Read gen Ɛzrà 9 Bible Online

Ɛzrà 9 - gen bible

Ɛzrà 9

¹Lè ènu kèawo yomè a, xòmègawo va gbɔ nyè, gblɔ̃ na mù be: “Àmè gbalowo àlo hũbonɔwo kaka jè Levìwo jia, àmè ɖekpe mu nɔ̀ àzɔ̀ge na dùkɔ̃ kèa ku yebe ènusɛ̃sɛ̃wo ò. Wo yì pò woabe èkɔ̀ pòɖiwo sìgbè lekè Kanàntɔwo, Hitìtɔwo, Perizìtɔwo, Yebusìtɔwo, Amɔ̀nviwo, Mòabviwo, Ejiptètɔ ku Àmorìtɔwo wɔ̀nà ɛ̀a nène.

²Wo yì ɖè woabe nyɔ̃nùwo na woa ŋutɔ kudo woabe ŋusùviwo. Ekèa na be dùkɔ̃ cãcãa caka kudo àmèjrowo. Xòmèga kudo cãmìawo ye jè ŋùkɔ̀ wɔ̀ àfɔ̀dogbe be ènu kèa.”

³Wàlɛbɛ kè mù sè ènyà kèa, mù zɛ̃ àpe àwùwo lè èkɔ̀. Mù nyɔ̀ ègɛ̃ kudo èɖà nyèwo eye mù titɔ, ci ànyigbã.

⁴Mù ci funua kaka va na gà kè mè wo la wɔ̀ fìɛ̃si be vɔsaa. Àmè sùgbɔ vɔ̃ ètodɔ̃ kè Mawu la na àmè kèwo wɔ̀ leke be àfɔ̀dogbea. Wo va bɔ̀ trɔ do mù gòdò.

⁵Lè vɔsa be gàmèa, ènyè Ɛsdràs, mù sitè lè àkpɔ̃ nyèa mè. Àwù zɛ̃zɛ̃awo gbà kpɔ̀tɔ̀ lè èkɔ̀ na mù eye mù jèklò, kɔ àsi èvè nyèwo ɖoɖa Tɔhonɔ̀ Mawu nyè.

⁶Eye mù fã yɔ ɛ̀ gblɔ̃ be: “Èŋù le kpɛ̃ mù Mawu nyè! Mawu nyè, èŋù le kpɛ̃ mù kaka ne ma kɔ ŋùkumè yì ji. Miabe nuvuɛ̃ sùgbɔ kaka yì ji wu miabe ètawo. Miabe àgɔ̀jèjewo mlì kaka yì tɔ jiŋùkusi ŋutɔ cã.

⁷So mia tɔgbewo be hùenu kaka va ɖo egbèa, mi wɔ̀ nuvuɛ̃ jiŋɔwo. Ekèa ŋuti ye miawo, miabe èfìɔwo kudo hũbonɔwo ci èdùta be èfìɔwo be ŋusɛ̃ gɔ̃mè. Wo sɔ àhùawɔ̀wɔ, àmènuhàhla, ègbɔɖìamè ku gàtɔnugbe yìyi sɔ pò mi sìgbè lekè e gbà lè egbèa nène.

⁸Vɔ̀ fifìa, na gàmè vi kèa, Tɔhonɔ̀, wò ɖè àdɔ̀mè nyuɛ̃ wòa fiɔ to àmè viɖe kè wò tàsi na mi eye wo teŋu trɔ gbɔ̀ va àpo Nɔ̀pe Kɔ̀kɔ̀ɛ ji. Nène a ye wò gbà na miabe ŋùkumè kɔ̀ eye wò trɔ na mi àgbè viɖe lè miabe kluvi nyinyia mè.

⁹Ɖo mi nyi kluvi vɔ̀ wò mu ɖèkɔ̀ lè mia ŋuti ò. Wò na Pɛrsìa be èfìɔ xɔ̀ mi nyuɛ̃ ɖe trɔ na mi àgbè. Nène a ye mi teŋu trɔ tù mawuxɔ wòa, wàlɛbɛ kè mi jrà èglìkpoawo ɖo vɔ̀a. Mi trɔ ɖo nɔ̀pe lè Yèruzàlɛm ku Yudà nyigbã ji.

¹⁰Lè ekèa yomè fifìa, Tɔhonɔ̀ nukɛ ye mi la gblɔ̃ kò? Mi ɖèkɔ̀ lè àpo èseawo ŋuti.

¹¹Èse kèwo wò do na mi to àpo sumɔ̃vi gblɔ̃ɖɛtɔwo jia. Wò sìa mi sã be: “Ànyigbã kè mì la yì xɔ̀a, mu kɔ̀ ò ɖo àmè kèwo nɔ̀ e jia pòɖi ì to woabe ènudakà wɔ̀wɔwo ji, lè ègowo kpata mè.

¹²Eŋuã mì mu gbà sɔ mìabe nyɔ̃nùviwo na woabe ŋusùwo ne woa ɖè ò. Mì mu gbà yì ɖè woabe èvi nyɔ̃nùwo na mìabe ŋusùviwo cã ò. Mì mu gbà ji ŋuti fàfa lè woa gbɔ kaka la ji ènyuɛ̃ na wo ò. Nène a mì la kpɔ ŋusɛ̃ eye mì la ɖù ànyigbã a be kusɛ̃sɛ̃wo. Ekèa la nyi ècrɔ̃nu kòkòɖàbì na mìabe èviwo.”

¹³Lè ènu kèwo keŋu jɔ̀ ɖo mia jia mè, ɖo miabe ènudakà wɔ̀wɔ ŋutia, wò mu dɔ̃ yebe èto na mi ò. Ɖo wò gbà teŋu gble mi àmè ɖewo ɖɛ.

¹⁴Fifìa ɖe, nukɛŋuti mi la gbà nɔ wɔ̀ àgɔ̀jèje be ènuwo ɖo ò? Nukɛŋuti mi la nɔ ca kudo àmèjro kèwo wɔ̀ ènukpòtoewo lè èsrɔ̃ɖèɖe mèa ɖo ò? Wò la bijì do mi kaka la crɔ̃ àmè kèwo wò gble dà ɖɛa?

¹⁵Tɔhonɔ̀ Izràɛl be Mawu, wò lè jɔ̀jɔɛ, ɖo mi nyi àmè kèwo kpɔ̀tɔ̀ lè àhùaleawo dòmè. Ekèa ŋuti be nyi nène ɖo lè egbè. Mi lè ŋùkɔ̀ na wò kudo miabe àgɔ̀jèjewo. Co mi nya be àmè ɖekpe mu la teŋu nɔ̀tè lè ŋùkɔ̀ na wò lè àgbènɔ̀nɔ kèa hati mè ò.”