Read gen TOBÌ 5 Bible Online

TOBÌ 5 - gen bible

TOBÌ 5

¹Eŋua Tobìa ɖoeŋuti na ètɔa be: «Ètɔ nyè, mù la wɔ̀ ènu kèwo kpata wò ɖo na mùa.

²Vɔ̀a, àleke mù la wɔ̀ xɔ̀ klòsalòga kèa lè e si kè ne mi mu jèsi mia nɔ̀nɔwo ɖo ò? Dosia kɛ mù la ɖè fiɔ ɛ̀ ne bèa kpɔ mù jèsi, sɔ xɔ̀ èji nyè sè eye bèa sɔ ècia na mù ò? Bɔ̀ ɖo e ŋutia, nyè mu nya èmɔ kèwo mù la to sɔ yì Medìa ò!»

³Tobì ɖoeŋuti na èvia Tobìa be: «Mi ŋlɔ̀ ɖase xoma, do àsi e mè eye mù ma ɛ̀ ɖo èvè ne mia dòmètɔ ɖe sia ɖe ne ɖo àkpa ɖèka. Mù sɔ ye tɔ̀a bɔ̀ ɖo ècia ŋuti. Kpɔ èpè èwì ye nyi kèa mù sɔ èci kèa dàɖɛ. Fifìa èvi nyè, ji àmè kè ŋuti wò la dojì ɖoa ne bèa dovè na wò; mi la tu èfɛ̃ na ɛ̀ kaka na àpo tɔtrɔ gbɔ. Eŋua so yì va yì xɔ̀ èci kèa lè Gabàɛl gbɔ.»

⁴Tobìa to, yì ji àmè ɖe kè teŋu do èvè na ɛ̀ yì Medìa eye e gbà nya èdùa mè be èmɔwo nyuɛ̃ɖe. Lè xixe nua, e kè ɖo àtikplɔtɔ Rafàɛl ŋuti. E lètè lè ŋùkɔ̀ na ɛ̀ gãke mu kpɔ ɛ̀ jèsi be Mawu be àtikplɔtɔ ye ò.

⁵E gblɔ̃ na ɛ̀ be: «Èxlɔ̃ nyè, fikɛ tɔ wò nyi ò?» Àtikplɔtɔa gblɔ̃ na ɛ̀ be: «Izràɛlvi mù nyi, nɔ̀vi wòwo dòmètɔ ɖèka, eye mù va fiyè kpaji va èdɔ wɔ̀gbe.» Tobìa gblɔ̃ na ɛ̀ be: «Wò nya èmɔ kè wo la to sɔ yì Medìa ma?»

⁶Àtikplɔtɔa gblɔ̃ na ɛ̀ be: «Ɛ̃ɛ, mu yìnà funu, eji eji ŋutɔ, eye mù nya èmɔwo kpata. Mù yì Medìa zè nenè ɖe eye mù zɛ̃ Gabàɛl, mia nɔ̀vi kè nɔ̀nà Ragùɛs lè Medìaa gbɔ. Ŋùkèkè èvè blibo be àzɔ̃lì ye so Ekbàtanà jè Ragùɛs, ɖo wo le èto nyigbã ji.»

⁷Tobìa gblɔ̃ na ɛ̀ be: «Nɔ̀tè kpɔ mù, èxlɔ̃ nyè, ne ma yì sìa ètɔ nyè, ɖo mù hiã be wòa kplɔ̀ mù yi, mù la tu àpo èfɛ̃ na wò.»

⁸Àmèa ɖoeŋuti be: «E nyɔ, mù lè fiyè. Vɔ̀a mù gbà di gàmè ò.»

⁹Tobìa trɔ yì sìa ètɔa Tobì eye e gblɔ̃ na ɛ̀ be: «Fifì jɛ̃a, mù kpɔ àmè ɖe; e nyi mia nɔ̀vi Izràɛlvi ɖe.» Tobì gblɔ na ɛ̀ be: «Yɔ ɛ̀ va na mù, ne ma nya xòmè ku kɔ̀ta kèwo mè be to so eye ne wo la teŋu dojì ɖo e ŋutia, ne bèa kplɔ̀ wò yì, èvi nyè.»

¹⁰Tobìa to yì yɔ ɛ̀ eye e gblɔ̃ na ɛ̀ be: «Èxlɔ̃ nyè, ètɔ nyè le yɔ wò.» Àtikplɔtɔa ɖo àxuea mè eye Tobì dogbè na ɛ̀ cucugbãa. Àmèa ɖoeŋuti be: «Mù le biɔ ɖàgbè fuu na wò.» Tobì xɔ̀ ègbèa be: «Ɖàgbè kɛ ye mù la gbà teŋu kpɔ xɔ̀ ò? Mù nyi àmè kè si wo xɔ̀ ènu kpɔkpɔ lèa, nyè mu gbà le kpɔ jiŋùkusi be kɛ̃klɛ̃a ò, vɔ̀a mù ci vìvìti mè sìgbè àmèkuku kèwo ye mu gbà le kpɔ kɛ̃klɛ̃ òa nène. Àmè lè àgbèa, mu nɔ̀nà àmèkukuwo dòmè ò; mù sènà àmèwo be ègbè, gãke nyè mu kpɔna wo ò.» Àtikplɔtɔa gblɔ̃ na ɛ̀ be: «Dojì, mu la dìdì gbɔxue Mawu la dà èdɔ̀ na wò ò, dojì.» Tobì gblɔ̃ na ɛ̀ be: «Èvi nyè Tobìa ɖè susu be yè la yì Medìa. Wò la teŋu do èvè na ɛ̀, la nyi kplɔ̀tɔ na ɛ̀ ma? Mù la tu àpo èfɛ̃ na wò, nɔ̀vi!» E gblɔ̃ na ɛ̀ be: «Mù teŋu do èvè na ɛ̀, mù jèsi èmɔwo kpata, mù yì Medìa eji eji, mù dã lè yebe gbàjàji ku ètowo ji eye mù jèsi èmɔawo kpata.»

¹¹Tobì gblɔ̃ na ɛ̀ be: «Nɔ̀vi, xòmè kɛ kudo kɔ̀ta kɛ mè ye wò so ò? Na ma nya, nɔ̀vi!»

¹²Àtikplɔtɔa gblɔ̃ be: «Nukɛ kɔ̀ta nyèa la teŋu wɔ̀ na wò?» Tobì gblɔ̃ na ɛ̀ be: «Mù ji la nya ɛ̀ godoo, àmè kɛ be èvi wò nyi kudo àpo nyikɔa.»

¹³E ɖoeŋuti be: «Mù nyi Àzarìa, Ànanìa Àmèsĩsĩa, àpo nɔ̀viwo dòmètɔ ɖèka be èvia.»

¹⁴Tobì gblɔ̃ na ɛ̀ be: «Wòezɔ̃, nɔ̀vi. Mu gbà ve wò be mù ji la nya nyàwoa so àpo xòmèa ŋuti ò. E le ze be nɔ̀vi ɖèka ye wò nyi so xòmè jè ŋùmè ɖe mè. Mù jèsi Ànanìa ku Natàn, Sèmelìa Àmèsĩsĩa be èvi èvèawo. Wo vana Yeruzàlɛm kudo mù sã eye wo sumɔna kudo mù lè funu. Wo mu jo lè èmɔa ji ò. Nɔ̀vi wòwo nyi àmèjɔ̀amèwo, ègũnu nyuɛ̃ɖe mè ye wò to so. Wòezɔ̃ kaka.»

¹⁵Eye e yì eji be: «Mù le xɔ̀ wò ɖo ègà drakmà ɖèka gbè ɖèka ji eye àpo àmè jikpɔkpɔa ku èvi nyèa tɔ̀ lè ɖèka.

¹⁶Ye ŋutia do èvè na èvi nyèa eye mù la dà ɖo àpo èfɛ̃tua ji.»

¹⁷Èye àtikplɔtɔa gblɔ̃ be: «Ɛ̃ɛ, mù la yì do èvè na ɛ̀, mù gbà vɔ̃ ènu ɖeti ò. Ènu sia ènu la zɔ̃ nyuɛ̃ɖe lè miabe yìyi ku gbɔ̀gbɔ va gbɔ wòa mè, ɖoa èmɔa ɖo kãkãɖoji.» Tobì gblɔ̃ na ɛ̀ be: «E la cɛ na wò, nɔ̀vi!» E yomèa, ètɔa yɔ èvia va eye be gblɔ̃ na ɛ̀ be: «Èvi nyè, jrà ènu kè hiã wò na èmɔzɔ̃zɔ̃ eye ne wòa jè èmɔ ku nɔ̀vi wòa. Mawu kè lè jiŋùkusia ne kpɔ mìa ji lè funua eye ne kplɔ̀ mì gbɔ̀ sɛ̃sɛ̃ɖe ku gãgãɖe va gbɔ nyè. Eye yebe àtikplɔtɔa ne zɔ̃ èmɔ ku mì ne bèa kpɔ mìa ji, èvi nyè!» Kè Tobìa to ne bèa jè èmɔa, e kpla àsi èkɔ̀ na ètɔa ku ènɔa eye Tobì gblɔ̃ na ɛ̀ be: «Èmɔ ne kɔ̀!»

¹⁸Ènɔa lɔ àvi eye e to na Tobì be: «Nukɛ ŋuti wò ɖo èvi nyè be èmɔji yìyi ɖo ò? Mu nyi e ye le do mi àlɔa, e ya àmè kè yìnà, gbɔ̀nà lè ŋùkɔ̀ na mia?

¹⁹Nukɛ ègà nyi ò! Co èvi xɔ̀ àsì wu ègà.

²⁰Àgbè zã kè Mawu na mia sù mi xoxo vɔ̀.»

²¹Vɔ̀a e gblɔ̃ na ɛ̀ be: «Mù gbà ci jojoe ò: ènu sia ènu la zɔ̃ nyuɛ̃ɖe na miabe èvia lè yìyi ku gbɔ̀gbɔ va mia gbɔa mè eye àpo ŋùkuviwo la kpɔ ŋùkèkè kè ji e la trɔ gbɔ̀ va gbɔ wò gãgãɖea.

²²Mù gbà ci jojoe ò, mù gbà vɔ̃ ɖo woa nu ò, èsrɔ̃ nyè: àtikplɔtɔ nyuɛ̃tɔ ɖe la do èvè na ɛ̀, yebe èmɔ zɔ̃zɔ̃a la jè eji eye e la trɔ gbɔ̀ va gãgãɖe.»

²³Eye e nɔ̀tè àvi fãfã.