Read gen Nèhemìa 13 Bible Online

Nèhemìa 13 - gen bible

Nèhemìa 13

¹Gbè ɖèka, lè hùenu ŋua kea, wàlɛbɛ kè wo le hlɛ̃ Mosè be xoma na dùkɔ̃a, wo ɖo fikè wo ŋlɔ̀ ɖo be Amɔ̀nvi kudo Mòabvi ɖekpe mu gbà ɖo àmè kèwo le sumɔ Mawu a dòmè gbèɖe ò.

²Ɖo sãa, wo mu xɔ̀ Izràɛlviwo kudo ènuɖùɖu ku èsì ò. Wu ekèa, Mòabviwo yì dà Bàlam be bèa va sɛ̃kpɛ̃ na Izràɛlviwo. Vɔ̀a, miabe Mawu a ŋutɔ trɔ kpɛ̃sɛ̃a sɔ wɔ̀ sìtu na mi.

³Wàlɛbɛ kè Izràɛlviwo sè ènyà kèa, wo ɖo è be yèwo la nyà àmèjrowo kpata lè yèwo dòmè.

⁴Lè hùenu ɖe va yìa, wo cã hũbonɔ Eliacìb ne bèa kpɔ mawuxɔa be èxɔ̀ kèwo mè wo lɔna ènuwo kɔ̀ ɖoa ji. Kè e nyi be e do xòmè kudo Tòbiyà,

⁵e sɔ èxɔ̀ gãa sɔ na ɛ̀. Èxɔ̀ kèa mè ye wo lɔna àgblèmènukuwo, lifi ku mawuxɔa be ènuzãzãwo, hũbonɔwo be ènu kèwo la nyi woa tɔ̀a, èlù, vɛ̃ yeye ku àmì be àkpa èwogɔ̃ kèwo nyi Levìwo, èhàjìtɔwo kudo àgboawo jikpɔtɔwo tɔ̀a ɖo.

⁶Wàlɛbɛ kè ènu kèawo le jɔ̀ a, nyè mu lè Yèruzàlɛm ò. Mù trɔ yì Babɛ̀l be èfìɔ Àrtazɛ̀rzɛs gbɔ lè yebe fìɔɖùɖu be èpè ègbã vɔ èvègɔ̃a (32) mè. Lè èpèa be vɔ̀vɔ nua, èfìɔa na mù ègbè

⁷ne ma trɔ gbɔ̀ va Yèruzàlɛm. Eye mù va kè ɖo ènu bàɖà kè Eliacìb wɔ̀a ŋuti. Ɖo e sɔ èxɔ̀ gã kè hũ ɖo mawuxɔa be xixenua, sɔ na Tòbiyà.

⁸Mù bijì ŋutɔ eye mù lɔ ènu kèwo kpata nyi Tòbiyà be ènuzãzã to lè èxɔ̀a mè.

⁹E yomè a, mù na wo kɔ̀ èxɔ̀a ŋuti eye wo gbà trɔ lɔ mawuxɔa be ènuzãzãwo, ènunanawo kudo lifi ɖo e mè.

¹⁰Mù sè cã be Levìwo mu gbà xɔ̀nà ènu kè ɖo la nyi woa tɔ̀a ò. Ènu kèa ŋuti ye Levì ku èhàjìtɔ kèwo wɔ̀nà sùmɔ̀ sumɔa wo si àmètɔ̀ àmètɔ̀ yì woabe àgblèwo ji.

¹¹Mù kã ŋùkumè na kòjoɖotɔ kèwo bònu kaka ye Mawu be àxuea ci puplua. E yomè a, mù trɔ bɔ̀ Levìawo kudo èhàjìtɔwo eye mù na wo trɔ tɔ woabe èdɔa ji.

¹²Yudàviwo gbà trɔ tɔ woabe èlù, vɛ̃ yeye kudo àmì be àkpa èwogɔ̃a sɔ sɔ va mawuxɔa mè, ɖo ɖoɖo a nu.

¹³Mù trɔ cã Sèlemìa, ènuŋlɔ̀tɔ Sadɔk kudo Levì Pèdayà, kèwo ŋuti Màtanìa ku Zàkur be èvi Hanàn bɔ̀ ɖoa. Àmèwo kpata kã ɖo woa ji. Woabe èdɔa ye nyi be woa nɔ mã ènuawo na woa nɔ̀viawo.

¹⁴Mawu nyè, ɖoŋùku ènu kè mù wɔ̀a ji! Mù gbà tutu ènu kè mù wɔ̀ lè ànùkua mè na mawuxɔa kudo sùmɔ̀ sumɔa be zɔ̃zɔ̃ suia ò.

¹⁵Lè hùe ŋua nua, mù kpɔ lè Yudà nyigbã jia, àmè le fiɔ̃ vɛ̃ lè sabat-zã gbè. Àmè buwo dro èlù, gbà do vɛ̃, vɛ̃ku, ègbo kudo ènu vòvòvòwo ɖo èsɔwo ji sɔ le yì Yèruzàlɛm. Mù kã ŋùkumè na wo lè sabat-zã gbè wàlɛbɛ kè wo le sà ènuawo.

¹⁶Wu ekèa, àmè ɖewo so Tirò va ci Yèruzàlɛm. Wo hɛ̃nà ètɔ̀mèlã kudo ènu buwo vana Yèruzàlɛm ku Yudà, lè sabat-zã gbè.

¹⁷Mù kã ŋùkumè na Yudà be cãmìwo gblɔ̃ be: “Mì le kpɔ ènu kè mì le gblea? Mì mu le kɔ̀ sabat-zãa ŋuti ò.

¹⁸Mìa tɔgbewo wɔ̀ ènu kèawo tututu eye Mawu hɛ̃ gbledo kɔ̀ ɖo woa ji, va jè mia kudo miabe èdùa ji. Eye mìabe bùbu mà do sabat-zãa ŋutia, la kpɔ̀tɔ̀ nɔ fɔ̃ Mawu be jìbibidãa ɖo Izràɛl ji.”

¹⁹Nène a ye mù na ègbè be woa nɔ tu Yèruzàlɛm be àgbowo lè fìɛ̃simè gbɔ̀xue jɛ̃gbɔ̃zã ne tɔ e ji. Eye wo la nɔ hũ àgboawo lè jɛ̃gbɔ̃zãa yomè. Mù ɖè èhadɔwɔ̀tɔ nyè ɖewo do funu, ne woa nɔ ɖia, ne ènusàsa ɖekpe mu gbà ɖo èdùa mè lè jɛ̃gbɔ̃zã gbè ò.

²⁰Ekèa na be ènusàtɔ ɖewo ci èglìkpaa gɔ̃mè dɔ̃ zè ɖèka ku zè èvè.

²¹Mù yì na wo ètoklã kèa be: “Nukɛ ŋuti ye mì le ci èglìkpa a gɔ̃mè dɔ̃ ɖo ò? Ne mì gbà wɔ̀ nène a, mù la le mì tu.” So gà ŋua mè a, wo mu gbà vana lè sabat-zã gbè ò.

²²Mù biɔ so Levìawo si be woa kɔ̀ woa ɖokoe ŋuti eye woa yì nɔ ɖia àgboawo, ne àmèwo ne do bùbu jɛ̃gbɔ̃zãa ŋuti. Mawu nyè, ɖoŋùku ènu kè mù wɔ̀a ji! Èwò kè wɔ̀nà àdɔ̀mè nyuɛ̃a, ku ŋuzĩzĩ na mù!

²³Lè hùe ŋua nua, mù kpɔ do jèsi be Izràɛlviwo ɖè Asdɔ̀d, Amɔ̀n àlo Mòab be nyɔ̃nùwo.

²⁴Woabe èvi sùgbɔ le do Asdɔ̀d be ègbè eye èbuwo le do ègbè kèa ku ègbè ŋua. Vɔ̀a, ɖekpe mu gbà lè woa dòmè kè nya Hebrùgbe dodo ò.

²⁵Mù kã ŋùkumè na wo, gbà sɛ̃kpɛ̃ na wo. Mù pò ŋusù ɖewo eye mù nyɔ̀ èɖà lè èta na èbuwo. E yomè a mù na wo kã àtãŋu lè Mawu be ŋùkɔ̀ be yèwo mu la gbà sɔ yèwo be nyɔ̃nùviwo na àsu àmèjrowo kaka la va yì ɖè woabe nyɔ̃nùviwo na yèwo be ɖèkajɛviwo ò.

²⁶Mù biɔ wo sè be: “Mu nyi ènu kèa ye kplɔ̀ Izràɛl be èfìɔ Salomɔ̀n do èvuɛ̃ mèa?” Lè dùkɔ̃wo kpata dòmèa, èfìɔ ɖe mu lè sɔ̀ kudo è ò. Mawu lɔ̃ ɛ̀, gbà ɖo è èfìɔ ɖo Izràɛl kpata ji. Co gãkea àmèjrovi nyɔ̃nùwo ye dɔ̃ ɛ̀ ɖo èvuɛ̃ mè.

²⁷Mi mu gbà ji la sè be mì gbà lè ànùkua mà-wɔ̀ gã kèa ji, sɔ yì le ɖè àmèjro nyɔ̃nùwo ò.

²⁸Eliacìb be tɔgbeyɔvi, Yòyadà be èvi ɖèka nyi Sànbàlat kè so Horɔ̀nìaa, be ètoyɔvi. Ekèa ŋuti ye mù nyà ɛ̀ to lè Yèruzàlɛm.

²⁹Mawu nyè, mù gbà ŋlɔ̀be lekè wo ɖìgbɔ àpo hũbonɔ be èdɔa kudo èzò kè wò ɖù kudo hũbonɔ ku Levìawo ò.

³⁰Mù kɔ̀ dùkɔ̃a ŋuti so ènu kè nyi èdùta be ènua gbɔ. Mù trɔ na ŋusɛ̃ ɖoɖo kèwo ji hũbonɔ ku Levìwo ɖo la zɔ̃ ɖoa.

³¹Mù gbà wɔ̀ nènea ke na ànakè kèwo wo ɖo la nɔ na a kudo àgblèmènukuwo be cucugbãawo be nana. Mawu nyè, ɖoŋùku ji nyè eye wòa kplɔ̀ mù ku àpo àdɔ̀mè nyuɛ̃a.