Read gen TOBÌ 11 Bible Online

TOBÌ 11 - gen bible

TOBÌ 11

¹Kè wo gogo Kàserìn, kpãŋùkɔ̀ Nìnivè, Rafàɛl gblɔ̃ be:

²«Wò nya nɔ̀nɔmè kè mè mi gble ètɔ wò ɖɛ lèa.

³Mia jè ŋùkɔ̀ na èsrɔ̃ wòa ne mia yì jrà àxuea mè ɖo, wàlɛbɛ kè àmè kpɔ̀tɔɛawo gbãnà.»

⁴Wo àmè èvèawo so jè èmɔ ɖodu. Rafàɛl klã Tobìa va yì gblɔ̃ be: «Vevea ne nɔ̀ àlɔ̀ sɔpe na wò.» Àvũa kplɔ̀ wo do lè ŋùgbedòmè.

⁵Wàlɛbɛ ŋua Anà lè ànyi nɔ̀nɔ, le kè ŋùku ɖoɖa èmɔ kè èvia la sɔ trɔ gbɔ̀a ji.

⁶E kpɔ ɛ̀ jèsi be e gbãnà eye e gblɔ̃ na èsrɔ̃a be: «Kpɔ èvi wòa gbãnà ku yebe kplɔ̀dotɔa!»

⁷Rafàɛl pònu na Tobìa gbɔ̀xue be ɖo ètɔa gbɔ gblɔ̃ be: «Mù nya be yebe ŋùkuviwo la hũ.

⁸Sɔ ètɔmèlã be vevea sì ɖo ŋùkuviwo ji na ɛ̀: èdɔ̀dànua la kliko àyu fɛlɛ ɣewo eye yebe ŋùkuviwo ji be ècrowo la fo jo; gà ŋua mèa ètɔ wò la gbà tɔ ènu kpɔkpɔ eye e la kpɔ kɛ̃klɛ̃.»

⁹Anà pudù yì kù kpla èvia eye e gblɔ̃ na ɛ̀ be: «Mù gbìgbɔ̀ kpɔ wò, èvi nyè, so fifìa mù teŋu ku fà!» Eye e tɔ àvifãfã.

¹⁰Tobì sitè, e le klɛ̃nu, vɔ̀a e jè àgbàgba fla àwa be àgboa.

¹¹Tobìa zɔ̃ yì dogò è, ku ètɔ̀mèlã be veve kè be hɛ̃ ɖo àsia, e plu àya ɖo ŋùkuviwo ji na ɛ̀ eye kè e le è nyuɛ̃ɖea, e gblɔ̃ na ɛ̀ be: «Dojì, tatà!» E sì èdɔ̀dànua na ɛ̀ eye be te è zãaɖe.

¹²E yomèa, e sɔ àsi èvèawo ɖè ècrowo lè yebe ŋùkuvitowo mè.

¹³Gà ŋua mèa Tobì kù kpla ɛ̀ eye e tɔ àvifãfã le gblɔ̃ na ɛ̀ be: «Mù gbà le kpɔ wò, èvi nyè, ŋùkuvi nyèwo be kɛ̃klɛ̃a!»

¹⁴Eye e gblɔ̃ be: «Kafu na Mawu! Kafu na yebe nyikɔ gã! Kafu na yebe àtikplɔtɔ kɔ̀kɔɛwo kpata! Kafu na àtikplɔtɔwo kpata lè hùenuwo kpata mè! Ɖoa Tɔhonɔ̀ pò mù sãa, eye fifìa mù le kpɔ èvi nyè Tobìa!

¹⁵Tobìa ɖo àxuea mè lè jìjɔɛ mɛ̀, le mlã Mawu le ɖègbè lelele. E na ètɔa nya be yebe èmɔa ji yì nyuɛ̃ɖe, be yè hɛ̃ ècia gbɔ̀ eye e gblɔ̃ àlekè be ɖè èsrɔ̃ Sarà, Ragùɛl be èvi nyɔnùvi ɖoa; eye e gbà gblɔ̃ be: «Kpɔ e ye gbãna ŋua, e gogo Nìnivè be àgboa nu vɔ̀!»

¹⁶Tobì so le jìjɔɛ mè le mlã Mawu be yèa yì dogò yè toyɔvia lè Nìnivè be àgboa nu. Kè ne Nìnivè be àmèwo kpɔ ɛ̀ le yì màɖo kplɔ̀tɔa, wo kã yàa. Tobì le ɖè gblɔ̃ lè woabe ŋùmè be Mawu kpɔ ɖo e mè na yè eye be hũ ŋùkuwo na yè.

¹⁷E va ɖo Sarà, èvia Tobìa be èsrɔ̃a gbɔ eye e pòɖɛ̀ na ɛ̀ ku ènyà kèawo be: «Wòezɔ̃, èvi nyè! Kafu na àpo Mawu, àmè kè na wò va mia gbɔ, èvi nyè! Sìtu na ètɔ wò! Sìtu na èvi nyè Tobìa, sìtu na wò cã, èvi nyɔnùvi nyè! Gɛ̃ ɖo àpo àxomè, èwò ye zɔ̃ kaka, sìtu ku jìjɔɛ na wò, gɛ̃ ɖo e mè, èvi nyɔnùvi nyè!»

¹⁸Gbè ŋua gbèa, jìjɔɛ ɖèɖe nɔ̀ Nìnivè be Yudàviwo kpata dòmè.

¹⁹Àhikàr ku Nadàb, Tobì be nyìnɛyɔviwo cã va e gbɔ ɖɔ ku jìjɔɛ.