Read gen Nèhemìa 2 Bible Online

Nèhemìa 2 - gen bible

Nèhemìa 2

¹Lè èfìɔ Àrtazɛ̀rzɛs be fìɔɖùɖu be èpè èwìgɔ̃a mè, lè Nisàn[1] be wètria be ŋùkèkè cucugbã gbèa, wàlɛbɛ kè èfìɔa lè yebe ènuɖùkplɔ̃ ŋutia, mù sɔ vɛ̃a ne ma kù ì na ɛ̀. Mù nɔ̀ ŋuzĩzĩ mè, ènu kè mu jɔ̀ ɖo ji nyè kpɔ lè yebe ŋùkumè ò.

²Ekèa na be èfìɔa biɔ mù sè be: “Nukɛ le wɔ̀ wò ò? Wò mu le jèdɔ̀ ò ɖe! Nukɛ ye le cage wò leke ò?” Vɔ̃vɔ̃ gã ɖe jè e ji nyè.

³Eye mù teŋu va gblɔ̃ na èfìɔa be: “Èfìɔ bùbùtɔ ne nɔ̀ àgbè tɛ̀gbɛ̀! Àpe ŋùkumè la ci siayi ɖo tɔgbe nyèwo be èdùa trɔ zũ èglìkpo ɖèɖe eye wo tɔzò yebe àgboawo fiɔ̃.

⁴Èfìɔ biɔ mù sè be: “Nukɛ ye wò le ji so gbɔ nyè ò?” Troloa, mù fãkue na Mawu kè lè jiŋùkusia,

⁵eye mù gblɔ̃ na èfìɔa be: “Ne èfìɔ lɔ̃ be yèa wɔ̀ ènyuɛ̃ na yèbe sumɔ̃via, ne na mù èmɔ̃ ne ma yì Yudà nyigbã ji, lè fikè wo ɖì tɔgbe nyèwo ɖoa, ne ma teŋu trɔ yì tù èdùa.”

⁶Èfìɔ kè be àhàdamè ye èfìɔsrɔ̃ lèa, gbà biɔ mù sè be: “Ŋùkèkè nenè ye èmɔ̃zɔ̃zɔ̃ wòa la wɔ̀ ò? Eye gàkɛmè ye wò la trɔ gbɔ̀ ò?” Èfìɔa lɔ̃ fàa be yèa ɖè èmɔ̃ na mù eye mù gblɔ̃ gàkèmè mù la trɔ gbɔ̀a, na ɛ̀.

⁷Mù gblɔ̃ sɔ kpe è be: “Mù ɖèkuku be èfìɔ ne ŋlɔ̀ xoma do àsi na mù. Nènea mù la teŋu to ètɔ̀ gã Efratà be èwèɖoxɔ̀pe be àgowo ji bɔ̀bɔɛɖe eye èdùmègawo mu la gbà le mù ɖɛ kaka ma ɖo Yudà nyigbã ji ò.

⁸Eye mù gbà hiã xoma na èfìɔdua be àvewo jikpɔtɔ Àsaf, ne bèa teŋu na mù àti kèwo hiã na àgbògbò be èxɔ̀ kè lè mawuxɔa gbɔa be àgbowo, na èglìkpoawo kudo àxue kè mè mù la nɔ̀a.” Èfìɔa na mù xoma kèawo kpata, ɖo Mawu wɔ̀ ènyuɛ̃ na mù.

⁹Mù yì èdùmègawo gbɔ lè ètɔ̀ gã Efratà be èwèɖoxɔ̀pe be àgowo ji, sɔ èfìɔ be xoma a na wo. Èfìɔa ɖo yebe àhùagawo kudo èsɔkùtɔwo bɔ̀ ɖo ŋuti nyè sɔ kplɔ̀ mù.

¹⁰Wàlɛbɛ kè Sambàlatè so Hòronì kudo Tòbiyà, yebe àlòdotɔ so Amɔ̀n, wo sè be mù gbãnàa; wo bijì be leke mù la teŋu va do àlɔ̀ Izràɛlviwo ɖo maa!

¹¹Mù va yì ɖo Yèruzàlɛm. Mù nɔ̀ funu ŋùkèkè ètɔ̃.

¹²Nyè mu gblɔ̃ ènu kè Mawu nyè do àsi na mù na èdùa ò. Mù so èzã mè, kudo àmè viɖewo; eye mù sɔ èsɔàkɛtɛ kè mù le zãa kpò.

¹³Èzã mè ye mù to lè èdùa mè, to bàlìmè be àgboa eye mù tùtà èhɔ̃ drìbà be èsìdo ku kɔkɔli be àgboa gbɔ, lè àpùgo be èwèɖoxɔ̀pe lɔ̀ge. Mù sãŋùku to Yèruzàlɛm be èglìkpowo ji eye mù kpɔ be àfi sùgbɔ gbã, gbà wua èzò fiɔ̃ yebe àgboawo.

¹⁴Mù kpɔ̀tɔ̀ zɔ̃ èmɔ̃a, tùtà èsìdoa be àgbo ku èfìɔ be tãkua gbɔ, lè èdùa be àpùgo be èwèzɛ̃pe lɔ̀ge. Èmɔa yì ènunyàtɔwo be èsìdoa to, vɔ̀ funua hùe na èsɔàkɛtɛ nyèa bèa to.

¹⁵Ekèa na be mù trɔ to Kedrɔ̀n be bàlì viɖe mè sɔ yì èdɔ nyèa ji. E yomè a, mù trɔ eye mù to bàlìa be àgboa gbɔ̀.

¹⁶Èdùa be àgbònùglawo mu nya ènu kè mù le wɔ̀a kaka la va nya fikè mù lèa ò. Ɖo gà ŋua mèa, nyè mu kpɔ gblɔ̃ ènyà ɖekpe na Yudàviwo, àlo hũbonɔwo, cãmìawo, kaka va jè èdɔwɔ̀tɔawo ji ò.

¹⁷Mù gblɔ̃ na wo be: “Mì kpɔ gbledo kè jɔ̀ ɖo mia jia: Yèruzàlɛm trɔ zũ èglìkpo ɖèɖe. Wo tɔzò yebe àgboawo! Mì na mia trɔ ɖo Yèruzàlɛm be èglìawo, ne mia tɔtè ègbɔɖìamè be nɔ̀nɔmè kèa.”

¹⁸Mù gblɔ̃ lekè Mawu be àsi nɔ̀ ji nyè ɖoa, kudo ènyà kè èfìɔa gblɔ̃ na mù a, na wo. Wo do àpa zè ɖèka gblɔ̃ be: “Mì sitè kplà! Mì na mia trɔ tù èdùa!” Eye wo do ŋusɛ̃ woa ɖokoe na èdɔ kèa be wɔ̀wɔ.

¹⁹Wàlɛbɛ kè Sambàlatè kè so Hòronì, yebe àlɔ̀dotɔ Tobìa so Amɔ̀n kudo Gecɛ̀m Màlɛ̀a, wo sè ènyàa, wo tɔ mi kòko. Wo le biɔ mi sè ku ŋùku tɛ̃tɛ̃ be: “Nukɛ ye mì le wɔ̀ ò? Mì le ji la sitè ɖo èfìɔa ŋutia?”

²⁰Mù na wo gblɔ̃ ènyà kèa na wo be: “Jiŋùkusi be Mawu a ŋutɔ ye la na mi jiɖùɖu. Yebe sumɔ̃viwo ye mi nyi. Mi la sitè sɔ trɔ tù èdùa. Mì mu ɖo ènu ɖe lè èdù kèa mè kaka la va ɖo èdɔ do àsi ɖe ò. Wo mu la yɔ mìabe nyikɔ cã gbèɖe lè Yèruzàlɛm ò.