Read gen TOBÌ 14 Bible Online

TOBÌ 14 - gen bible

TOBÌ 14

¹Nènea ye Tobì be èɖɛ̀pòpo be ènyàwo wu enu.

²Tobì ku lè ŋutifafa mè lè yebe èpè èkà èvè takpo ci woèvè (112) mè eye wo ɖì ì ɖo Nìnivè ku zĩzĩ. Èpè èkà takpo ci èvè lè e si ekè e trɔ ŋùvinɔ eye so gà kè mè e gbà tɔ ènu kpɔkpɔa e nɔ̀ àgbè lè ènu sùamè mè eye e wɔ̀nà àdɔ̀mènyuɛ̃ gbà pònàɖɛ̀ na Mawu wè sia wè gbà nɔ ɖè yebe gãnyinyia fiɔ.

³Kè be ɖo èkudonua, e yɔ èvia Tobìa eye e gblɔ̃ ètopòɖo nya kèawo na ɛ̀ be: «Èvi nyè, kplɔ̀ èvi wòwo yì,

⁴jè èmɔ kaba tùtà Medìa, ɖoa mù xɔ̀ Mawu be ènyà kè Nàhum gblɔ̃ so Nìnivè ŋutia ji sè: ènuwo kpata la va jɔ̀ eye e la jɔ̀ ɖo Àsur ku Nìnivè ji; kèwo Izràɛl be gblɔ̃ɖɛtɔwo, àmè kèwo Mawu dɔ̃ ɖoɖa wo va gblɔ̃a, kpata la va e mè. Wo mu la ɖè ènu ɖeti ɖɛ lè woabe ènyàwo kpata mè, woa kpata la va jɔ̀ lè woabe hùenu. Àmèwo la nɔ̀ dèdenɔ̀nɔ mè lè Medìa sɔ wu Àsirìa ku Babɛ̀l. Ɖo mù nya eye mù xɔ̀sè be ènu sia ènu kè Mawu gblɔ̃a la zɔ̃ sù eye e la va jɔ̀: gblɔ̃ɖɛtɔwo be ènyà kui ɖèka mu la gɛ̃ ò. Wo la va xlɛ̃ mia nɔ̀vi kèwo kpata nɔ̀nà Izràɛl nyigbã jia eye wo la kplɔ̀ wo boo yì lè ànyigbã nyuɛ̃ kèa gbɔ. Izràɛl nyigbã bliboa la trɔ zògbè, Sàmarìa ku Yeruzàlɛm la ci toto eye Mawu be àxuea la ci àgba la bì èzò sɔ na hùenu ɖe kpò.

⁵Vɔ̀a zè ɖèkaa, Mawu la ku ŋuzĩzĩ na wo eye e la gbà kplɔ̀ wo gbɔ̀ va Izràɛl be ànyigbã ji. Wo la gbìgbɔ̀ tù yebe Àxuea, mu la sù cucugbãtɔ̀a ò, kaka gà kè mè hùenu kè wo ɖo ɖɛa, wo la va e mè. Eŋua yomèa, wo la trɔ gbɔ̀ so woabe égàtɔnugbe eye wo la gbìgbɔ̀ tù Yeruzàlɛm lè yebe àcɔɖoɖo mè. Le e mèa, wo la gbìgbɔ̀ tù Mawu be Àxuea sɔ zɔ̃ ɖo ènu kè Izràɛl be gblɔ̃ɖɛtɔwo gblɔ̃ so e ŋutia ji.

⁶Lè dùkɔ̃ kèwo keŋu lè ànyigbã jia mèa, àmèwo kpata la trɔ eye wo la ɖo sisi na Mawu lè nyàwo bliboa mè. Wo la ɖè àsi lè woabe àmèfùflu be ènusɛ̃sɛ̃wo kèwo ye nana wo trãnà èmɔa ŋuti eye wo la nɔ pòɖɛ̀ na jɔ̀jɔɛ be Mawua tɛ̀gbɛ̀dò.

⁷Izràɛlvi kèwo kpata gã lè àzã ŋuawo mè ye wo ɖoŋù Mawu ji lè nyàwototo mèa, wo la bɔ̀ ɖodu eye wo la va Yeruzàlɛm. Wo la nɔ̀ èjì ɖèɖɛ mè tɛ̀gbɛ̀ lè Abràham be ànyigbã kè wo la sɔ na woa ji. Àmè kèwo lɔ̃nà Mawu lè nyàwototo mèa, la nɔ̀ jìjɔɛ mè, vɔ̀a àmè kèwo wɔ̀nà nuvuɛ̃ ku màjɔ̀ màjɔa, la bu lè ànyigbã ji.

⁸Eye fifìa, èvi nyèwo, ekèa wo ye nyi àpe pòpòfiɔwo: mì sumɔ Mawu lè nyàwototo mè eye mì wɔ̀ ènu kè nyɔna ŋùmè na ɛ̀. Mì ɖo è na mìabe èviwo be woa wɔ̀ ɖo jɔ̀jɔɛ ku àdɔ̀mènyuɛ̃ ji, woa ɖoŋùku Mawu, gbà pòɖɛ̀ na yebe Nyikɔ wè sia wè lè nyàwototo mè kudo woabe ŋusɛ̃wo kpata.

⁹Èwò èvi nyè ya, jo lè Nìnivè, mù gbà ci fikèa ò. Ne wò gbe ɖì ènɔ̀ wò ɖo gbɔ nyè kpòa, mù gbà ci ànyi èzã ɖèka kpɛ̀ɛ lè èdù kèa be ànyigbã ji ò. Ɖo mù le kpɔ be èvuɛ̃ le sùgbɔ kpe è eye wo wɔ̀nà àyemènu èŋùmàkpɛ̃tɔ̀.

¹⁰Èvi nyè, kpɔ ènu kè kpata Nadàb wɔ̀ na Àhikàr, àmè kè hɛ̃a: mu nyi be e dɔ̃ ɛ̀ àgbèagbe yì ànyigbã be ètù mèa? Vɔ̀a Mawu tu yebe ŋùkpɛ̃nua be èfɛ̃ lè àmè kè ji ènu jɔ̀ ɖoa be ŋùmè: Àhikàr trɔ va kɛ̃klɛ̃a nu, wàlɛbɛ kè ne Nadàb gɛ̃ ɖo viviti màvɔa mè, ɖo e ji be yèa wù Àhikàr. Àhikàr to lè èku be èmɔ̀ kè Nadàb tre na ɛ̀a mè, ɖo e kɔ̀nà àdɔ̀mè ɖo wɔ̀amènɔ̀wo ŋuti. Vɔ̀a Nadàb jè èku be èmɔ̀ kè hɛ̃ cɔ̃crɔ̃ va na ɛ̀a mè.

¹¹Eŋua kpòa, èvi nyèwo, mì kpɔ ènu kè àdɔ̀mɛ̀nyuɛ̃a wɔ̀nà kudo ènu kè èvuɛ̃ jɔ̀jɔ wɔ̀nàa ɖa: ekèa hɛ̃nà èku va. Vɔ̀a àgbèa le gble mù ɖɛ.» Wo sɔ ɛ̀ mlɔ̃ yebe àbàti ji, eye e ku. Eye wo ɖì ì ku zĩzĩ.

¹²Kè ne ènɔa kua, Tobìa ɖì ì ɖo ètɔa gbɔ. E yomèa, e jo yì Medìa ku èsrɔ̃a kudo èviawo eye e nɔ̀ Ekbàtanà lè ètoa Ragùɛl gbɔ.

¹³E ɖona bùbu èsrɔ̃a be àjìtɔwo ŋuti lè woabe sĩsĩ mè. E ɖì wo lè Ekbàtanà lè Medìa, e yomèa, e ɖù Ragùɛl be ècrɔ̃nu sìgbè ètɔa Tobì tɔ̀ ke nène.

¹⁴Bubu nɔ̀ e ŋuti ye e ku lè yebe èpè èkà èvè takpo ci woeadrɛ̃gɔ̃a (117) mè.

¹⁵Jè ŋùkɔ̀ na yebe èkua, e va sè Nìnivè be cɔ̃crɔ̃ be nyikɔ eye e kpɔ Nìnivètɔ kèwo ye Siaxàr, Medìa be èfìɔa, kplɔ̀ àhùalea. E pòɖɛ̀ na Mawu ɖo ènu kè kpata be wɔ̀ na Nìnivè ku Àsirìa be dùmètɔwo ŋuti. Gbɔ̀xue e la va kua, e kpɔ jìjɔɛ so Nìnivè be ènyà ŋuti eye e pòɖɛ̀ na Tɔhonɔ̀ Mawu so màvɔ̀ yì màvɔ. Àmèn.