Read gen TOBÌ 6 Bible Online

TOBÌ 6 - gen bible

TOBÌ 6

¹Ɖèkajɛa jè èmɔ eye àtikplɔtɔa lè ku ì; àvũ cã jè èmɔ kudo è eye e kpàsà woa do. Eye woa àmè èvèa wo zɔ̃ le yì. Kè èzã cucugbãtɔ̀ doa, wo dro ɖo Tigrò be ètɔ̀a to.

²Ɖèkajɛa ɖì jè Tigrò mè, klɔ àfɔ̀. Troloa ètɔ̀mèlã lòlo ɖe tìkpo so èsìa mè eye e jro la mì àfɔ̀ na ɛ̀. Ɖèkajɛa do àpa.

³Àtikplɔtɔa to na ɛ̀ be: «Le è eye zĩ ì ɖɛ!» Ɖèkajɛa jè èlãa ji eye be dɔ̃ ɛ̀ va àgo.

⁴Àtikplɔtɔa gblɔ̃ na ɛ̀ be: «Ko è, ɖè vevea, èjìa ku àgòa, sɔ wo ɖo èvò, e yomèa, sɔ àdɔ̀mènuwo dã ŋùgbe, ɖoa vevea, èjìa ku àgòa nyi èdɔ̀dànu vevewo.»

⁵Ɖèkajɛa ko èlãa, ɖè vevea, èjìa ku àgòa, e yomèa, e mɛ̀ kpɔ̀tɔ̀a be èɖea be ɖù ì eye e sɔ èɖea sɔ do èjè.

⁶Wo àmè èvèawo gbà le èmɔ ɖodu kaka ɖo Medìa be lipòwo gbɔ.

⁷Eŋua ɖèkajɛa biɔ àtikplɔtɔa be: «Àzarìa, nɔ̀vi nyè, èdɔ̀dànu kɛ ŋutɔ tutu ye lè èlã be èjì ku àgòa kudo yebe vevea mè ò?»

⁸E ɖoeŋuti na ɛ̀ be: «Ne gbɔ̃gbɔ̃ vuɛ̃ ɖe le ɖèfũ na àmè ɖea, wò la tɔzò ètɔ̀mèlã be èjì ku àgòa, la zã àzìzɔa lè ŋusù àlo nyɔnù kèa be ŋùkɔ̀ eye gbɔ̃gbɔ̃ nyrãku kèa la na ɛ̀ àsà trolo: Nɔ̀nɔmè kèa la vɔ̀ eye mu la gbà jɔ̀ kpɔ gbèɖe ò.

⁹Lè vevea tɔ̀ gomèa, wòa sì ì ɖo ŋùkuviwo ji na àmè kè be ŋùkuviwo ji àyuwo lèa, wòa plu àya ɖo woa ji eye wo la jè emè.»

¹⁰Wo ɖo Medìa xoxo eye wo le gogo Ekbàtanà vɔ̀,

¹¹kpoa Rafàɛl tɔgbè ɖèkajɛa be: «Tobìa, nɔ̀vi nyè!» E ɖoeŋuti be: «Ènyè ye kè!» Àtikplɔtɔa gblɔ̃ na ɛ̀ be: «Mi ɖo la zɛ̃ Ragùɛl gbɔ fiɛ̃si yà; e nyi àpo xòmètɔ ɖèka. Èvi nyɔnùvi ɖèka lè e si kè tɔ Sarà.

¹²Ŋusù kèa nyi àpo xòmètɔ eye e ɖo nyɔnùvi kè tɔ̀ Sarà. Mu gbà ɖo ŋusùvi àlo nyɔnùvi ɖekpe ò: èwò ye nyi xòmètɔ kè gogo è wua eye tɔ̀wò nyi be wò la xɔ ɛ̀ jè ŋùkɔ̀, nèneke tɔ̀wò ye le nyi jɔ̀jɔɛa be wòa xɔ̀ ètɔa be ècrɔ̃nu. E nyi nyɔnùvi jè àyè, dona veve ènu, fɛwuwɔ̀wɔ lè e si ŋutɔ eye ètɔa nyi àdɔ̀mènyuɛ̃wɔ̀tɔ.»

¹³Eye e gbà gblɔ̃ be: «E sɔ̀gbè be wò ɖo la ɖè è. Ɖoto mù, nɔ̀vi, fiɛ̃si ya ke, mù la pò nupo so nyɔnùvia ŋuti na ètɔa ne mia teŋu xɔ̀ ɛ̀ sìgbè àgɔ̀sɔ nène na wò; eye ne mi gbɔ̀ so Raguɛs vɔ̀a, mi la wɔ̀ yebe èsrɔ̃ɖèɖea. Mù nya be Ragùɛl mu la teŋu gbe è na wò àlo la sɔ ɛ̀ àgɔ̀ na àmè bu gbèɖe ò, ɖo ènu kè ŋutia zɔ̃ ɖo Mɔsè be xoma be kòjosòsoa jia e la kè jè na èku, ɖo kè e nya be èwò ye jè ŋùkɔ̀ la xɔ̀ yebe èvi nyɔnùa ɖè. Eŋua kpoa, ɖoto mù, nɔ̀vi nyè, so fiɛ̃si yà zè ɖèka, mi la gblɔ̃ nyɔnùvia be ènyà eye mi la biɔ ɛ̀ na èsrɔ̃ɖèɖe ku wò; eye ne mi trɔ so Raguɛs vɔ̀a, mi la xɔ̀ ɛ̀, la kplɔ̀ ɛ̀ yì àxomè kudo mi.»

¹⁴Eŋua Tobìa ɖoeŋuti na Rafàɛl be: «Àzarìa, nɔ̀vi nyè, mù sè be wo na ɛ̀ àsu kpɔ zè adrɛ̃, eye èsrɔ̃awo kpata ku lè èsrɔ̃ɖèxuea: èzã kè mè tutu èsrɔ̃awo gɛ̃ ɖo e gbɔa, wo ku. Mù sè àmèwo gblɔ̃ be gbɔ̃gbɔ̃ vuɛ̃ ɖe ye wù wo.

¹⁵Ekèa ŋuti fifìa mù le vɔ̃. Lè etɔ̀ gomèa, gbɔ̃gbɔ̃ vuɛ̃a mu wɔ̀nà ènu bàɖà ɖe na ɛ̀ ò, vɔ̀a ne àmè ɖe ji be yèa gogo è kpòa, e wùnà ɛ̀. Mù nyi èvi àkòŋùgò na ètɔ nyè. Ne e nyi be mù la kè kua, ma va dɔ̃ ètɔ nyè ku ènɔ̀ nyè be àgbèa yì èyɔ̀ mè, ɖɔ ku vevesèse ɖo èta nyè. Eye wo mu ɖo èvi bu kè la va ɖì wo ò.»

¹⁶Rafàɛl gblɔ̃ na ɛ̀ be: «Wò ŋlɔ̀be ètɔ wò be ètopoɖowo, àleke be gblɔ̃ na wò be wò la ɖè nyɔnù so ètɔ wò be hɛ̃nua? Mia yì kpò, ɖoto mù, nɔ̀vi nyè, mù gbà ci jojoe ɖo gbɔ̃gbɔ̃ vuɛ̃ kèa ŋuti ò, eye yì ɖè è. Lè ègo bu mèa, mù nya be fiɛ̃si kèa ŋutɔa wo la sɔ ɛ̀ na wò ne bèa nyi èsrɔ̃ wò.

¹⁷Gãke ne wò ɖo èsrɔ̃ɖèxɔa mè vɔ̀a, sɔ ètɔ̀mèlã be àgò be àkpa ɖe ku èjìa eye dà wo ɖo lififiɔ̃nua be èzòka ji. Hɔ̃hɔ̃ɛa la gbã ɖo funu eye gbɔ̃gbɔ̃ vuɛ̃a la gbɔ̃ ɛ̀; e la si jo eye wo mu la gbà va kpɔ ɛ̀ gbèɖe la trɔ do è kpɔ ò.

¹⁸Ne wò va e gbɔ dɔ̃gbea, mia àmè èvèa mì sitè jè ŋùkɔ̀, ne mìa fãkue eye mì blìbɔ̀ na jiŋùkusi be Tɔhonɔ̀ be ne na mì màje ku àmèhlùɛ̃gã. Mù gbà vɔ̃ ò, ɖo èwò wo cã ɛ̀ dàɖɛ na so xoxoxòxò eye èwò ye ɖo la hlùɛ̃ ɛ̀ gã. E la kpàsà wò do eye mù kãɖoji be e la jì èvi kèwo la nɔ̀ na wò sìgbè nɔ̀viwo nène. Mù gbà ci jojoe ò.»

¹⁹Kè Tobìa se Rafàɛl be ènyàwo vɔ̀ eye e nya be Sarà nyi yè nɔ̀vi, jɔ̀ so ètɔa be kɔ̀ta ku xòmè mèa, e lɔ̃ ɛ̀ ku lɔ̃lɔ̃ tɔ̀xɛ eye yebe èjìa tɛ ɖo e ŋuti kpãmi.