Read gen Nèhemìa 3 Bible Online

Nèhemìa 3 - gen bible

Nèhemìa 3

¹Hũbonɔ gã Eliacìb tɔ èdɔa ji kudo ye tɔ̀ hũbonɔawo. Wo trɔ tù àlɛ̃awo be àgboa ɖodu. Kè wo kpe è vɔ̀a, wo do yebe hɔ̃trutiawo. Wo trɔ jrà èglìawo ɖo kaka yì kàvètakpo be tawà gbɔ. Kè wo kpe è vɔ̀a, wo gbà yì èdɔa ji kaka yì kɔ̀ ɖo Hànanèl be tawà gbɔ.

²Yerikòviwo le wɔ̀ èdɔ lè woabe àhàdamè. Imrì be èvi Zàkur cã le wɔ̀ èdɔ lè àkpa ɖèka na wo.

³Eye Senàviwo trɔ tù tɔ̀mèlã be àgboa, wàlɛbɛ kè wo ɖo èxɔ̀tiawo vɔ̀a, wo ɖo àgboa be àti kèwo ŋuti be la nɔ̀a, ku yebe àtikpoawo kudo lɔkè kèwo wo la sɔ nɔ tu ìa.

⁴Lè woabe àhàdamèa, Urìa be èvi Meremɔ̀t kè gbà nyi Hakɔ̀s be tɔgbeyɔvia, ku Berekìa be èvi Mèculàm, kè gbà nyi Mecezàbɛl be tɔgbeyɔvia, kudo Banà be èvi Sadɔk, wo le wɔ̀ èdɔ sɔ jrà ènuwo ɖo.

⁵Tɛkòa be dùmètɔ, kèwo be àgbònùglawo gbe jè ŋùkɔ̀ be yèwo mu la nɔ̀ èdɔjikpɔtɔawo be gɔ̃mè òa, cã le wɔ̀ èdɔ lè àhàdamè na wo.

⁶Eye Pàseà be èvi Yoyàda kudo Besodìa be èvi Mèculàm trɔ tù Yècanà be àgboa. Wo ɖo yebe hɔ̃truti ku èxɔ̀tiwo, bɔ̀ ɖo àtikpoawo kudo lɔkè kèwo wo la sɔ nɔ tu ìa ŋuti.

⁷Lè woabe àhàdamèa, Melatìa so Gabaɔ̀n, Yadɔ̀n so Merònɔt kudo ŋusù sùgbɔ so Gabaɔ̀n ku Mispà lè Efratà be èwèɖoxɔ̀pe be àgoa jikpɔtɔa be nyikɔ mè.

⁸Lè àzɔ̀ge na woa, Hàrayà be èvi Uzìɛl kè nyi gàkpowo be àɖàŋùdɔwɔ̀tɔ, kudo Hànanìa, àmì hɔ̃hɔ̃ɛ wɔ̀tɔa. Wo yì vɔ̀ woabe èdɔa lè Yèruzàlɛm, wàlɛbɛ kè wo ɖo tèpe kè ye èglìkpa kèkè lè gloa.

⁹Lè woabe àkpa ɖèkaa, Hur be èvi Refayà kè nyi Yèruzàlɛm be èflìamè be àkpa ɖèka jikpɔtɔa, le wɔ̀ èdɔ lè funu.

¹⁰Lè ŋùkɔ̀ viɖea, Hàrumaf be èvi, Yèdayà le jrà èglìa be àkpa kè jè ŋùkɔ̀ yebe àxuea ɖo. Eye lè yebe àhàda mèa, wo la kpɔ Hàcabneyà be èvi Hàtuc.

¹¹Harìm be èvi, Malkìa ku Pahàt-Mòab be èvi, Hàcub le wɔ̀ èdɔ lè tèpe kè èzògbɛ̀dɛwo be tawàa lèa.

¹²Lè woa gbɔa, Hàlohɛ̀c be èvi, Sàlum kè gbà nyi Yèruzàlɛm be àkpa ɖèka ji be ègaa, le wɔ̀ èdɔ eye èvia nyɔ̃nùwo le do è àlɔ̀.

¹³Hanɔ̀n ku Zànɔa be kɔmètɔwo trɔ jrà bàlìa be àgboa ɖo. Wo tù ì eye wo ɖo yebe hɔ̃truti ku èxɔ̀tiwo, bɔ̀ ɖo àtikpoawo kudo lɔkè kèwo wo la sɔ nɔ tu ìa ŋuti. Wu ekèa, wo gbà jrà èglìkpoa ɖo, metà àlɔ̀ àtɔ̃, kaka kɔ̀ ɖo kɔkɔli be àgboa nu.

¹⁴Rekab be èvi, Malkìa kè gbà nyi Bɛt-Kerɛ̀m be àgoa jikpɔtɔa, jrà kɔkɔli be àgboa ɖo. Wo ɖo yebe hɔ̃truti ku èxɔ̀tiwo, bɔ̀ ɖo àtikpoawo kudo lɔkè kèwo wo la sɔ nɔ tu ìa ŋuti.

¹⁵Kol-Hɔzè be èvi, Càlun kè gbà nyi Mispà be àgoa be ègaa, jrà èsìdoa be àgboa ɖo. E tù ì, gba ɛ̀, ɖo yebe hɔ̃truti ku èxɔ̀tiwo, bɔ̀ ɖo àtikpoawo kudo lɔkè kèwo wo la sɔ nɔ tu ìa ŋuti. Sɔ kpea, e gbà jrà àmèdɔ̃dɔ̃ be èsìdoa be èglìkpo kè lè èfìɔ be àbɔ a gbɔa ɖo. E wɔ̀ ekèa kaka ɖo àcrɔkpe kè so David be èdùa mèa gbɔ.

¹⁶Lè yebe àhàdamèa, Àzbuk be èvi Nèhemìa kè gbà nyi Bɛt-Sur be àgoa jikpɔtɔa, wɔ̀ èdɔ kaka yì David be èyɔ̀do, yì tãku kè wo kùa kudo èfìɔa be ɖiatɔwo be àxuea gbɔ.

¹⁷Lè yebe àhàdamèa, levìwo yì èdɔa ji. Wo nyi Banì be èvi, Rehùm, Hàcabìa kè nyi Kèyilà be àgoa jikpɔtɔa.

¹⁸Lè yebe àhàdamèa, woa nɔ̀viwo: Henadàd be èvi, Bàvayì àlo Bìnuyì kè gbà nyi Keyìla be àgoa jikpɔtɔa;

¹⁹eye Yosùa be èvi, Ezɛ̀r kè gbà nyi Mispà jikpɔtɔ cã jrà àkpa bu ɖo. E jè ŋùkɔ̀ èkpo kè gogo àhùawɔ̀nuwo be èxɔ̀, fikè èglìkpa ɖo kɔ̃nà lèa.

²⁰Lè yebe àkpa ɖèkaa, Zàbayì be èvi Bàruk jrà àkpa ɖèka ɖo kudo vevedonu. E wɔ̀ èdɔ lè èglìkpaa be kɔ̃nà ji sɔ yì hũbonɔ gã Èlyàcib be àxuea gbɔ.

²¹Yì ŋùkɔ̀a, Urìa be èvi Mèremɔ̀t, Hakɔ̀s be tɔgbeyɔvia wɔ̀ èdɔ lè tèpe kè lè Èlyàcib be àxuea be gɔ̃mè jèje va ɖo àxuea be èmɔ̃nu.

²²Lè woabe ŋùkɔ̀a, hũbonɔ kèwo so Yèruzàlɛm be àgowo jia, le wɔ̀ èdɔ lè funu.

²³Lè woabe àhàdamèa, Bɛnyamìn ku Hàcub le jrà tèpe kè jè ŋùkɔ̀ woabe àxuea ɖo, wàlɛbɛ kè Màseyà be èvi, Àzarìa, Ànanìa be tɔgbeyɔvia le wɔ̀ èdɔ lè yebe àxuea be àkpa ɖèkaa.

²⁴Lè yebe àhàdamèa, Henadàd be èvi Bìnuyì le jrà àkpa bu ɖo. So kaka Àzarìa be àxuea gbɔ sɔ yì èglìkpaa be kɔ̃nà mè.

²⁵Uzàyì be èvi Pàlal le wɔ̀ èdɔ lè èglìkpa be kɔ̃nàa kudo tawà gãa dòmè. Fikè jè ŋùkɔ̀ èfìɔsaa, lè èfìɔa be ɖiatɔwo be gbàjà jia gbɔ. Lè yebe àhàdamèa, Parɔ̀c be èvi Pèdayà,

²⁶kudo mawuxɔa be sumɔ̃vi, kèwo lè Ɔfɛ̀l be èkɔa mèa, le wɔ̀ èdɔ lè funu, kaka yì tawà kè lè kɔ̃nà mèa gbɔ lè èsìwo be àgboa gbɔ lè èwèzɛ̃pe.

²⁷Tekoa be èdùmètɔwo le wɔ̀ èdɔ lè àkpa kè kplɔ̀ ɛ̀ do a, lè tawà gã kè lè kɔ̃nà mèa kudo Ɔfɛ̀l be èglìa dòmè.

²⁸So èsɔwo be àgboa gbɔa, hũbonɔwo le wɔ̀ èdɔ lè funu. Woa dòmètɔ ɖe sia ɖe le jrà tèpe kè jè ŋùkɔ̀ yebe àxuea ɖo.

²⁹Eye sɔ yì ŋùkɔ̀ na woa, Imèr be èvi Sadɔk cã le jrà tèpe kè jè ŋùkɔ̀ yebe àxuea ɖo. Lè yebe àkpa ɖèkaa, Cèkanìa be èvi Sèmayà kè nyi èwèzɛ̃pe be àgboa jikpɔtɔa, le wɔ̀ èdɔ lè funu.

³⁰Sèlemìa be èvi Hànanìa kudo Hanɔ̀n kè nyi Sàlaf be èvi àdɛ̃gɔ̃a le wɔ̀ èdɔ lè àkpa kè bɔ̀ ɖo e ŋutia. Lè yebe àhàda mèa, Berekìa be èvi Mèculàm le wɔ̀ èdɔ lè tèpe kè jè ŋùkɔ̀ fikè be nɔ̀nàa.

³¹Lè àhàdamè na ɛ̀a, gosìmitì Malkìa le wɔ̀ èdɔ so funu kaka va ɖo sumɔ̃viwo ku àsìsàtɔwo be àxue, kè lè Mifcàd be àgboa, gbà yì àlìdoe kè lè kɔ̃nàa jia gbɔ.

³²Gosìmitì kpɔ̀tɛawo kudo àsìsàtɔwo le wɔ̀ èdɔ lè tèpe kpɔ̀tɛ kè lè àlìdoea kudo àlɛ̃wo be àgboa dòmèa.

³³Wàlɛbɛ kè Sànbàlat sè be mi le trɔ le jrà èglìkpoa ɖoa, e bijì gbà do àdɔ̀mèze ŋutɔ. Eye e tɔ mi kòko.

³⁴E ɖè è gblɔ̃ lè yebe èxlɔ̃wo kudo Sàmarìa be àhùawɔ̀tɔwo gbɔ be: “Nukɛ ŋutɔ ye Yudàtɔ, ŋuzĩzĩme kèawo le wɔ̀ ò? Wo la teŋu wu woabe èdɔa nu kaka la va wɔ̀ vɔsa na Mawu a? Wo la teŋu vɔ̀ èdɔa nu gbè ɖèkaa? Wo la teŋu trɔ na àgbè èkpe kèwo hũhũ eye èzò fiɔ̃awoa?”

³⁵Àmɔ̀n-vi Tòbiyà, lè àhàdamè na ɛ̀, le gblɔ̃ be: “Èglìkpo kɛ ye wo trɔ le tù ò! Ne wɛ̀tɛ̀klɛ̀ ɖèka pɛɛ lia èjia, èglìkpoa kpata la mù gblò!”

³⁶Eye mù do àpa gblɔ̃ be: “Tɔhonɔ̀ ɖo èto lekè miabe èkɛ̃tɔwo le kò mi ɖa! Trɔ èzũ kè wo le zũ na mia kɔ̀ ɖo woa ji. Sɔ wo do àsi na gbegble ne wo a kplɔ̀ wo àhùale yì àmèjro-nyigbã ji!

³⁷Mù gbà sɔ woabe èvuɛ̃ kè a, kè wo ò. Mù gbà cɔ̃ ènu àgɔ̀jèje a ji na wo ò. Wo zũ mi, ɖo mi trɔ le jrà èglìkpo a ɖo.”

³⁸Nène a ye mi wɔ̀ èdɔ sɔ trɔ tù èglìkpoa. Mi trɔ jrà ɛ̀ ɖo kaka ɖo yebe jiyìyi mè be mamã mè, trɔdo. Nyàwoa, àmè sia àmè wɔ̀ èdɔ kudo èjì mè kɔ̀kɔ̀ɛ.