Read gen TOBÌ 1 Bible Online

TOBÌ 1 - gen bible

TOBÌ 1

¹Èxotùtu xoma so Tobì, Tobìɛl be èvi, Ànanìɛl be èvi, Adùɛl be èvi, Gàbaɛl be èvi, Ràfaɛl be èvi, Ragùɛl be èvia, Arìɛl be jìjimèvia, so Neftalì be kɔ̀taa mè,

²e va nyi àhùale ci ègbe lè Sàlmànasà, Àsirìa be èfìɔ hùenu, so Tisbè lè Kidìo Neftalì nyigbã ji be àpùgo, lè Gàlìlea àvego tɔ̀a, lè Àsɛr be tamè, lè èwèɖoxɔ̀pe godoa, lè Fogɔ̀r be àvego.

³Ènyè, Tobì, mù zɔ̃ lè nyàwo be èmɔwo ji eye mù wɔ̀ ɖo àpo èdɔ nyuɛ̃wo ji lè àgbè nyèa kpata mè; mù na ènu sùgbɔ fuu nɔvi nyèwo ku dùkɔ̃wo, àmè kèwo wo le kudo mù yì gàtɔnugbe lè Nìnivè, lè Àsirìa nyigbãa ji.

⁴Kè mù kpɔ̀tɔ̀ lè Izràɛl, èdù nyèa mè lè àpe ɖèkajɛ mèa, Neftalì, tɔgbe nyè be kɔ̀ta bliboa klã lè David be àxuedoa ku Yeruzàlɛm ŋuti. E nyi èdù cãcã lè Izràɛl be kɔ̀tawo kpata dòmè ne bèa nyi vɔsawɔ̀wɔ tèpe, fikè wo tù mawuxɔ, Mawu be nɔ̀pea ɖo na jìjimèwo kaka yì.

⁵Nɔ̀vi nyèwo kpata ku Neftalì tɔgbe nyè be àxuedoa, wo wɔ̀nà vɔsawo lè Gàlileà be ètowo kpata ji, na ènyìvi-vòdu kè Yerobòam, Izràɛl be èfìɔa li lè Dan nyigbã jia.

⁶Eji ejia, ènyè ɖèka pɛɛ kpò ye yìnà Yeruzàlɛm lè àzãɖùɖuwo be hùenu, zɔ̃ ɖo ɖoɖo màkponu kè èsea wɔ̀ ɖɛ na Izràɛl bliboa. Mù yìnà Yeruzàlɛm ku ènuku ɖèɖe cucugbãtɔ̀, èlã ŋùkɔ̀gbeviwo, èlãha be èwogɔ̃a ku àlɛ̃nɔwo be gbɔfu cucugbãtɔ̀wo.

⁷Eye mù sɔ wo nana hũbonɔwo, Arɔ̀n be èviwo ne vɔsakpe be èdɔwo. Nèneke mù nana èlì, vɛ̃, òlivàku, àtɔkliko, ègbò ku àtikusɛ̃sɛ̃ buwo be ènu èwogɔ̃a Levìvi kèwo lè sùmɔ̀ sumɔdɔa nu lè Yeruzàlɛm. Mù ɖènà ènu èwogɔ̃ èvègɔ̃a lè ègà zãzãa ji eye mù sɔ ɛ̀ yì zãna èpè sia èpè lè Yeruzàlɛm.

⁸Mù nana èwogɔ̃ be ètɔ̃gɔ̃a cɔɛviwo, àsukusiwo, ku àmèjro kèwo lè Izràɛlviwo dòmèa. Èpè ètɔ̃ sia èpè ètɔ̃a, mù hɛ̃nà ɛ̀ yì kã àgbãmè na wo, eye mi ɖùnà ɛ̀ zɔ̃ ɖo ɖoɖo kèwo wo ɖo ɖɛ lè Mɔsè be Èsea mè gbà zɔ̃ ɖo màma nyè Dèborà, ètɔ nyè Ànanìɛl be ènɔ̀ be ètopòɖowo ji; ɖo ènu kè ŋutia ètɔ nyè ku vɔ̀ gble mù ɖɛ cɔɛvi.

⁹Kè mù sĩ ɖo ŋusù mèa, mù ɖè nyɔnù lè mia tɔwo be jìjimèviwo dòmè eye mù jì èvi so e gbɔ, ɖo nyikɔ na ɛ̀ be Tobìa.

¹⁰Kè wo kplɔ̀ àmèwo yì gàtɔnugbe lè Àsirìa e yomèa, wàlɛbɛ kè nyè ŋutɔ cã mù nyi àhùalea, mù va Nìnivè. Nɔ̀vi nyèwo kpata ku àpe kɔ̀tamèviwo ɖùnà màxɔ̀sètɔwo be ènuɖùɖu,

¹¹vɔ̀a nyè ya, mù lena ɖokoe nyè ɖɛ be nyè mu gbà ɖù màxɔ̀sètɔwo be ènuɖùɖu ò.

¹²Ekè mù nɔ̀ ègbèji na àpe Mawua,

¹³Èjihũitɔa na be mù kpɔ ɖàgbè lè Sàlmànasà gbɔ eye mù plènà ènu kè be hiãwo kpata na ɛ̀.

¹⁴Mù yìnà Medì fikè mù plènà àsì na ɛ̀ lèa, kaka na yebe èku gbè. Eŋua-ŋti ye mù sɔ klòsalòga talɛ̃tò èwo kɔ̀ ɖo kòtòkuwo mè sɔ dà ɖo Gàbàɛl, Gabrì be nɔ̀via gbɔ lè Medì be èdùa mè.

¹⁵Kè Sàlmànasà kua, èvia Sènakerìb ɖùfìɔ lè e tèpe. Medì be èmɔwo mu gbà ɖo kãkãɖoji leke ò, eye nyè mu gbà teŋu le yì èdù kèa mè ò.

¹⁶Lè Sàlmànasà be hùenua, mù kɔ̀nà àdɔ̀mè sugbɔ ɖo àpe kɔ̀tamèviwo ŋuti.

¹⁷Mù mana kpɔ̃nɔ nyèa ku àmè kèwo àdɔ̀ le wùa kudo àwù na àmè kèwo lè àmaa. Ne mù kpɔ àpe èdùmèviwo be àmèkpòti kè wo sɔ dãŋùgbe ɖo Nìnivè be àgbògbò godoa, mù ɖìna ɛ̀.

¹⁸Eye àmè kèwo kpata Sènakerìb wù gà kè mè ne e si trɔ gbɔ̀ so Yudeà lè hùenu kè jiŋùkusi be Èfìɔa dɔ̃to na ɛ̀ ɖo bùsunya kèwo kpata be gblɔ̃a ŋutia, ènyè ye ɖì wo. Ɖo lè yebe àdɔ̀mèze mèa, e wù Izràɛlviwo sùgbɔ, gãke nyè ya, mù yì fĩ woabe ŋutilãkukua sɔ yì ɖì. Sènakerìb dɔ̃ ne woa yì ji wo vɔ̀a wo mu kpɔ wo ò.

¹⁹Nìnivè be èdùmèvi ɖe yì to na èfìɔa be ènyè ye ɖì wo. Wàlɛbɛ kè mù sè be èfìɔa nya eye be le ji mù la wùa; mù vɔ̃ ŋutɔ eye mù si jo.

²⁰Wo ɖo àsi àdɔ̀kùnu nyèwo kpata ji, ènu ɖekpe mu ci ànyi na mù kè wo mu hlà jo yì kɔ̀ ɖo àdɔ̀kùnu jràɖope ò; wo mu ɖè àsi ènu ɖe ŋuti na mù sɔ wu èsrɔ̃ nyè Anà ku èvi nyè Tobìa ò.

²¹Ŋùkèke èkà (40) mu va yì gbɔ̀xue èfìɔ be èvi èvèawo wù ì eye wo si yì Àraràt be ètowo ji ò. Èvia Àsàradɔ̀n xɔ̀ e tèpe; e sɔ Àhikàr, nɔ̀vi nyè Anàɛl be èvia ɖo yebe fìɔdu bliboa be ègà be ènyàwo kpata nu, ye ŋutia àmè kèa kpàcɛ̀ na ènuwo kpata.

²²Eŋua Àhikàr xɔ̀ ènyà ɖo èta nyè, eye mù teŋu trɔ yì Nìnivè, ɖo ènu kè ŋutia Àhikàr nyi àhàkùtɔ gã, kòjoɖoɖo be àsàfòcɛ, èdùjikpɔtɔ ku ègàjikpɔtɔ gã lè Sènakerìb, Àsirìa be èfìɔa gɔ̃mè eye Àsàradɔ̀n gbà sɔ ɛ̀ ɖo yebe èdɔawo nu. Wu ekèa, e nyi àtàviyɔvi nyè, e do xòmè kudo mù.