Read gen TOBÌ 3 Bible Online

TOBÌ 3 - gen bible

TOBÌ 3

¹Mù lè ŋuzĩzĩ mè, mù le ŋɛ̀, le fã àvi eye mù le fãkue lè àpe ènuxàxa mè, le gblɔ̃ be:

²«Ɛ̃ɛ jɔ̀jɔɛtɔ ye wò nyi, oò Tɔhonɔ̀ eye àpo wɔ̀nawo lè jɔ̀jɔɛ. Àpo èmɔwo kpata nyi ànùkua ku nyàwo, e wò ye ɖona kòjo ku xixea.

³Eŋua Tɔhonɔ̀, ɖo ŋùku mù, le ŋùku ɖɛ eye mù gbà dɔ̃to na mù ɖo èvuɛ̃ nyèwo ŋuti, àlo àpe àgɔ̀jèjewo; kaka va jè kèwo ètɔ nyèwo wɔ̀ va yìa ji ò.

⁴Wo trìto ɖo àpo èsedodowo ŋuti, ye ŋuti ye wò na wo ɖè mi àbòyo, kplɔ̀ mi yì gàtɔnugbe ku èku. Wò jo mi na èhàmèlo, ènu ɖì kòkoe ku èvlodonu na dùkɔ̃wo kpata kèwo dòmè wò kã mi hlɛ̃ ɖoa.

⁵Ɛ̃ɛ, àpo kòjo ɖoɖowo kpata nyi nyàwo. Gà kè mè ne wò wɔ̀nà ku mù zɔ̃ ɖo àpe nuvuɛ̃wo ku ètɔ nyèwo tɔ̀wo ji, ɖo mi mu wɔ̀ ɖo àpo èsedodowo ji ò, mi mu zɔ̃ le nyàwoa mè lè ŋùkɔ̀ na wò ò.

⁶Eye fifìa, wɔ̀ kudo mù sìgbè àlekè e jro wòa nène, ɖè ègbè be wo ne trɔ xɔ̀ àpe gbɔ̃gbɔ̃a lè àsi nyè, be wo ne ɖè mù to lè ànyigbã ji ne ma gbìgbɔ̀ trɔ zũ ànyigbã. E la nyɔ na mù be ma ku sɔ wu ma nɔ̀ àgbè, ɖoa mù sè ku èto be wo zũ mù àgɔ̀ ɖe màje eye kɔ̀bɛ màɖo kɔpe lè ènyè mè. Ɖè ègbè, oò Tɔhonɔ̀, be wo ne ɖè mù jo lè ènuxàxa kèa mè, ɖè èmɔ ma yì èku màlifi eye mù gbà trɔ àpo ŋùmè do mù ò, Tɔhonɔ̀. Nyàwo, e la nyɔ na mù ma ku sɔ wu be ma nɔ ɖù èhiãkpeàmè kèa lè àpe àgbè bliboa mè eye be ma nɔ sè èzũ kè wo le zũ mùa.»

⁷Gbè ŋua gbè kea, e va jɔ̀ be Sarà, Ragùɛl kè nɔ̀nà Ekbàtanà lè Medìa be èdù mèa be èvi nyɔnùa cã sè ku èto be yè tɔ be sumɔvi nyɔnù ɖèka le zũ yè.

⁸Ènyà le nyi be wo sɔ ɛ̀ na àsu zè adrɛ̃ sɔ̃ŋu eye Asmɔdèo, gbɔ̃gbɔ̃ nyrãku ŋua, wù yebe èsrɔ̃awo, ɖèka ɖèka gbɔ̀xue e va ca kudo è zɔ̃ ɖo èsrɔ̃ ɖèɖe be ɖoɖoa ji. Ekèa ŋuti ye sumɔvi nyɔnùa le gblɔ̃ na ɛ̀ be: «Èwò ye wùnà èsrɔ̃ wòwo! Kpɔ àmè adrɛ̃ sɔ̃ŋu ye wo sɔ wò na va yì eye wò mu ɖo ɖèka tètè be nyikɔ ò.

⁹Nukɛ ŋuti wò ɖùnà èblu ɖo mia ji kù ɖo èsrɔ̃ wò kèwo kua ŋuti ɖo ò? Jo yì bɔ̀ ɖo woa ŋuti, eye wo mu la kpɔ èvi, ŋusù àlo nyɔnù ɖe cã to so èwò mè gbèɖe ò!»

¹⁰Gbè ŋua gbèa, e ɖɔ ku kɔ̀bɛ ɖèɖe, e tɔ àvi fãfã eye e yì lia ètɔa be jixɔa mè be yèa do èkà ève na yè ɖokoe; vɔ̀a so susu ɖèɖe ŋua mèa, e gblɔ̃ na ye ɖokoe be: «Wo la va nɔ zũ ètɔ nyè gblɔ̃ be: “Wò ɖo èvi nyɔnùvi ɖèka kè vena na wòa eye e yì do èkà ève na ye ɖokoe ɖo yebe gbèsivuɛ̃wo ŋuti!” Mù la va na yebe àmègãkukua la ɖo ŋuzĩzĩ mè yì èkuwode. E la nyɔ na mù wu ne ma do èkà ève na ɖokoe nyè, bòhũa, mù la blìbɔ̀ na Tɔhonɔ̀a ne bèa xɔ̀ àgbè nyèa ne nyè mu gbà sè èzũ ɖe ò.»

¹¹Troloa, e drɛ̃ àlɔ̀wo ɖoɖa flɛsè to lè èwèzɛ̃pe eye e fãkue kèa be: «Mù mlã wò, oò Mawu àdɔ̀mènyuɛ̃tɔ! Wo ne mlã àpo nyikɔ tɛ̀gbɛ̀! Àpo àlɔ̀nudɔwo kpata ne mlã wò sɔ yì màvɔ!

¹²Fifìa, èwò ye mù le kɔ ŋùmè yì ji ɖoɖa gbà trɔ ŋùkuvi nyèwo ɖoɖa gbɔ wò.

¹³Wɔ̀ be woa ɖè mù jo lè ànyigbãa ji ne nyè mu gbà sè àpe zũzũwo gbèɖe ke ò.»

¹⁴Àpetɔ, wò nya be mù le ɖokoe nyè èɖi màɖo, na àsà wɔ̀na kpòtoe ɖekpekpe ku ŋusù ɖe.

¹⁵Nyè mu pòɖi nyikɔ nyè ku ètɔ nyè be nyikɔ cã lè ànyigbã kè ji mù lè àhùale ò. Mù nyi nyɔnùvi àkòŋùgò na ètɔ nyè, mu gbà ɖo ècrɔ̃ɖùvi bu ɖe ò, mu ɖo nɔ̀vi ɖekpe cã lè e gbɔ àlo xòmètɔ ɖe kè ŋuti mù ɖo la le ɖokoe nyè ɖɛ na èsrɔ̃a ɖo ò. Ŋusù adrɛ̃ ye ku na mù vɔ̀: nukɛ ŋuti mù la gbà nɔ̀ àgbè ɖo ò? Vɔ̀a ne mu nyɔ na wò be ma ku òa, eŋua, Tɔhonɔ̀, le èto ɖo èzũ kè wo le zũ na mùa ŋuti.»

¹⁶Troloa, Tobìa ku Sarà be kuefã ɖì lè Mawu be gogoa mè eye e xɔ̀ ɛ̀.

¹⁷Wo dɔ̃ àtikplɔtɔ Rafàɛl ɖoɖa ne bèa yì dà èdɔ̀ na wo. E la na Tobì be àyu fɛlɛ ɣe kè lè yebe ŋùkuviwo jia ne jo ne bèa teŋu kpɔ Mawu be kɛ̃klɛ̃ ku ye ŋutɔ yebe ŋùkuviwo. E la lè Sarà, Ragùɛl be èvi nyɔnùvia cã ɖì, ne woa teŋu sɔ ɛ̀ yì na Tobìa, Tobì be èvi ŋusùa ne bèa ɖè. Ɖo e la nyà Asmɔdèo, gbɔ̃gbɔ̃ nyrãku ŋua, lè e mè. Eye Tobìa ye ɖo la xɔ̀ ɛ̀ jè ŋùkɔ̀ na àgɔ̀sɔ buwo. Gà ŋua mèa, Tobì to jo lè yebe àwaa nu yì ɖo àxuea mè eye Sarà, Ragùɛl be èvi nyɔnùa, ɖì so èjixɔa mè va.