxɔ̀pe be àgoa jia. Eye woawo cã nɔ̀ ŋùgbe na Izràɛlviwo lè Mawu be àxuea be ènyàwo mè.