Read gen Nèhemìa 1 Bible Online

Nèhemìa 1 - gen bible

Nèhemìa 1

¹Hàkalìa be èvi, Nèhemìa be ŋutinya. Lè èfìɔ Àtazɛ̀rzɛs be èpè èwìgɔ̃a mè, lè Kislò be wètria mè, wàlɛbɛ kè ènyè Nèhemìa, mù lè àgbògbò be èdù, Suzè mèa,

²nɔ̀vi nyè ɖèka Hànanì, kudo nɔ̀vi ŋusù ɖewo so Yudà be ànyigbã ji va. Mù biɔ wo ènyà so Izràɛlvi kèwo kpɔ̀tɔ̀ ci Yudà nyigbã ji lè àhùaleawo mèa, kudo Yèruzàlɛm ŋuti.

³Eye wo gblɔ̃ na mù be: “Àhùaleawo be àmè kèwo kpɔ̀tɔ̀a lè Yudà be èdù via mè. Vɔ̀ wo lè gbledo gã ɖe kè ɖì àmè ègbɔa mè. Yèruzàlɛm ya be èglìwo ɖo èdowo eye yebe àgboawo fiɔ̃ ɖiwa.”

⁴Wàlɛbɛ kè mù sè ènyà kèawoa, mù nɔ̀ ànyi eye mù fã àvi. Mù nɔ̀ ènuxàxa mè ŋùkèkè fuu eye mù blanu. Mù fãkue lè jiŋùkusi be Mawu a be ŋùkumè.

⁵Eye mù gblɔ̃ na ɛ̀ be: “Oò Tɔhonɔ̀, jiŋùkusi be Mawu, Mawu gã gbà ɖo vɔ̃vɔ̃a! Wò le zòɖùɖu wòa ɖotè na àmè kèwo kpɔna èse wòa jia, eye wò wɔ̀nà ànùkua kudo àmè kèwo lɔ̃ wòa.

⁶Tɔ̀ wò jɔ̀, kɔ̀ ŋùkumè ɖo ŋuti nyè, ne àpo ètowo ne hũ, ne wòa sè kuefã kè mù le wɔ̀ ɖoɖa wò, ènyè àpo sumɔ̃via. Mù le blìbɔ̀ lè àpo ŋùkɔ̀ egbè, èzã ku kedèa mù le blìbɔ̀ na wò ɖo mia, Izràɛlvi, àpo sumɔ̃viwo ta. Mù le ɖèkuku ɖo èvuɛ̃ kèwo mi wɔ̀a ta. Ɛ̃ɛ ènyè kudo tɔgbe nyèwo, mi wɔ̀ èvuɛ̃.

⁷Mi mu wɔ̀ ènu kè jèa va gbɔ wò ò. Mi dà lè àpo ègbè do àsi, èseawo kudo ɖoɖo kèwo wò sɔ do àsi na àpo sumɔ̃vi Mosè a ji.

⁸Tɔ̀ wò jɔ̀, ɖoŋùku ènyà kè wò sɔ na àpo sumɔ̃vi Mosè be gblɔ̃a be: “Ne mì mu wɔ̀ ànùkua na mù òa, mù la kãkã mì ɖo dùkɔ̃ buwo dòmè.

⁹Vɔ̀, ne mì trɔ va gbɔ nyè eye mì trɔ le èse nyèwo ɖo àsia, mù la yì ji mì eye mù la bɔ̀ mì ɖo tèpe kè mù cã la ɖè nyikɔ nyè fiɔ lè, ne mì gbà yì kãkã ɖo ànyigbã be nukpòpe cã a.”

¹⁰Sumɔvi wòwo mi nyi Tɔhonɔ̀, mi nyi àpo dùkɔ̃! Àpo àlɔ̀ sɛ̃sɛ̃a ku hɔ̃hlɔ̃ ye wò sɔ na mi vòvo.

¹¹Tɔ̀ wò jɔ̀, Tɔhonɔ̀, ɖo èto àpe kuefã kè mù le wɔ̀ ɖoɖa wò, bɔ̀ ɖo sumɔ̃vi kpɔ̀tɛ kèwo kpɔna jìjɔɛ lè àpo sɛ̃sɛ̃ mèa ŋuti. Na ne susu nyè kèwo ji mù la wɔ̀ ɖoa, ne zɔ̃ sùu; na ne èfìɔ ne dà àsi ɖo ekèa ji bɔ̀bɔɛɖe.” Nyàwoa, mù nyi àmè kè kùnà àhà na èfìɔ lè fìɔsaa mè.