Read gen Nèhemìa 9 Bible Online

Nèhemìa 9 - gen bible

Nèhemìa 9

¹Lè wètria be ŋùkèkè wìvɔ ènèa gbèa, Izràɛlviwo bɔ̀ ɖodu na nubabla. Wo do èfũlòlo be àwùwo, gbà blìbɔ̀ àfi mè.

²Wo nɔ̀ àzɔ̀ge na àmèjrowo eye wo hũ woa ŋutɔ ku woa tɔgbe be vuɛ̃wo mè.

³E yomè a, wo sitè, nɔ̀tè gà pòpo ètɔ̃ sɔ sè wo hlɛ̃ èse xoma a. Eye gà pòpo ètɔ̃ sɔ̃ŋu ye wo blìbɔ̀ sɔ hũ woabe vuɛ̃wo mè lè Tɔhonɔ̀ be ŋùkɔ̀ gbà biɔ sɔsɔkè.

⁴Yecùa, Banì, Kadmìɛl, Cèbanìa, Bunì, Cèrebìa, Banì kudo Kènanì yì Levìwo be tèpe yìjia eye wo do àpa ɖoɖa Tɔhonɔ̀, woabe Mawu a.

⁵E yomè a, Levìwo: Yecùa, Kadmìɛl, Banì, Hàcabneyà, Cèrebìa, Hodìa, Cèbanì kudo Pètahìa do àpa na èdùa be: “Mì sitè! Mì doàkpe na Tɔhonɔ̀ mìabe Mawu a! Mì nɔ doàkpe na ɛ̀ wè sia wè!” “Tɔhonɔ̀, àmè sia àmè ne lòlò àpo gogo nyikɔ, kè to ènunyawo kpata ŋutia, ne woa kafu wò!

⁶Èwò ɖèka ye nyi Tɔhonɔ̀! Wò wɔ̀ jiŋùkusi kudo ènu kèwo lè e mèa, ànyigbã kudo ènu kèwo keŋu trɔdo èa. Wò wɔ̀ àpù kudo ènu kèwo lè e mèa. Wò na àgbè ènuɖoɖowo kpata, eye wètriviwo le dotagũ lè ŋùkɔ̀ na wò.

⁷Tɔhonɔ̀ Mawu, wò ŋutɔ ye cã Abràm. Wò na be hũ jo lè Ur, lè Babɛ̀l nyigbã ji eye wò ɖo nyikɔ na ɛ̀ be Abràham.

⁸Wò kpɔ ɛ̀ be e ɖo èjì wɔ̀ ànùkua; eye wò wɔ̀ zòɖùɖu kudo è. Wò fìã àjɔ̀gbè na ɛ̀ be yè la sɔ Kanànviwo, Hitìviwo, Amɔrìviwo, Perizìviwo, Yebuzìviwo kudo Gìrgacìviwo be ànyigbã na ɛ̀. Wò wɔ̀ ɖo fìãfiã wòa ji, ɖo wò ŋutɔ cã wò lè jɔ̀jɔɛ.

⁹Wò kpɔ mia tɔgbewo be ègbɔɖìamèwo lè Ejiptè. Wò sè woabe àpa dodowo eye wò va do wo àlɔ̀ lè keti be àpùa to.

¹⁰Wò wɔ̀ jèsìdo ku ŋùdãnuwo ɖo Ejiptè be èfìɔa ŋuti, ɖo yebe àxuedo a kudo Ejiptèviwo kpata ŋuti. Nyàwoa, wò nya lekè wo wɔ̀ ku mia tɔgbewo. Wò na gogo nyikɔ wò kè gbà kpɔ̀tɔ̀ ɖo ŋusɛ̃ kaka na egbèa.

¹¹Wò mã àpùa ɖo èvè eye Izràɛlviwo zɔ̃ ànyigbã pupui ji to emè. Vɔ̀ àmè kèwo tĩ woa yomè a, wò tùtù wo ɖo àvlìmè wo nyrɔ̃ sìgbè lekè èkpe nyrɔ̃nà ɖo èsì gbɛ̀lu mèa nène.

¹²Ŋùkèkè mèa, wò kplɔ̀ wo kudo lilikpo babla eye lè èzã mèa, èzò babla xɔ̀nà ŋùgbe sɔ kɔ̀nà èmɔ̃a na wo.

¹³Wò ɖì so jiŋùkusi va Sinaì be ètoa ji: sɔ va pò nupo na wo. Wò sɔ ɖoɖo jɔ̀jɔɛwo ku nyàwo be ènufiɔfiɔwo kudo èsewo gbàkudo ègbè do àsi àdodoewo na wo.

¹⁴Wò na wo nya àpo jɛ̃gbɔ̃zã kɔ̀kɔ̀ɛa eye wò sɔ ègbèɖèɖewo, ɖoɖowo kudo èse na wo to àpo sumɔ̃vi Mosè ji.

¹⁵Wàlɛbɛ kè àdɔ̀ wù woa, wò na wo kpɔ̃nɔ so èji, wò na èsì to so àkpã mè, wàlɛbɛ kè èsìkɔ tì woa. Wò gblɔ̃ na wo be woa yì xɔ̀ ànyigbã kè be àjɔ̀gbè wò fìã na woa.

¹⁶Vɔ̀a, woa kudo mia tɔwo trì èjì gbà jèagla. Wo mu wɔ̀ ɖo ègbè do àsi wòawo ji ò.

¹⁷Wo mu sè ètonu ò wo ŋlɔ̀be ènu jɔ̀ àsu kèwo wò wɔ̀ na woa. Wo tu woabe èjì eye lè woabe àglajèje mèa, wo ji la trɔ yì kluvi nyinyi be bònu lè Ejiptè. Vɔ̀a, wò mu ɖè àsi lè woa ŋuti ò. Ɖo wò nyi ŋuzĩzĩkuku be Mawu, Mawu kè kpɔna domè, gbà ɖɔ ku àdɔ̀mè nyuɛ̃a. Kè hɛ̃nà àdòdò, gbà ɖɔ kudo lɔ̃lɔ̃ a.

¹⁸Wo wɔ̀ sìka nyìvi na woa ɖokoe eye wo gblɔ̃ be: “Kpɔɖa! Miabe Mawu kè kplɔ̀ mi to lè Ejiptè a ye kè!” Woabe àgɔ̀jèje kèa jiŋɔ.

¹⁹Co gãkea, lè àpo ŋuzĩzĩkuku gã mèa, wò mu gble wo ɖo zògbè ji ò: Lilikpo babla kè fiɔna wo èmɔ̃ lè ŋùkèkè mèa, mu dìdì lè woa gbɔ ò. Eye èzò bablaa cã mu gbe yebe èdɔ do àsia lè èzã mè ò.

²⁰Lè àpo àdɔ̀mè nyuɛ̃ mèa, wò na wo Gbɔ̃gbɔ̃ wòa ne woa nyanu. Wò na wo manà wo ɖù be sù wo kudo èsì ne woa nù.

²¹Wò kpɔ woa ji èpè èkà sɔ̃ŋu lè zògbèa jia, ènu ɖekpe mu hiã wo ò. Woabe àwùwo mu doxo ò eye woabe àfɔ̀wo cã mu tɛ̃ na wo ò.

²²Wò ɖè fìɔduwo ku dùkɔ̃wo do àsi na wo: Wo xɔ̀ ànyigbã kèwo trɔ do woa, Sihɔ̀n be ànyigbã kè ji Hɛcbɔ̀n ɖùfìɔ lèa kudo Ɔg nyigbã kè ji Bacàn ɖùfìɔ lèa.

²³Wò na woabe èviwo jì ɖoji fuu sìgbè jiŋùkusi be wètriviwo nène. Wò kplɔ̀ wo yì Kanàn nyigbã kè wò sɔ na woa tɔgbewo be woa yì xɔ̀a, ji.

²⁴Wo yì eye wo xɔ̀ ànyigbã kè wò sɔ ɖè na woa. Wò sɔ Kanànviwo do woabe ŋusɛ̃ gɔ̃mè eye wo ɖù woa ji. Dùkɔ̃ wòa wɔ̀ kudo dùkɔ̃ kèwo lè àgoa jia, sìgbè àlekè e jro a nène.

²⁵Wo yì xɔ̀ àgbògbò be èdùwo, ànyigbã nyuɛ̃wo, àxue kèwo ɖɔ kudo àdɔ̀kùnuwoa, èsìdo kèwo wo kù dà ɖɛ vɔ̀a, vɛ̃-gble ku àmìtiwo, àti sɛ̃kuwo gbãgbã. Wo ɖùnu ɖɔpò, doàmì, to àpo àdɔ̀mè nyuɛ̃ mè, wò nɔ̀ àgbè lè nyɔna tɔ̀xɛ mè.

²⁶Co gãkea, wo mu sètonu ò, wo jèagla do wò, eye wo trɔ ŋùgbe do èse wòa; Wo crɔ̃ gblɔ̃ɖɛtɔ wò kèwo le fiɔ wo èmɔ̃ ne woa trɔ gbɔ̀ va gbɔ wòa. Nène a ye woabe wɔ̀naa jiŋɔ yeŋu.

²⁷Ekèa ŋuti ye wò ɖè wo na kɛ̃tɔwo eye wo tɛ wo ɖo ànyi. Lè woabe gbledo mèa, wo do àpa yɔ wò, eye wò ɖo èto wo so jiŋùkusi. Lè àpo àdɔ̀mè nyuɛ̃ mèa, wò dɔ̃ àmèwo ɖoɖa wo eye wo yì hlùɛ̃ wo lè woabe kɛ̃tɔwo simè.

²⁸Kaka kè wo kpɔ vòvoa, wo gbà tɔ èvuɛ̃ wɔ̀wɔ ɖo ŋuti wò, eye wò gbà ɖè àsi lè woa ŋuti na woabe kɛ̃tɔwo. Nène a ye wo gbà trɔ do àpa na wò, eye so jiŋùkusia, wò gbà ɖo èto wo. Lè lɔ̃lɔ̃ wòa mèa, wò hlùɛ̃ wo gã sùgbɔ.

²⁹Wò fiɔ wo ne woa trɔ wɔ̀ ɖo èse wòa ji, gãke, kudo ègòyiyia, wo mu wɔ̀ ɖo àpo ègbè do àsiawo ji ò. Wo mu sètonu na ɖoɖo wòawo ò to e gbɔ be ɖoɖo kèawo nana àgbè àmè kèwo le wɔ̀ ɖo woa jia. Wo mu ji la sè e gɔ̃mè nène ò, Wo tu woabe èjì eye wo gbe ènugɔ̃mè sèse.

³⁰Wò hɛ̃ àdòdò ku wo èpè fuu gblɔ̃ɖɛtɔwo pò nupo na wo to àpo gbɔ̃gbɔ̃a ji, co wo mu sètonu ò. Nène a, wò gbà sɔ wo do àsi na dùkɔ̃ buwo.

³¹Co, to lɔ̃lɔ̃ wòa mèa, wò mu na wo crɔ̃ wo gbidi ò, eye wò mu ɖèkɔ̀ lè woa ŋuti ò, ɖo àdɔ̀mè nyuɛ̃ ku lɔ̃lɔ̃ be Mawu ye wò nyi.

³²Fifìa, miabe Mawu, ŋusɛ̃kpatatɔ kè jè na sisia, wò le wɔ̀ ànùkua na zòɖùɖu kè wò wɔ̀ kudo mia. Fifìa, le ŋùku ɖo gbledo kè jè mia jia, ŋuti so kaka Àsirìa be èfìɔwo ji va ɖo egbè. Àmèwo kpata sè vève, miawo, miabe èfìɔ ku ègawo, miabe hũbonɔ ku gblɔ̃ɖɛtɔwo, mia tɔgbewo ku dùkɔ̃a kpata.

³³Lè ènu kèwo kpata jɔ̀ ɖo mia jia mèa, wò ya wò wɔ̀ ɖo jɔ̀jɔɛ ku ànùkua wòa ji, vɔ̀ miawo ya, mi wɔ̀ ènu bàɖà.

³⁴Miabe èfìɔwo, ègawo, hũbonɔwo kudo tɔgbewo mu wɔ̀ ɖo èse wòa ji ò; wo ɖèkɔ̀ lè ègbè do àsi ku àfɔ̀ɖoàfɔ̀ji be ènyà kèwo wò gblɔ̃ na woa ŋuti.

³⁵Wò ɖɔ wo kudo nyɔnawo lè woabe èfìɔduwo mè. Wò ŋutɔ ye na wo ànyigbã nyuɛ̃wo, vɔ̀a, wo mu trɔ lè ènu bàɖà wɔ̀wɔ yomè ò.

³⁶Eye egbèa, mi trɔ kluviwo! Mi nyi kluvi lè ànyigbã kè wò sɔ na mia tɔwo ne woa ɖù yebe kusɛ̃sɛ̃woa ji.

³⁷Yebe kusɛ̃sɛ̃ nyuɛ̃wo trɔ èfìɔ kèwo wò ɖè mi do àsi naawo tɔ̀, ɖo miabe vuɛ̃wo ŋuti. Wo le wɔ̀ kudo mia ku miabe èlãwo sìgbè àlekè wo jia nène. Mi ci àmè tɛtɛɖo ànyi gã ɖe mè.