Read gen TOBÌ 13 Bible Online

TOBÌ 13 - gen bible

TOBÌ 13

¹Eye Tobì gblɔ̃ be:

²«Kafu na Mawu àgbèagbea sɔ yì màvɔ! Kafu na yebe jiɖùɖua! Eya ye dɔ̃nàto gbà kuna ŋuzĩzĩ. E ɖiɖina àmè yì èkuwode, lè ànyigbã be ègũ titowo mè e yomè a, e gbìgbɔ̀ ɖènà ɛ̀ to lè cɔ̃crɔ̃ gã ŋua mè. Ènu ɖeti mu gɛ̃na lè yebe àsi mè ò.

³Mìa Izràɛlviwo, mì kafu ì lè dùkɔ̃wo be ŋùmè, kèwo dòmè e kãkã mì ɖoa;

⁴funua, e na mì kpɔ yebe gãnyinyia. Mì lòlò è lè àgbèagbewo be ŋùmè, ɖo eya ye nyi miabe Tɔhonɔ̀, miabe Mawu, mia Tɔ, e nyi Mawu tɛ̀gbɛ̀dò.

⁵E dɔ̃nàto na mì ɖo mìabe ènudrãwo ŋuti, vɔ̀a e la ku ŋuzĩzĩ na mìa kpata la dɔ̃ mì bɔ̀ so dùkɔ̃wo dòmè, fikè mì kãkã yì hlɛ̃ ɖoa.

⁶Gbè kè gbè mì la trɔ va e gbɔ, ku èjì blibo kudo èkla bliboa, ne mìa wɔ̀ ànùkua lè yebe ŋùkumèa, eŋua e la trɔ va mìa gbɔ eye mu la gbà wla yebe ŋùkumè do mì ò.

⁷Eye fifìa mì kè ŋùku kpɔ ènu kè be wɔ̀ na mìa, eye mì kafu ì ku ègbè liloe liloe. Mì mlã jɔ̀jɔɛnyinyi be Tɔhonɔ̀, mì do bùbu Èfìɔ kè lè tɛ̀gbɛ̀doa ŋuti!

⁸Nye ya, mù le kafu ì lè ànyigbã kè ji mù nyi àhùale lèa, mù le ɖè yebe ŋusɛ̃ ku yebe gãnyinyia fiɔ dùkɔ̃ kè jè èvuɛ̃ mèa gblɔ̃ be: “Vuɛ̃wɔ̀tɔwo, mì trɔ va, mì wɔ̀ ànùkua lè yebe ŋùkɔ̀. Àmè kɛ nya ne e la kè trɔ àdɔ̀mè ɖo mia ŋuti eye e la ku ŋuzĩzĩ na mi ò?”

⁹Mù la nɔ jì Mawu nyè be gãnyinyi, mù le jròwe lè jiŋùkusi be Èfìɔa mè.

¹⁰Àmèwo kpata ne ɖè è gblɔ̃ eye wo ne kafu ì lè Yeruzàlɛm! Yeruzàlɛm, èwò, èdù kɔ̀kɔɛa, Mawu pò wò ɖo èvi wòwo be wɔ̀wɔwo ŋuti, vɔ̀ zè ɖèka kea, e la kpɔ ɖo emè na àmè jɔ̀jɔɛwo be èviwo.

¹¹Kafu Tɔhonɔ̀a ku zĩzĩ eye jì kafuha na Èfìɔ kè lè tɛ̀gbɛ̀a, ne wo gbìgbɔ̀ tù yebe mawuxɔ kɔ̀kɔɛa lè èwò mè ku jìjɔɛa,

¹²Tɔhonɔ̀ ne na àhùalewo kpata ne kpɔ jìjɔɛ! Ne ɖè yebe lɔlɔ̃ màɖo lipò fiɔ hiãfonɔ̀wo kpata lè gbɔ wò!

¹³Kɛ̃klɛ̃ nyɛ̃ ɖe la nɔ klɛ̃ kaka yì ànyigbã be nukpòpewo. Dùkɔ̃ lè àzɔ̀ge boo sùgbɔ la va gbɔ wò. Ànyigbã be nukpòpe be èdùmèviwo la bɔ̀ va gbɔ wò, Yeruzàlɛm! Wo la hɛ̃ ènunanawo ɖo àsi va na jiŋùkusi be Èfìɔa. Jìjimèviwo la va do jìjɔɛ va na èwò, èɖe jè èbu yomè. Lè hùenuwo kpataa, wo la nɔ yɔ wò be “Èdù cãcã”.

¹⁴Helu na àmè kèwo la do ŋùklɛ̃ na wò! Helu na àmè kèwo kpata la crɔ̃ wò gbà mù èglìkpo wòwo, na àmè kèwo kpata mù àpo tawàwo pu ànyi gbà tɔ èzò àxue wòwoa, helu! Vɔ̀a sìtu màvɔ na àmè kèwo kpata le si wòa!

¹⁵Eŋua, Yeruzàlɛm, kpɔ jìjɔɛ ɖo àmè kèwo gbà lè ègbèji na Mawua ŋuti. Wo la bɔ̀ ɖodu eye wo la jì kafuha na Tɔhonɔ̀ tɛ̀gbɛ̀dò. Sìtuɖèɖe la nyi na àmè kèwo lɔ̃nà wòa! Sìtuɖèɖe la nyi na àmè kèwo jɔ̀nàjì ɖo àpo ŋutifafa ŋutia!

¹⁶Sìtuɖèɖe la nyi na àmè kèwo la xànu na wò ɖo àpo ètodɔ̃dɔ̃wo kpata ŋutia! Ɖoa wo la kpɔ jìjɔɛ lè èwò mè eye wo la kpɔ jìjɔɛ blibo wòa kaka sɔyì. Ɛ̃ɛ, mù le pòɖɛ̀ na Tɔhonɔ̀, Èfìɔ gãa,

¹⁷ɖoa wo la gbìgbɔ̀ tù Yeruzàlɛm, kudo Tɔhonɔ̀ be àxuea lè èdù kèa mè tɛ̀gbɛ̀dò. Sìtuɖèɖe la nyi na mù ne kɔ̀ta nyè be kpɔ̀tɛa la kpɔ àpo ŋùtikɔkɔɛ gbà sumɔ jiŋùkusi be Èfìɔa. Wo la gbìgbɔ̀ li Yeruzàlɛm be àgbowo ku àdrũjònu àlo sàfirò kudo ɖazɛ̃jònu àlo Emerod; wo la sɔ èkpe xɔ̀asìwo sɔ ɖo àpo èglìwo. Wo la tù Yeruzàlɛm be tawàwo ku sìka eye yebe àgbògbòwoa ku sìka àdodoe. Wo la ziɔ̃ Yeruzàlɛm be èmɔwo ku jònu jɛ̃wo kudo Ɔfir be èkpe xɔ̀asìwo.

¹⁸Àpo àgbowo la nɔ jì àwuyaya be èhàwo eye àxue wòwo la nɔ jì èhà be: “Àleluyà! Sìtu na Izràɛl be Mawua!” Eye àmè cãcãwo la pòɖɛ̀ na nyikɔ kɔ̀kɔɛa so màvɔ yì màvɔ.»