Read gen Nèhemìa 8 Bible Online

Nèhemìa 8 - gen bible

Nèhemìa 8

¹Dùkɔ̃a kpata ɖo ègbè èdu va bɔ̀ lè Yèruzàlɛm, lè èsìwo be àgboa be ŋùkɔ̀. Wo gblɔ̃ na Ɛsdràs kè nyi hũbonɔ ku ènuŋlɔ̀tɔa be ne yì sɔ Mosè be èse xoma a va. Èse kè Tɔhonɔ̀ sɔ do àsi na Izràɛl be dùkɔ̃a.

²Hũbonɔ Ɛsdràs hɛ̃ èsea va àmèhaa kpata be ŋùkɔ̀, lè ŋusù mè, lè nyɔ̃nù mè kudo àmè kèwo kpata la teŋu gbe sè ènyà kèwo wo le gblɔ̃a. Ekèa jɔ̀ lè wètri adrɛ̃gɔ̃ a be ŋùkèkè cucugbãa gbè.

³So ŋùdekɛ̃nyɛ kaka va ɖo gà woèvè mè ye Ɛsdràs nɔ̀tè lè èsìwo be àgboa be ŋùkɔ̀, le hlɛ̃ xoma a ku ègbè lelele. Àmèha kpata ɖo èto sè hɛ̃hlɛ̃awo.

⁴Ɛsdràs, ènuŋlɔ̀tɔa nɔ̀tè lè àgbà vi kè wo wɔ̀ kudo gboŋugblo na ɖoɖo ŋua ji. Lè yebe ɖùsi mèa, Màtia, Cemà, Ànayà, Urìa, Hilkìa kudo Màseyà wo ye lè funua, eye lè yebe èmìɔ̃ mèa, Pèdayà, Mikàɛl, Malkìa, Hacùm, Hàcebàdanà, Zakarìa kudo Mèculàm wo lè funu.

⁵Ɛsdràs hũ xoma lè dùkɔ̃a kpata be ŋùkumè, ɖo e lia àgbà vi yìjia ji lè ŋùkɔ̀ na dùkɔ̃a. Eye wàlɛbɛ kè e hũ xoma a, dùkɔ̃a kpata sitè, nɔ̀tè.

⁶Eye Ɛsdràs doàkpe na Tɔhonɔ̀, Mawu gãa, eye dùkɔ̃a kɔ àsiwo yì ji, ɖo e ŋuti gblɔ̃ be: “Àmèn!” “Àmèn!” Eye wo yì èklò ji, do ènu gũ lè Tɔhonɔ̀ be ŋùkɔ̀.

⁷Wo trɔ fɔ̃ eye Levìwo: Yecùa, Banì, Cèrebìa, Yamìn, Àkub, Sàbtayì, Hodìa, Màseyà, Kèlità, Àzarìa, Yòzabàd, Hanàn kudo Pelayà tɔ èsea fiɔfiɔ dùkɔ̃a.

⁸Wo le hlɛ̃ Mawu be èse xoma a, gbà ɖènà e gɔ̃mè ne dùkɔ̃a ne nya ènu kè wo ŋlɔ̀a.

⁹Èdùjikpɔtɔ Nèhemìa, hũbonɔ ku ènuŋlɔ̀tɔ Ɛsdràs, kudo Levì kèwo le fiɔnua, gblɔ̃ na dùkɔ̃a be: “Ŋùkèkè kèa lè tɔ̀xɛ na Tɔhonɔ̀, mìabe Mawu a! Mu lè be mìa ci ŋuzĩzĩ mè nɔ lòfũ ò!” Ɖo dùkɔ̃a le fã àvi wàlɛbɛ kè wo le hlɛ̃ èsea be ènyàwo.

¹⁰Ɛsdràs gblɔ̃ sɔ kpe è be: “Mì yì mìabe nɔ̀pewo ne mìa ɖùnu tɔ̀xɛ. Mì nù àhà viviwo eye mì ma ènu kè lè mìa sia ku àmè kèwo mu ɖo ènu ɖe òa. Ɖo ŋùkèkè kèa lè tɔ̀xɛ na miabe Tɔhonɔ̀. Mì mu gbà nɔ̀ ŋuzĩzĩ mè ò! Jìjɔɛ kè so Tɔhonɔ̀ gbɔa, ne do mì ŋusɛ̃.”

¹¹Levìwo ɖo àsi àkɔ na dùkɔ̃a kpata gblɔ̃ be: “Mì tɔtè àvifãfã! Ŋùkèkè kèa Tɔhonɔ̀ tɔ̀ ye. Mì mu gbà nɔ̀ ŋuzĩzĩ mè ò!”

¹²Àmèwo kpata trɔ yì woabe àxuewo mè. Wo ɖù ènu gbà nù ènu. Wo ma woabe ènuɖùɖuwo kudo àmè kèwo mu ɖo òa. Ɖo wo sè ènyà kè wo gblɔ̃ na woa mè.

¹³Ŋùkèkè èvègɔ̃a gbèa, dùkɔ̃a be xòmè gawo, hũbonɔwo kudo Levìwo bɔ̀ ɖo Ɛsdràs, ènuŋlɔ̀tɔa ŋuti. Wo le ji la sè èsea be nufiɔfiɔwo gɔ̃mè.

¹⁴Wo kpɔ ɛ̀ do jèsi lè èse kè Tɔhonɔ̀ sɔ na wo to Mosè jia be Izràɛlviwo ɖo la nɔ̀ bègloewo mè lè wètri adrɛ̃gɔ̃ a be bègloe be àzãɖùɖu mè.

¹⁵Wo ɖo la nya eye wo la gblɔ̃ ɛ̀ lè èdùwo kpata kudo Yèruzàlɛm be mì to yì èto ji ne mìa yì ji àmìtiwo, ègbemè be àmìtiwo, mirtàwo, detiwo kudo àti kèwo vũa be àlɔ̀zɛ̃wo, kudo dekpawo va sɔ tù bègloewo, sìgbè àlekè wo ŋlɔ̀a nène.

¹⁶Nène a ye Izràɛlviwo yì ji àti be àlɔ̀zɛ̃wo ne woa sɔ wɔ̀ bègloewo. Àmè ɖewo wɔ̀ ɛ̀ ɖo woabe èxɔ̀wo tamè lè tèpe gbàjà. Àmè buwo wɔ̀ ɛ̀ ɖo xixenu, àmè ɖewo yì wɔ̀ ɛ̀ ɖo mawuxɔa be gbàjà ji. Àmè buwo cã yì wɔ̀ ɛ̀ ɖo èsìwo be àgboa ku Efràyim be àgboa be ŋùkɔ̀.

¹⁷Àmè kèwo kpata trɔ gbɔ̀ so gàtɔnugbe eye wo bɔ̀ ɖo funua, wɔ̀ bègloewo eye wo nɔ̀ woa mè. Jìjɔɛ kpɔkpɔ be ŋùkèkè gã ɖe ye be nyi, ɖo Izràɛlviwo mu gbà ɖù àzã kèa kpɔ so kaka Nun be èvi Yecùa be hùenu yomè ò.

¹⁸Wo hlɛ̃nà èse xoma a, gbè sia gbè, so ŋùkèkè cucugbã yì ŋùkèkè kpɔ̀tɛa. Àzãa xɔ̀ ŋùkèkè adrɛ̃ eye e vɔ̀ lè ŋùkèkè ènyigɔ̃a gbè kudo gòdo gã ɖe, sɔ zɔ̃ ɖo ɖoɖo a ji.