Read gen Nèhemìa 5 Bible Online

Nèhemìa 5 - gen bible

Nèhemìa 5

¹Gbè ɖèkaa, dùkɔ̃a mèvi ŋusù ku nyɔ̃nùwo le dohùɛ do nɔ̀vi Yudàvi ɖewo.

²Àmè ɖewo le gblɔ̃ be: “Mia ku miabe èvi ŋusùwo kudo nyɔ̃nùviwo sùgbɔ. Mi jro la xɔ̀ èlù kè la sù na miabe ɖùɖu sɔ nɔ̀ àgbèa.”

³Àmè buwo gblɔ̃ be: “Mi sɔ miabe àgblèwo, vɛ̃-gblewo kaka jè miabe àxuewo cã ji sɔ do àwòba gbɔ̀xue teŋu kpɔ èlù xɔ̀ lè àdɔ̀toto be gàmè.”

⁴Àmè buwo cã gbà gblɔ̃ be: “Ne mia teŋu tu èfìɔ be èfɛ̃a, mi dona ègà ɖo miabe àgblèwo kudo vɛ̃-gblewo nu.

⁵Co gãkea, kɔ̀ta ɖèka kpò mi nyi! Miabe èviwo mu tovò na woa tɔ̀awo ò; mi trɔ miabe èviwo wɔ̀ kluvi, èɖewo zũ kluvi xoxo. Ènu ɖekpe mu gbà lè mia si ò. Miabe àgblèwo ku vɛ̃-gblewo trɔ àmè buwo tɔ̀ keŋu-keŋu.”

⁶Wàlɛbɛ kè mù sè ènyà kudo èhùɛdodo kèawoa, mù ci bàɖà ku àdɔ̀mèze.

⁷Mù ji be ma kã ŋùkumè na cãmì kudo kòjoɖotɔawo. Mù gblɔ̃ na wo be: “Nukɛ ye nyi ekèa! Mì tɛ àgbã ɖo mìa nɔ̀vi kèawo jia!” Eye mù na wo yɔ bɔ̀bɔ tɔ̀xɛ ɖe.

⁸Mù gblɔ̃ na wo be: “Mi sɔ mɔnukpɔkpɔ kè nɔ̀ mia sia, trɔ sɔ xɔ̀ plè mia nɔ̀vi kèwo wo sà na àmèjrowo sìgbè kluviwo nène. Vɔ̀ mìa ya, mì sà mìa ŋutɔ mìa nɔ̀viwo. Mìa ŋutɔ mìa nɔ̀viwo ke mì gbà sà nɔ̀vi kèawo na!” Wo mu teŋu kpɔ ènyà ɖe gblɔ̃ ò. Wo bɔ̀nu kpoo.

⁹Mù trɔ xɔ̀ ènyàa gblɔ̃ be: “Mì mu wɔ̀ ènu nyuɛ̃ ɖe ò! Mì ɖo la do bùbu Mawu ŋuti ne dùkɔ̃ kèwo nyi miabe kɛ̃tɔwo mu gbà zũ mi ò.

¹⁰Nyè ŋutɔ cã, mù do ègà kudo èlù, sìgbè nɔ̀vi nyèwo ku sumɔ̃vi nyèwo ke nène. Mì na mia sɔ ènu kèwo mi ɖo la trɔ xɔ̀a, kè wo fàa.

¹¹Egbè ŋutɔ cã, mì trɔ àmè kèwo ɖù èfɛ̃ do mìabe àgblèwo, vɛ̃-gblewo, àmìtiwo kudo àxuewo na wo. Mì tàsi àlè kèwo mì ɖo la xɔ̀ so ègà, èlù, vɛ̃ kudo àmì kèwo mì do na àmèwoa ŋutia, na wo.”

¹²Wo ɖo e ŋuti be: “Mi la wɔ̀ ɖo ènu kè wò gblɔ̃a ji. Mi la trɔ sɔ ènu kèwo mi xɔ̀a na wo eye mi mu la gbà biɔ àlè ɖekpe ò.” Nène a ye mù yɔ hũbonɔwo bɔ̀ ne woa nyi ɖaseɖùtɔwo eye mù biɔ so cãmìwo kudo àgbònùglawo si be woa trɔ kã àtãŋu kèa be yèwo la wɔ̀ ɖo ènu sia ènu ji.

¹³Eye mù hũhũ àwù nyèa be ètomè gblɔ̃ be: “Àmè kè la nɔ̀ mìa dòmè eye mu la wɔ̀ ɖo ènyà kè mì gblɔ̃a ji òa, nène pɛpɛ ye Mawu la hũhũ ye cã yeŋu! Ne ɖè è jo lè yebe àxue kudo àdɔ̀kùnuwo gbɔ, ne bèa jè èhiã mè!” Eye àmèha ɖo e ŋuti be: “Ɛ̃ɛ, ne va e mè nènea tututu!” Woa kpata jì kafu-ha na Tɔhonɔ̀, eye, e yomè a, wo wɔ̀ ɖo fìãfiãa ji.

¹⁴So gbè kè gbè ye èfìɔ sɔ mù ɖo Yudà nyigbã jikpɔtɔ, so èpè èwìgɔ̃a va ɖo èpè gbãvɔ èvègɔ̃a mè lè èfìɔ Àrtazɛ̀rzɛs be fìɔɖùɖu mèa, èpè woèvè sɔ̃ŋua, nyè kudo nɔ̀vi nyèwo dòmètɔ ɖe mu zã èdùjikpɔkpɔ be àlè ɖekpe ò.

¹⁵Èdùjikpɔtɔ kèwo jè ŋùkɔ̀ na mù a, tɛna àmè ɖo ànyi. Wo xɔ̀nà ènuɖùɖu kudo klòsalò ga èkà ɖèka lè woa si. Woabe cãmìwo cã tanafu dùkɔ̃a. Vɔ̀ ènyè ya, to Mawu be vɔ̃vɔ̃ mèa, nyè mu wɔ̀ ènu kèa be èɖe ku wo ò.

¹⁶Lè ekèa tèpea, mù wɔ̀ èdɔ kudo wo sɔ jrà èglìkpoa ɖo. Nyè mu plè ànyigbã hokpɔ̀cɔ̀ ò eye èdɔwɔ̀tɔ nyè ɖe cã mu wɔ̀ ɛ̀ ò.

¹⁷Gãkea, mù nɔ̀nà ènuɖùkplɔ̃ nyèa ŋuti kudo kòjoɖotɔ èkà ètɔ̃ takpo ci èwo (150), sɔ kpe àmè jro kèwo sona dùkɔ̃ kèwo trɔdoa mèa.

¹⁸Gbè sia gbèa, wo jrànà ènyì ɖèka, ègbɔ àdɛ̃ kudo kòklowo ɖo na mù. Eye ŋùkèkè èwo ɖe sia ɖe a, wo hɛ̃nà vɛ̃ kplikpã gãgãwo va na mù. Co nyè mu biɔ ènu kè ɖo la nyi èdùjikpɔtɔ tɔ̀a gbèɖe ò. Ɖo èglìkpoa be jàjràɖoa nyi àgbã kpɛ̃kpɛ̃ ɖe lè dùkɔ̃a ji vɔ̀.

¹⁹“Oò Tɔhonɔ̀, ɖo ŋùku ènu kèwo mù wɔ̀ na dùkɔ̃ kèa ne wòa wɔ̀ nyuɛ̃ na mù.”