Read gen Nèhemìa 12 Bible Online

Nèhemìa 12 - gen bible

Nèhemìa 12

¹Hũbonɔwo kudo Levìwo kèwo trɔ gbɔ̀ so gàtɔnugbe ku Zòrobabɛ̀l, Cɛltìɛl be èvia, kudo Yecùa be nyikɔwo ye nyi ekè: Serayà, Imeyà, Ezrà,

²Àmarìa, Màluk, Hàtuc,

³Cèkanìa, Rehùm, Mèremɔ̀t,

⁴Idò, Gìnetɔyì, Abìa,

⁵Miamìn, Màadìa, Bilgà,

⁶Sèmayà, Yòyarìb, Yèdayà,

⁷Salù, Àmɔk, Hilkìa kudo Yèdayà. Lè Yecùa be hùenua, àmè kèawo kpata nyi xòmè ga na hũbonɔwo kudo Levìwo.

⁸Lè Levìawo dòmèa, mi la hlɛ̃ Yecùa, Bìnuì, Kadmìɛl, Cèrebìa, Yèhudà kudo Màtanìa. Màtanìa kudo nɔ̀viawo ye jìnà kàfù kafu be èhàwo.

⁹Levì Bàbukìa kudo Unì, jènà ŋùkɔ̀ wo, sɔ xɔ̀nà èhàa na wo.

¹⁰Yecùa ye jì Yòyakìm, Yòyakìm jì Eliacìb, Eliacìb jì Yòyadà

¹¹Yòyadà jì Yonatàn, eye Yòyatàn jì Yàduà.

¹²Lè Yòyakìm be hùenua, hũbonɔwo be xòmègawo nyi: Mèrayà na Serayà be xòmè, Hànanìa na Irmeyà be xòmè,

¹³Mèculàm na Ezrà be xòmè, Yohanàn na Àmarìa be xòmè,

¹⁴Yonatàn na Mèlikù be xòmè, Yozɛ̀f na Cèbanìa be xòmè,

¹⁵Adnà na Harìm be xòmè, Hɛlcàyì na Mèrayɔ̀t be xòmè,

¹⁶Zakarìa na Idò be xòmè, Mèculàm na Gìnetɔ̀n be xòmè,

¹⁷Zikrì na Abìa,[3] na Mìniamìn be xòmè, Pìtayì na Mɔ̀adìa be xòmè,

¹⁸Càmuà na Bilgà be xòmè, Yonatàn na Sèmayà be xòmè,

¹⁹Màtenàyì na Yòyarìb be xòmè, Uzì na Yèdayà be xòmè,

²⁰Càlayì na Sàlayì be xòmè, Ebɛ̀r na Àmos be xòmè,

²¹Hàcabìa na Hilkìa be xòmè kudo Netanèl na Yèdayà be xòmèa.

²²Lè Eliacìb, Yòyadà, Yohanàn ku Yàduà, hũbonɔ gãwo be hùenua, wo ŋlɔ̀ levìwo be xòmègawo be nyikɔ sìgbè lekè wo wɔ̀ na hũbonɔwo nène dàɖɛ kaka va ɖo Pɛrsìa be èfìɔ Darìo be gàmè.

²³Levìwo be xòmègawo be nyikɔ gbà lè èxotùnya be xoma a mè. Vɔ̀a, ekèa lè va sɛ̃ ɖo Eliacìb be èvi Yohanàn be hùenu kpò.

²⁴Levìwo be xòmèga kèawo: Hàcabìa, Cèrebìa kudo Yecùa kè nyi Kadmìɛl be èvia wo ye la nɔ̀ woa nɔ̀viwo be ŋùkumè sɔ sumɔ lè hasòsoe mè, sɔ zɔ̃ ɖo Mawu be àmè David be ɖoɖo ji.

²⁵Àgboɖiatɔwo: Màtanìa, Bàcbukìa, Obadìa, Mèculàm, Talmɔ̀n kudo Acùb; woabe èdɔ ye nyi be woa nɔ kpɔ ènuwlape kèwo lè mawuxɔa be àgboa gbɔa ji.

²⁶Wo wɔ̀ woabe èdɔa lè Yòyakìm, Yecùa be èvi, Yòsadàk be tɔgbeyɔvia be hùenu, wàlɛbɛ kè Nèhemìa nyi èdùjiɖùtɔ eye Esdràs nyi hũbonɔ ku ènuŋlɔ̀tɔa.

²⁷Wàlɛbɛ kè wo wu Yèruzàlɛm be èglìkpoa be èdɔa nua, wo yɔ levìwo so àfi sia àfi kè wo lèa na àzã gã ɖe be ɖùɖu sɔ kpe èglìkpaa. Èhà viviwo kudo èhàjìnu vòvòvò sìgbè gàkokoe, kàsãŋùgu ku èzèwo nène ɖì ku jìjɔɛ kudo àkpedodo.

²⁸Èhàjìtɔwo so Yèruzàlɛm be kɔpewo mè àlo so Nètofà va bɔ̀.

²⁹Èbuwo cã so Bɛt-Gilgàl, lè Gebà kudo Azmàvɛt be àgowo ji va. Ɖo èhàjìtɔwo yì sò kɔpe ɖo Yèruzàlɛm be àgowo ji pòhla.

³⁰Hũbonɔ kudo levìwo ɖè woa ɖokoe ɖovò eye wo biɔ dùkɔ̃a cã be bèa wɔ̀ nènea ke. Eye wo kɔ̀ àgboawo ku èdùa be èglìkpa ŋuti.

³¹Mù na Yudà be ègawo lia èglìkpa ji. Mù na wo wɔ̀ èhàjìha èvè. Àkpa cucugbãa zɔ̃ tùtà ɖùsi mè lè èglìkpaa ji lè yì kɔkɔli be àgboa gbɔ lɔ̀ge.

³²Hòcayà kudo Yudà be ègawo be àkpa ɖèka le zɔ̃ lè èhàjihawo be ŋùgbedòmè.

³³Lè woa yomè a, Àzarìa, Ezrà, Mèculàm,

³⁴Yèhudà, Bɛnyamìn, Sèmayà kudo Irmeyà.

³⁵E yomè a, hũbonɔ kèwo hɛ̃nà èkpɛ̃a, Zakarìa Àsaf be jìjimè to Zàkur, Mìkayà, Màtanìa, Sèmayà ku Yonatàn ji.

³⁶E ye kudo yebe ŋutimewo, Sèmayà, Àzarɛ̀l, Mìlalàyì, Gìlalàyì, Maayì, Netanèl, Yèhudà kudo Hànanì kplɔ̀ wo do. Wo hɛ̃nà Mawu be àmè David be èhàjìnuwo.

³⁷Wàlɛbɛ kè wo ɖo èsìdo be àgboa gbɔa, wo ɖo David be èdù be èkpoa nu eye wo lia e ji. Funua wo le kpɔ David be fìɔsaa mè ɖoɖa eye wo zɔ̃ yì èsìwo be ègboa gbɔ, lè èdùa be èwèzɛ̃pe.

³⁸Èhàjìha èvègɔ̃a zɔ̃ yì èmìɔ̃ mè. Mù kplɔ̀ ɛ̀ do kudo dùkɔ̃a be àkpa ɖèka to èglìkpaa ji. Mi yì to èzògbɛ̀dɛwo be tawàa gbɔ, eye mi zɔ̃ yì fikè èglìkpaa yì kèkè lèa;

³⁹mi gbà zɔ̃ to Efràyim be àgbo, Yècanà be àgbo kudo tɔ̀mèlãwo be àgboa tamè. Kè mi to Hànanèl ku Mɛ̀a be tawà tamèa, mi to ègbɔwo be àgboa ŋuti. Eye mi yì nɔ̀tè ɖo ènujikpɔtɔwo be àgboa nu.

⁴⁰Èhàjìha èvèawo va nɔ̀tè ɖo Mawu be àxuea be ŋùkɔ̀. Nyè cã mù nɔ̀tè sìgbè kòjoɖotɔ kèwo kplɔ̀ mù do a nène.

⁴¹Hũbonɔ Èliakim, Màaseyà, Mìniamìn, Mìkayà, Ɛlyòhenayì, Zakarìa kudo Hànanìa le ku èkpɛ̃wo.

⁴²Màaseyà, Sèmayà, Elazà, Uzì, Yohanàn, Malkìa, Elàm kudo Ezɛ̀r cã lè funua. Ìzrahìa lè kplɔ̀ èhàjìtɔ kèwo le jì èhàa.

⁴³Gbè ŋua gbèa, wo wɔ̀ vɔsa sùgbɔ lè jìjɔɛ kpɔkpɔ tɔ̀xɛ ɖe mè. Nyàwoa, Mawu sɔ jìjɔɛ gã ɖe do yebe dùkɔ̃a dòmè. Nyɔ̃nù kudo ɖèviwo kpɔ jìjɔɛ lè Yèruzàlɛm kaka yì àzɔ̀ge boo.

⁴⁴Gà ŋua mèa, wo biɔ so ŋusù ɖewo si be woa ɖia èxɔ̀ kèwo mè àtikusɛ̃sɛ̃ cucugbãawo kudo àgblèmènukuwo be èwogɔ̃awo lèa. Ŋusù kèawo ye ɖo la ɖè ènunanawo be àkpa kè èsea biɔ be woa sɔ na hũbonɔwo ku Levìawo ɖovò. Àgblè kèwo trɔdo èdùa mè ye wo ɖè ènunana kèawo lè. Yudàviwo kpata ye kpɔ jìjɔɛ ɖo èdɔ kèwo hũbonɔ kudo levìwo le wɔ̀a ŋuti.

⁴⁵Wo wɔ̀nà sùmɔ̀ sumɔ dɔa ku lèlèɖì be vɔ̀sawo ɖodu kudo èhàjìtɔwo ku sumɔ̃viawo sɔ zɔ̃ ɖo èfìɔ David ku èvia Salomɔ̀n be ɖoɖowo ji.

⁴⁶So kaka David kudo hàsìnɔ̀ gã Àzaf be hùenua, èhàfiɔtɔwo ye kplɔ̀nà màmlã ku kàfù kafu be èhà kèwo wo jìnà na Mawu a.

⁴⁷Lè Zòrobabɛ̀l be hùenu, sìgbè Nèhemìa be hùenu ke nènea, Izràɛlviwo nana ènu kè hiã èhàjìtɔwo ku sumɔ̃viwo gbè sia gbè. Wo hɛ̃nà ènunanawo va nana levìwo eye Levìawo cã ɖènà àkpa kèwo nyi hũbonɔwo, Arɔ̀n be èviawo tɔ̀a sɔ yì nana wo.