Read gen Nèhemìa 7 Bible Online

Nèhemìa 7 - gen bible

Nèhemìa 7

¹Wàlɛbɛ kè èglìkpoa be èdɔwo wu e nu eye wo do àgbotiawo vɔ̀a, mù sɔ àgbonuɖiatɔwo, èhàjìtɔwo kudo levìwo ɖo woabe èdɔ do àsiwo nu.

²Mù sɔ Yeruzàlɛm jikpɔkpɔ do àsi na nɔ̀vi nyè Hànanì kudo àhùaga Hànanìa. Àmè kèa nyi àmè kè ŋuti wo la dojì ɖoa. E dona bùbu Mawu ŋuti wu àmè sùgbɔ.

³Mù gblɔ̃ na wo be: “Wo mu la hũ èdùa be àgbowo ne dɔ̃ŋùkusua mu kpɔ to ò, eye lè wètrɔ mèa, wo la tu wo, la do ègà woa mè gbɔ̀xue àgboɖiatɔwo la jo. Yèruzàlɛmviwo la ɖo èzã ɖiɖia. Ne àmè ɖewo lè tèpe vòvòvòwoa, àmè buwo la nɔ ɖia woabe àxuewo xa.”

⁴Yèruzàlɛm be èdùa le kèkè ɖoji, vɔ̀a èdùamèviwo mu sùgbɔ ò. Wo mu kpɔ trɔ tù àxue ɖewo ŋutɔ hàɖe ò.

⁵Mawu nyè na mù susu be ma bɔ̀ cãmìwo, kòjoɖotɔwo kudo dùkɔ̃amèviwo ne woa hlɛ̃ wo. Mù kè ɖo xoma kè mè wo ŋlɔ̀ àmè kèwo trɔ gbɔ̀ cucugbã va Yèruzàlɛm ku Yudà be nyikɔ ɖoa eye mù kpɔ ènu kèawo:

⁶Babɛ̀l be èfìɔ Nèbukàdnezà na wo kplɔ̀ Yudàviwo yì Babɛ̀l nyigbã ji. Àmè sùgbɔ trɔ gbɔ̀ va Yèruzàlɛm ku Yudà. Àmè sia àmè trɔ yì yebe èdù mè

⁷Wo trɔ gbɔ̀ kudo Zòrobabɛ̀l, Yecùa, Nèhemìa, Àzarìa, Ràamìa, Nàhamanì, Màrdokài, Bìlecàn, Mìsperɛ̀t, Bigvài, Nèhum kudo Baanà. Woabe nyikɔ ku hɛ̃hlɛ̃mè na Izràɛlviwo be èhasòso ɖe sia ɖe:

⁸Ŋusù hotu ɖèka èkà ènè ci woèvè (2172) so Parɔ̀c be hɛ̃nu;

⁹Ŋusù àlɔ̀ ètɔ̃ èkà takpo ci woèvè (372) so Cèfatìa be hɛ̃nu;

¹⁰Ŋusù àlɔ̀ àdɛ̃ èkà ci woèvè (652) so Arà be hɛ̃nu;

¹¹Ŋusù hotu ɖèka àlɔ̀ ènyi ci woènyi (2818) so Pat-Mòab be hɛ̃nu, kè nyi Yecùa ku Yoab be jìjimèvi;

¹²Ŋusù àkpe ɖèka èkà àdɛ̃ ci woènè (1254) so Elàm be hɛ̃nu;

¹³Ŋusù àlɔ̀ ènyi èkà ci àtɔ̃ (845) so Zàtu be hɛ̃nu;

¹⁴Ŋusù àlɔ̀ adrɛ̃ èkà takpo (760) so Zàkayì be hɛ̃nu;

¹⁵Ŋusù àlɔ̀ àdɛ̃ èkà ci ènyi (648) so Bìnuyì be hɛ̃nu;

¹⁶Ŋusù àlɔ̀ àdɛ̃ èwì vɔ ènyi (628) so Bèbayì be hɛ̃nu;

¹⁷Ŋusù hotu ɖèka àlɔ̀ ètɔ̃ èwì vɔ èvè (2322) so Azgàd be hɛ̃nu;

¹⁸Ŋusù àlɔ̀ àdɛ̃ èkà takpo ci adrɛ̃ (667) so Àdonikàm be hɛ̃nu;

¹⁹Ŋusù hotu ɖèka èkà takpo ci adrɛ̃ (2067) so Bìgvayì be hɛ̃nu;

²⁰Ŋusù àlɔ̀ àdɛ̃ èkà ci woeàtɔ̃ (655) so Adìn be hɛ̃nu;

²¹Ŋusù èkà èvè ci woènyi (98) so Àtɛr be hɛ̃nu, Àtɛr kè nyi Hizkìa be jìjimèvia;

²²Ŋusù àlɔ̀ ètɔ̃ èwì vɔ ènyi (328) so Hacùm be hɛ̃nu;

²³Ŋusù àlɔ̀ ètɔ̃ èwì vɔ ènè (324) so Bèsayì be hɛ̃nu;

²⁴Ŋusù àlɔ̀ ɖèka ci woèvè (112) so Harìf be hɛ̃nu;

²⁵Ŋusù èkà èvè ci woeàtɔ̃ (95) so Gabaɔ̀n be kɔpea mè;

²⁶Ŋusù àlɔ̀ ɖèka èkà èvè ci ènyi (188) so Bɛtlɛhɛ̀m ku Nètofà be kɔpewo mè;

²⁷Ŋusù èkà ètɔ̃ ci ènyi (128) so Ànatɔt be kɔpea mè;

²⁸Ŋusù èkà ci èvè (42) so Bɛt-Àzmavɛ̀t be kɔpea mè;

²⁹Ŋusù àlɔ̀ adrɛ̃ èkà ci ètɔ̃ (743) so Kirìat-Yeàrim, Kèfirà ku Berɔ̀t be kɔpewo mè;

³⁰Ŋusù àlɔ̀ àdɛ̃ èwì vɔ ɖèka (621) so Ramà ku Gebà be kɔpewo mè;

³¹Ŋusù èkà ètɔ̃ ci èvè (122) so Mikmas be kɔpea mè;

³²Ŋusù èkà ètɔ̃ ci ètɔ̃ (123) so Betɛ̀l ku Ayì be kɔpewo mè;

³³Ŋusù èkà ci woèvè (52) so Nebò be kɔpe èvègɔ̃a mè;

³⁴Ŋusù àkpe ɖèka èkà àdɛ̃ ci woènè (1254) so Elàm be hɛ̃nu bu mè;

³⁵Ŋusù àlɔ̀ ètɔ̃ ci èwì (320) so Harìm be hɛ̃nu;

³⁶Ŋusù àlɔ̀ ètɔ̃ èkà ci àtɔ̃ (345) so Yerikò be èdùa mè;

³⁷Ŋusù àlɔ̀ adrɛ̃ ci èwì vɔ ɖèka (721) so Lɔd, Hadìd ku Onɔ̀ be kɔpewo mè;

³⁸Ŋusù àkpe ètɔ̃ àlɔ̀ àsiɖèkɛ ci ègbã (3930) so Senàa be èdùa mè.

³⁹Hũbonɔwo be hasòsoewo nyi: Ŋusù àlɔ̀ àsiɖèkɛ èkà takpo ci woètɔ̃ (973) so Yèdayà be hɛ̃nu kè jɔ̀ so Yecùa be xòmè mèa;

⁴⁰Ŋusù àkpe ɖèka èkà ci woèvè (1052) so Imèr be hɛ̃nu;

⁴¹Ŋusù àkpe ɖèka èkà àdɛ̃ ci adrɛ̃ (1247) so Pàcehùr be hɛ̃nu;

⁴²Ŋusù àkpe ɖèka ci woeadrɛ̃ (1017) so Harìm be hɛ̃nu.

⁴³Levìwo be hasòsoewo nyi: Ŋusù èkà takpo ci woènè (74) so Yecùa be hɛ̃nu na Kadmìɛl, Bìnuyì ku Hòdevà

⁴⁴Mawuxɔa mè be èhàjìtɔwo be hasòsoea nyi: Ŋusù èkà ètɔ̃ ci èwì vɔ ènyi (148) so Àsaf be hɛ̃nu mè

⁴⁵Àgboɖiatɔwo be hasòsoea nyi: Ŋusù èkà ètɔ̃ ci woènyi (138) so Sàlum, Àtɛr, Talmɔ̀n, Acùb, Hàtità kudo Còbayì be hɛ̃nuwo mè.

⁴⁶Mawuxɔa be sumɔ̃viwo so xòmè vòvò kèawo mè: Sihà, Hàsufà, Tàbaɔt,

⁴⁷Kerɔ̀s, Sià, Padɔ̀n,

⁴⁸Lèbanà, Hàgabà, Calmayì,

⁴⁹Hanàn, Gidɛ̀l, Gàhar,

⁵⁰Reayà, Rɛsìn, Nèkodà,

⁵¹Gàzam, Uzà, Pàseà,

⁵²Bèsayì, Mɛ̀unìm, Nèfucesìm,

⁵³Bàcbuk, Hàcufà, Hàrur,

⁵⁴Bàslit, Mèhidà, Harcà,

⁵⁵Bàrkɔs, Sisrà, Temà,

⁵⁶Nesìa kudo Hàtifà.

⁵⁷Salomɔ̀n be sumɔ̃viwo so xòmè vòvò kèawo mè: Sòtayì, Sòferɛ̀t, Pèridà,

⁵⁸Yalà, Darcɔ̀n, Gidɛ̀l,

⁵⁹Cèfatìa, Hatìl, Pokerɛ̀t-Hàsebaìm kudo Amɔ̀n.

⁶⁰Salomɔ̀n be sumɔ̃viwo kudo mawuxɔa be sumɔ̃viwo nyi ŋusù àlɔ̀ ètɔ̃ èkà èvè ci woèvè (392).

⁶¹Àmè kèwo trɔ gbɔ̀ so Tɛl-Mɛ̀la, tɛl-Harcà, Kèrub-Adɔ̀n kudo Imèr vaa, wo mu teŋu na ɖoŋuti àdodoewo ne woa sɔ nya woabe xòmèwo ò. Ekèa mu teŋu ɖèfiɔ be wo nyi Izràɛlviwo ò:

⁶²Wo nyi àmè àlɔ̀ àdɛ̃ èkà ci èvè (642) so Dèlayà, Tòbiyà kudo Nèkodà be xòmèwo mè.

⁶³Hũbonɔ ɖewo cã lè nɔ̀nɔmè kèa mè. Wo nyi Hòbayà, Hakɔ̀s kudo Bàrzilaì be jìjimèviwo. Wo yɔna ŋusù kèa ya be Bàrzilaì, ɖo e ɖè Bàrzilaì nyɔ̃nùvi so Gilead.

⁶⁴Wo ji xoma kèwo mè wo ŋlɔ̀ woa tɔgbewo be nyikɔ ɖoa, vɔ̀a wo mu kpɔ wo ò. Ekèa na be wo xɔ̀ hũbonɔ be èdɔa lè woa si.

⁶⁵Èdùjikpɔtɔa do èse na wo be wo mu gbà ɖù ènu kè wo sɔ savɔ na Mawu ɖèka kpò, kaka na gà kè mè ye hũbonɔ ɖe la teŋu xɔ̀ ɖoŋuti ɖe so woa ŋuti lè Urìm ku Tumìm be zãzã mè ò.

⁶⁶Izràɛlvi kèwo trɔ gbɔ̀ so gàtɔnugbea be hɛ̃hlɛ̃ mè nyi àmè hotu èwìvɔ ɖèka èkà àsiɖèkɛ.

⁶⁷Lè woa dòmèa, sumɔ̃vi ŋusù kudo nyɔ̃nùwo be hɛ̃hlɛ̃ mè le nyi àkpe adrɛ̃ àlɔ̀ ètɔ̃ gbã vɔ adrɛ̃. Èhàjìtɔ nyɔ̃nù kudo ŋusùwo nyi àlɔ̀ èvè èkà ci àtɔ̃,

⁶⁸kudo èsɔ èkpotɔnɔ̀ àlɔ̀ ènè gbã vɔ àtɔ̃ kudo èsɔ àkɛtɛ hotu ètɔ̃ àlɔ̀ adrɛ̃ takpo ŋuti.

⁶⁹Xòmè ga ɖewo na ènu ne woa sɔ trɔ tù mawuxɔa. Èdùjikpɔtɔa na sìka ga àkpe ɖèka, kogò èkà ci èwo, hũbonɔ be àwù ègbã kudo klòsalò kìlo àlɔ̀ èvè ku èfã ne woa nɔ zã lè mawuxɔa mè.

⁷⁰Xòmè gawo na sìka ga hotu èwo kudo klòsalò kìlo àkpe ɖèka èkà èvè takpo.

⁷¹Izràɛlvi kpɔ̀tɛawo na sìka ga hotu èwo kudo klòsalò kìlo àkpe ɖèka gbàkudo hũbonɔwo be àwù èkà takpo ci adrɛ̃.

⁷²Hũbonɔwo, Levìwo, èdùgboɖiatɔwo, èhàjìtɔwo, àmè gbalo ɖewo sìgbè mawuxɔa be sumɔ̃viwo kudo Izràɛlvi kpɔ̀tɛawo yì sò nɔ̀pe ɖo woabe èdù vòvòwo mè. Lè èpèa be wètri adrɛ̃gɔ̃ a mèa, Izràɛlviwo kpata lè woabe èdùwo mè.