Read gen TOBÌ 12 Bible Online

TOBÌ 12 - gen bible

TOBÌ 12

¹Gà kè mè ne èsrɔ̃ɖèɖe zã ɖùɖu jè àgoa, Tobì yɔ èvia Tobìa eye e gblɔ̃ na ɛ̀ be: «Èvi nyè, bù tamè sɔ tufɛ̃ na àpo èmɔzɔ̃ kuamètɔa gbà dà ɖe ɖo e ji.»

²E ɖo e ŋti na ɛ̀ be: «Tatà, nenè ma na ɛ̀ ò? Ne mù sɔ àdɔ̀kùnu kèwo be hɛ̃ gbɔ̀ kudo mùa be mama mè ŋutɔ cã sɔ na ɛ̀a, mu nyi ènugugu na mù ò.

³E kplɔ̀ mù gbɔ̀ gãgãɖe, e dà èdɔ̀ na èsrɔ̃ nyè, e hɛ̃ ècia gbɔ̀ kudo mù, e dà èdɔ̀ na wò cã: nenè ye ma sɔ na ɛ̀ lè ekèa kpata yomè ò?

⁴Tobì gblɔ̃ na ɛ̀ be: «E sɔ̀gbè be ne xɔ̀ ènu kèwo kpata be hɛ̃ gbɔ̀a be mama mè.»

⁵Tobìa yɔ ɛ̀ eye e gblɔ̃ na ɛ̀ be: «Sìgbè fɛ̃tu nènea, sɔ ènu kèwo kpata wò hɛ̃ gbɔ̀a be mama mè eye wòa yì lè ŋutifafa mè!»

⁶Gà ŋua mèa Rafàɛl kplɔ̀ wo àmè èvèa kpata yì àsàmè eye e gblɔ̃ na wo be: «Mì pòɖɛ̀ na Mawu eye mì do è ɖo èji lè àgbèagbewo kpata be ŋùmè ɖo ènu kè be wɔ̀ ɖo mia taa ŋuti. E nyɔ be woa pòɖɛ̀ gbà jì èhà na yebe Nyikɔa. Na àgbètɔwo kpata mì ɖè èha Mawu be wɔ̀wɔwo sìgbè àlekè e jèa nène. Mì mu gbà gbe è kafu ò.

⁷E nyɔ be woa sɔ èfìɔ be wìmènu le ɖɛ lè bèbemè, vɔ̀a Mawu be wɔ̀nawoa, e jè be woa ɖè wo gblɔ̃, gbà sɔ fiɔ. Mì mlã sìgbè lekè e jèa. Mì nɔ wɔ̀ nyuɛ̃ eye èvuɛ̃ ɖeti mu la kpe mì ò.

⁸Kuefãfã àdodoe ku àdɔ̀mèfàa, nyɔ fu wu àdɔ̀kùnu ɖoɖo lè màjɔ̀ màjɔ mè. Ènu nana wɔ̀amènɔ̀ nyɔ wu sìka-kɔ̃ bɔ̀bɔ.

⁹Ènu nana wɔ̀amènɔ̀ ɖènà àmè lè èku si eye e kɔ̀nà àmè ŋuti so vuɛ̃ ɖekpekpe mè. Àmè kèwo nanaa, la nɔ̀ àgbè dìdi;

¹⁰àmè kèwo wɔ̀nà vuɛ̃ ku màjɔ̀ màjɔa, nyi woa ŋutɔwo be kɛ̃tɔ.

¹¹«Fifìa mù la to nyàwoa kpata na mì, ɖekpe mà wla do mì. Mù to ekèa na mì be: “E nyɔ be woa sɔ èfìɔ be wìmènu le ɖɛ lè bèbemè, eye woa ɖè Mawu be wɔ̀nawo fiɔ ku zĩzĩ.”

¹²Eŋua! Wàlɛbɛ kè wò fãkue, eye Sarà cã wɔ̀ nènea, e nyè ye sɔ mìabe kuefã be ŋùɖoɖɛa sɔ dà ɖo Tɔhonɔ̀ be gogoa be ŋùkɔ̀; nèneake mù wɔ̀ gà kè mè wò le ɖì àmèkukuwo cã.

¹³Gà kè mè ne wò mu gbe la sitè ò eye wò gble nuɖùɖua wòa, ɖɛ jo yì ɖì àmèkukua, gà ŋua mè ye wo dɔ̃ mù ɖoɖa gbɔ wò ne ma va do wò kpɔ.

¹⁴Vɔ̀a gà ŋua mè kea Mawu dɔ̃ mù ne ma va dà èdɔ̀ na wò, gbàku ètoyɔvi wò Sarà cã.

¹⁵Mù nyi Rafàɛl, àmè ɖèka lè àtikplɔtɔ adrɛ̃ kèwo tɔnatè lè Tɔhonɔ̀ be gogoa nu eye wo yìnà e gbɔ, sumɔna ɛ̀.»

¹⁶Woa àmè èvèawo sàvò, jè ànyi cɔ̃ ŋùkumè ànyi eye èha lɔ wo.

¹⁷Vɔ̀a e gblɔ̃ na wo be: «Mi mu gbà vɔ̃ ènu ɖeti ò. Ŋutifafa ne nɔ̀ kudo mì. Mì nɔ pòɖɛ̀ na Mawu kaka sɔyì!

¹⁸Wàlɛbɛ kè mù nɔ̀ kudo mìa, mu nyi jìjɔɛ dodo na ɖokoe nyè ŋuti ye mù nɔ̀ kudo mì ò, vɔ̀a to Mawu be èjro ji ye. Eya ye mi ɖo la pòɖɛ̀ na, tɛ̀gbɛ̀, eya ye mi ɖo la jì èhà na.

¹⁹Mì le xɔ̀sè sãa be mù le ɖùnu sìgbè àmè ɖe kpò nène, vɔ̀a ŋùku ye le blè mì.

²⁰Ye ŋutia mì pòɖɛ̀ na Tɔhonɔ̀ lè ànyigbã kèa ji eye mì kafu Mawu. Mù gbìgbɔ̀ trɔ le yì ji lè àmè kè dɔ̃ mù ɖoɖaa gbɔ. Mì ŋlɔ̀ ènu ɖekpekpe kè jɔ̀ ɖo mìa jia ɖɛ.» Eye e hũ jo.

²¹Wo trɔ fɔ̃, vɔ̀a wo mu gbà teŋu kpɔ ɛ̀ ò.

²²Wo pòɖɛ gbà jì èhà na Mawu eye wo sumɔ ɛ̀ ɖo ènu jɔ̀asu kèwo kpata be wɔ̀ lè funua: Mawu be àtikplɔtɔ ɖe ɖè ye ɖokoe fiɔ wo!