Read gen TOBÌ 10 Bible Online

TOBÌ 10 - gen bible

TOBÌ 10

¹Vɔ̀ gãkea, gbè ɖekpekpe gbèa, Tobì xlɛ̃nà ŋùkèkèwo na èmɔa ji yìyi ku gbɔ̀gbɔ̀a. Ekè àzãwo kpata va sù vɔ̀a, èvia mu kpɔ ze èta ò.

²E gblɔ̃ na ye ɖokoe be: «Wo le è ɖɛ lè funu vlàvòa? Ta mu nyɔ òa, Gabàɛl ku eye àmè ɖekpe mu lè kè la sɔ ègà na ɛ̀ ò.»

³Eye ètɔa ci jojojoe.

⁴Èsrɔ̃a Anà le gblɔ̃ be: «Èvi nyèa crɔ̃, mu gbà lè àgbèagbewo dòmè ò.» E tɔ àvifãfã ku àlenana ɖo èvia ŋuti le gblɔ̃ be:

⁵«Bàbà na mù, àjìvi nyè; mù tàsi wò ye wò jo, èwò, ŋùkuvi nyèwo be kɛ̃klɛ̃!»

⁶Eye Tobì gblɔ̃ na ɛ̀ be: «Jè e mè, nɔ̀vi nyè, mu gbà do tagbã na ɖokoe wò ò; e lè nyuɛ̃ɖe! Kùxe ɖe kpoe la nyi kù wo lè funua, ɖo àmè kè do èvè na ɛ̀a, nyi àmè kè ŋuti woa dojì ɖoa, e nyi mia nɔ̀viwo dòmètɔ ɖèka. Mù gbà ci siayi ɖo e ŋuti ò, nɔ̀vi nyè, e la gbɔ̀ sɔ̀sɔɛɖe!»

⁷Vɔ̀a e ɖo e ŋuti na ɛ̀ be: «Mù gbà yì ènyà ji ò, ɖo àsi tè na àmè bèble: èvi nyè crɔ̃ vɔ̀!» Eye gbè sia gbèa, e ɖènàbla tona, la kè ŋùku ɖo èmɔ kè ji èvia to joa ji, ɖo mu le dojì ɖo àmè ɖekpe ŋuti ò. Ne èwè ɖoxɔ̀ vɔ̀a, e trɔna va àxomè ku àle nanawo ku àvi fãfãwo èzã blibo mè àlɔ̃màdɔ̃.

⁸Kè ŋùkèkè woènè (14) kèwo Ragùɛl ɖo ku àtãŋukãkã be wo la sɔ ɖù èsrɔ̃ɖèɖe be àzã na èvia nyɔnùvia va yì vɔ̀a, Tobìa va gblɔ̃ na ɛ̀ be: «Ɖè èmɔ na mù ma trɔ jo ɖo mù nya nyuɛ̃ɖe be ètɔ nyè ku ènɔ̀ nyè mu gbà ɖo jìdo be yèwo la kpɔ mù ò. Ye ŋutia, mù le blìbɔ̀ na wò, tata, ɖè èmɔ na mù ne ma trɔ yì ètɔ nyè gbɔ; mù ɖè ènu mè na wò vɔ̀ àlekè e gbɔ lè gà kè mè ne mù le gble è ɖɛa.»

⁹Vɔ̀a Ragùɛl gblɔ̃ na Tobìa be: «Ci ànyi, èvi nyè, ci gbɔ nyè. Mù la dɔ̃ àŋɛ̀dotɔwo ɖoɖa ètɔ wò Tobì ne woa yì gblɔ̃ àpo ènyàwo na ɛ̀.» Tobìa gblɔ̃ na ɛ̀ be: «Kpao, tɔ̀ wò jɔ̀, ɖè èmɔ na mù ma trɔ yì ètɔ nyè gbɔ.»

¹⁰Zè ɖèka Ragùɛl sɔ Sarà, yebe èsrɔ̃a do àsi na ɛ̀ kudo yebe àdɔ̀kùnuwo kpata be màmamè: sumɔvi ŋusù ku nyɔnùwo, ènyì-suwo ku àlɛ̃gbɔwo, èsɔàkɛtɛwo ku èsɔkpotɔnɔ̀wo, àwùwo, klòsalò ku ènu vòvòvowo.

¹¹Eye e ɖè èmɔ na wo lè jìjɔɛ mè. E dogbè na Tobìa ku ènyà kèawo be: «Lãmèsɛ̃ loo, èvi nyè eye èmɔa ne kɔ̀! Jiŋùkusi be Tɔhonɔ̀a ne kplɔ̀ mì yì, èwò ku èsrɔ̃ wò Sarà eye ne va e mè be ma teŋu kpɔ àpo èviwo gbɔ̀xue ma va ku!»

¹²E gblɔ na yebe èvi nyɔnùvia be: «Yì èto wò gbɔ, kè e nyi be so fifìa wo trɔ àjìtɔ wòwo sìgbè àmè kèwo na wò àgbè nènea.»

¹³Ɛdnà cã gblɔ̃ na Tobìa be: «Èvi ku nɔ̀vi ɖève, Tɔhonɔ̀ ne trɔ kplɔ̀ wò yì eye ne wɔ̀ ma nɔ̀ àgbè kaka be ma kpɔ èvi wòwo, èwò ku èvi nyè Sarà tɔ̀wo gbɔ̀xue ma va ku. Lè Tɔhonɔ̀ be ŋùmèa, mù le sɔ èvi nyè nyɔnùvia sɔ ɖo àpo àmèjikpɔkpɔ gɔ̃mè. Mù gbà do è ŋuzĩzĩtɔ lè yebe àgbè ŋùkèkè ɖekpekpe mè ò. Èvi nyè, yì lè ŋutifafa mè! So egbè jia, mù nyi ènɔ̀ na wò eye Sarà nyi nɔ̀vi wò. Ne na be mia kpata mia kpɔ ɖàgbè kèa lè miabe àgbè ŋùkèkèwo kpata mè!» E yomèa, e kpla àsi èkɔ̀ na wo àmè èvèa eye e ɖè èmɔ wo jo lè jìjɔɛ mè.

¹⁴Eŋua Tobìa sɔ èmɔ jo lè Ragùɛl gbɔ lè jìjɔɛ mè, le pòɖɛ̀ na jiŋùkusi ku ànyigbã be Tɔhonɔ̀, xixe kplògòdòa be Èfìɔ, be e wɔ̀ yebe èmɔa jè e ji. Ragùɛl gblɔ̃ na ɛ̀ be: «Kpɔ ɖàgbè be wòa nɔ do bùbu àpo àjìtɔwo ŋuti lè woabe àgbè blibo be ŋùkèkèwo kpata mè!»