Read gen Nèhemìa 11 Bible Online

Nèhemìa 11 - gen bible

Nèhemìa 11

¹Dùkɔ̃a be ègawo va yì sò àxue ɖo Yèruzàlɛm. Lè àmè kpɔ̀tɛawo dòmèa, wo tè èdù sɔ cã àmè ɖèka lè èwo ji kè la sò nɔ̀pe ɖo Yèruzàlɛm, èdù kɔ̀kɔ̀ɛa mèa. Àmè àsiɖèkɛ kpɔ̀tɛawo la teŋu nɔ̀ ànyigbã a be èdù kpɔ̀tɛawo mè.

²Dùkɔ̃a doàkpe na àmè kèwo ŋutɔ lɔ̃ fàa, la yì sò nɔ̀pe ɖo Yèruzàlɛm be èdùa mèa.

³Yudà be àgowo ji be ègawo sò kɔpe ɖo Yèruzàlɛm. Izràɛlvi kpɔ̀tɛawo: Hũbonɔwo, Levìwo, mawuxɔa be sumɔ̃viwo kudo Salomɔ̀n be jìjimèviwo kpɔ̀tɔ̀ ci woabe kɔpewo mè àmètɔ̀ àmètɔ̀.

⁴Co gãkea, Yudà ku Bɛnyamìn be àmè ɖewo kpɔ̀tɔ̀ sò kɔpe ɖo Yèruzàlɛm. Lè Yudàviwo dòmèa, wo la hlɛ̃: Àtayà, so Perɛ̀s be hɛ̃nu, Màlalɛ̀l be jìjimè to Cèfatìa ji, Àmarìa, Zakarìa kudo Uzìa,

⁵Màaseyà, Cìlonì be jìjimè to Zakarìa ji cã, Yòyarìb, Adayà, Hàzayà, Kɔl-Hozè kudo Bàruk.

⁶Lè Perɛ̀s be hɛ̃nua mèa, wo la hlɛ̃ ŋusùti àlɔ̀ ènè èkà takpo ci ènyi (468), kèwo va sò kɔpe ɖo Yèruzàlɛm be èdùa mè.

⁷Lè Bɛnyamìn be àmèwo dòmèa, mi la hlɛ̃: Salù, Yècayà be jìjimè to Itìɛl ji, Màaseyà, Còlayà, Pèdayà Yɔɛ̀d kudo Mèculàm,

⁸Gàbayì ku Salàyì cã; wo lè àmè àlɔ̀ àsiɖèkɛ èwì vɔ ènyi (928).

⁹Yoɛ̀l, Zikrì be èvia, ye lè ŋùkɔ̀ na àmè kèawo, eye Yèhudà, Hàsenuà be èvia nyi èdùjikpɔtɔa be gɔ̃mènɔ̀tɔ.

¹⁰Lè Hũbonɔwo dòmèa, mi la hlɛ̃: Yèdayà, Yòyarìb be èvi, Yakìn,

¹¹Serayà, hũbonɔ gã Ahitub be jìjimè to Mèrayɔ̀t ji, Sadɔk, Mèculàm kudo Hilkiyà,

¹²kudo woabe hɛ̃nume àlɔ̀ ènyi èwì vɔ èvè (822), kèwo ye wɔ̀nà èdɔwo lè mawuxɔamè. Adayà, Malkìa be jìjimè to Pàcehùr ji, Zakarìa, Amsì, Pèlalìa kudo Yèroàm,

¹³kudo nɔ̀via kèwo nyi xòmè gaawo lè àlɔ̀ èvè èkà ci èvè (242); Àmacesàyì, Imèr be jìjimè to Mècilemɔ̀t ji, Àzayì kudo Àzarɛ̀l,

¹⁴kudo ŋusùti àlɔ̀ ɖèka èwì vɔ ènyi (128), nyi yebe hɛ̃numewo. Woabe ŋùkɔ̀nɔ̀tɔa nyi Zabdìɛl, Hàgedolìm be èvi.

¹⁵Lè Levìwo dòmèa, mi la hlɛ̃ Sèmayà, Bunì be jìjimè to Hàcabìa ji, Àzrikàm kudo Hàcub,

¹⁶Càbetayì kudo Yòzabàd, nyi levìwo be èga kèwo jrànà mawuxɔa be ŋuti ɖo lè e godo;

¹⁷Màtanìa, Àsaf be jìjimè to Zabdì ku Mikà ji. E ye tona kàfu be èhàwo lè kuefã be gàmè. Bàcbukìa, kè nyi Màtanìa be nɔ̀vi ɖèkaa, kpe na ɖo e ŋuti kudo Abdà, Yedutùn be jìjimè to Galàl ku Càmuà ji.

¹⁸Levì kèwo ye lè èdù kɔ̀kɔ̀ɛa mèa nyi àmè àlɔ̀ èvè èkà èvè ci ènè (284).

¹⁹Àgboɖiatɔ Àkub, Talmɔ̀n, kudo woa nɔ̀viwo ye kpɔna àgboawo ji. Woa kpata be hɛ̃hlɛ̃ mè lè ŋusù èkà ènè ci woèvè (172).

²⁰Izràɛlvi kpɔ̀tɛawo, mawunɔwo ku Levìwo lè Yudà be èdùawo mè, lè woabe ècrɔ̃-nyigbãwo ji.

²¹Mawuxɔa be sumɔ̃viwo lè Yèruzàlɛm be èkɔ kè wo yɔna be Ɔfɛ̀l mè. Wo lè Sìha kudo Gìcepà be ŋusɛ̃ gɔ̃mè.

²²Levìwo be ŋùkɔ̀nɔ̀tɔ lè Yèruzàlɛm ye nyi Uzì, Mikà be jìjimèviwo to Màtanìa, Hàcabìa ku Banì ji; e nyi Àsaf be hɛ̃numèvi, kè mawuxɔa be èhàwo be jìji kpɔ ŋùkumè na a.

²³Èhàjìtɔwo lè èfìɔ be ɖoɖo tɔ̀xɛ ɖe kudo jàjràɖo na woabe gbè sia gbè be èdɔwo be wɔ̀wɔ gɔ̃mè.

²⁴Pètahìa, Mècezàbɛl be èvi so Yudà be èvi Zerà be hɛ̃nua nyi Izràɛlviwo be tèpenɔ̀tɔ lè Pɛrsìa be èfìɔsaa mè.

²⁵Yudà be xòmè ɖewo sò àxue kãkã ɖo àgblèwo ji, lè Kiriàt-Arbà kudo kɔpe kèwo gogo woa mè, lè Dibɔ̀n kudo kɔpe kèwo gogo woa mè, lè Yecàbsɛl kudo kɔpe kèwo gogo woa mè,

²⁶Yecùa, Mɔladà, Bɛt-Pelɛ̀t,

²⁷Hàsar-Cuàl, Bɛrcebà kudo kɔpe kèwo gogo woa,

²⁸Cìklag, Mèkonà kudo kɔpe kèwo gogo woa,

²⁹Ɛn-Rimɔ̀n, Sorà, Yàrmut,

³⁰Zànɔa, Adulàm kudo tèpe kèwo lè woa gbɔa, Làkis kudo yebe àgowo, Àzekà kudo kɔpe kèwo gogo èa. Wo lè Bɛrcebà lè àpùgo kudo Hinɔ̀m be bàlìa be dòdòmè lè èvègo.

³¹Bɛnyamìn be kɔ̀ta mèviwo sò kɔpe ɖo Gebà, Mikmas, Ayà, Betɛ̀l kudo kɔpe kèwo gogo woa mè,

³²Ànatɔt, Nɔ̀b, Ànanìa,

³³Hasɔ̀r, Ramà, Gìtayim,

³⁴Hadìd, Sèboyim, Nèbalat,

³⁵Lɔd, Onɔ̀ kudo àlɔ̀nudɔwɔ̀tɔwo be bàlìa mè.

³⁶Levì ɖewo hũ jo lè Yudà nyigbã ji yì Bɛnyamìn nyigbãa ji.