Read gen TOBÌ 2 Bible Online

TOBÌ 2 - gen bible

TOBÌ 2

¹Lè Àsàradɔ̀n be èfìɔɖùɖu be hùenua ye mù trɔ gbɔ̀ va àxomè eye wo trɔ èsrɔ̃ nyè Anà kudo èvi nyè Tobìa na mù. Lè miabe Pɛ̃ntekɔ̀st zã-gbè, kè wo yɔna be Kuasiɖawo be àzã kɔ̀kɔɛa gbèa, wo ɖà ènu vivi na mù. Mù zìɔ̃ ɖo ànyi ne ma ɖù ènua,

²wo sɔ èkplɔ̃ va na mù, wo hɛ̃ ènuɖùɖu nyuɛ̃wo fuu va. Eye mù gblɔ̃ na èvi nyè Tobìa be: «Èvi nyè, yì ne wò kpɔ mia nɔ̀vi kèwo wo cigbe lè Nìnivèa be wɔ̀amènɔ̀ ɖe kè ɖona ŋùku Tɔhonɔ̀ ji so yebe èjì blibo mèa, kplɔ̀ ɛ̀ va ne bèa ma ènuɖùɖu nyèa kudo mù. Kpɔɖa, mù le nɔ̀tè kpɔ wò, èvi nyè, kaka ne wòa trɔ gbɔ̀.»

³Tobìa to yì àkuitɔnɔ̀ jigbe lè mia nɔ̀viwo dòmè, vɔ̀a e trɔ va eye e gblɔ̃ be: «Tatà!’ Mù gblɔ na ɛ̀ be: «Ɛ̃hɛ̃ le e tɔ ɖo ò?, èvi nyè!» E ɖoeŋuti na mù be: «Tatà, wo pò mia detɔ ɖèka wù, wo sɔ ɛ̀ dãŋùgbe ɖo dògbà ji eye e gbà kpɔ̀tɔ̀ lè funu fifìjɛ̃ ke: wo gbidi èvekã na ɛ̀.»

⁴Mù hɔ̃ kaba gble ènuɖùɖu nyèa ɖɛ àsimàtɔ, ne ma yì ɖè ŋusùa jo lè dògbàa ji. eye mù sɔ ɛ̀ ɖo èxɔ̀viwo dòmètɔ ɖèka mè, le nɔ̀tè kpɔ èwèa be èxɔ̀ ɖoɖo ne ma yì ɖì ì.

⁵Kè mù trɔ va àxomèa, mù kɔ̀ ɖokoe nyè ŋuti eye mù ɖù kpɔ̃nɔ nyèa le èfũlòlo mè,

⁶le ɖo ŋùku gblɔ̃ɖɛtɔ Àmɔs be ènyà kè be gblɔ̃ ɖɛ so Betɛ̀l ŋuti be: «Mìabe àzãɖùɖuwo la trɔ èfũ eye mìabe èmɔwo kpata la trɔ àlenanawo.» Eye mù tɔ àvi fãfã.

⁷E yomèa, kè èwèa ɖoxɔ̀ vɔ̀a, mù yì kù èdo eye mù ɖì ì.

⁸Àxuekɔ̀tɔ nyèwo le kò mù le gblɔ̃ be: «Mu gbà le vɔ̃ ò! Wo tĩ e yomè ne woa wù ì ɖo ènyà kèa ŋuti eye be si jo; vɔ̀ zè ɖèkaa e ye gbà le ɖì àmèkukuwo ŋua!»

⁹Lè èzã ŋua mèa, mù kɔ̀ ɖokoe nyè ŋuti, mù to yì àwa nyèa nu eye mù jo drɛ̃ àlĩ lè àwaa be èglìa ŋuti, ènu màcɔ̃ ŋùmè ɖo fiɔ̃fiɔ̃a ŋuti.

¹⁰Nyè mu nya be sàgbàdrɛ̃wo lè èglìa mè lè àpe ètamè ò; woabe èmi zòzoa gɛ̃ jè ŋùkuvi ji na mù; e na àyu fɛlɛ ɣe ɖewo tɛ ci ŋùkuviwo ji na mù. Mù yì èdɔ̀yɔ̀tɔwo gbɔ n e woa dà ɛ̀ na mù, vɔ̀a zè gèɖè kè wo le do àtikè wo ji na mùa, nène ye ènu ɣe ŋuawo le gble ènu kpɔkpɔ nyèa kaka mù va trɔ ŋùvìnɔ̀ keŋu. Mù ci ènu màkpɔ sɔ na èpè ènè. Nɔ̀vi nyèwo kpata lè ŋuzĩzĩ mè ɖo ŋuti nyè eye Àhikàr le kpɔ èji nyè na èpè èvè gbɔ̀xue be jo yì Elimayìd.

¹¹Lè gà ŋua mèa, èsrɔ̃ nyè Anà kpɔ èfɛ̃tutu be èdɔ ɖe;

¹²e wɔ̀nà èdɔa va eye wo tuna yebe èfɛ̃a na ɛ̀. Lè wètri kè wo yɔna be Distrɔ̀s[1] be ŋùkèkè adrɛ̃gɔ̃a gbèa, e jè àgo na èkpo ɖèka eye be sɔ ɛ̀ yì na àsìsìnɔ̀awo, àmè kèawo tu yebe èfɛ̃a kpata na ɛ̀ eye wo gbà na ɛ̀ ègbɔsuvi ɖèka.

¹³Kè e va gogo mùa, ègbɔsuvia tɔ fãfã; mù yɔ èsrɔ̃ nyèa eye mù to na ɛ̀ be: «Fikɛ ègbɔsuvi kèa so ò? Èfĩnu be nyia? Trɔ ɛ̀ yì na ènu tɔwo kpoo! Mi mu kpɔ èmɔ la ɖù èfĩnu ɖekpe ò!»

¹⁴E gblɔ̃ na mù be: «Ènunana ye be nyi eye wo sɔ ɛ̀ ta èfɛ̃ kè jè na mùa!» Gãke mù kpɔ̀tɔ̀ le wɔ̀ be nyè mu le xɔ̀ ɛ̀ sè ò eye mù le gblɔ̃ na ɛ̀ be ne trɔ ɛ̀ sɔ yì na ènu tɔwo. Eye mù bijì do è ɖo ekèa ŋuti. Eŋua e sɔ ènyà ɖo e ŋuti na mù be: «Fikɛ àpo àlɔ̀dowo lè ò? Fikɛ àpo èdɔ nyuɛ̃wo lè ò? Ènu kè jɔ̀ ɖo ji wòa kpata mè kɔ̀ fifì!»