Read gen TOBÌ 7 Bible Online

TOBÌ 7 - gen bible

TOBÌ 7

¹Kè wo le ɖo Ekbàtanà troloa, Tobìa gblɔ̃ be: «Àzarìa, nɔ̀vi nyè, kplɔ̀ mù flɔlɔ yì mia nɔ̀vi Ragùɛl gbɔ.» Àtikplɔtɔa kplɔ̀ ɛ̀ yì Ragùɛl-xomè. Wo kpɔ ɛ̀ lè ànyinɔ̀nɔ lè àwa be àgbonu eye wo jè ŋùkɔ̀ dogbè na ɛ̀. E gblɔ̃ na wo be: «Mù le xɔ̀gbè na mì loo, nɔ̀viwo, mìa woézɔ̃!» Eye e na wo ɖo yebe àxuea mè.

²E gblɔ̃ na èsrɔ̃a Ɛdnà be: «Ɖèkajɛvi yà ɖì nɔ̀vi nyè Tobì ŋutɔ loo!»

³Ɛdnà biɔ wo sè eye e gblɔ̃ be: «Nɔ̀viwo, fikɛ-tɔ mì nyi ò?» Wo gblɔ̃ na ɛ̀ be: «Mi so Neftalì, va nyi àhùalewo lè Nìnivè.»

⁴E gblɔ na wo be: «Mì jèsi Tobì, mia nɔ̀via?» Wo gblɔ̃ na ɛ̀ be: «Ɛ̃ɛ, mi jèsi ì.»

⁵E gblɔ̃ na wo be: «E fɔ̃ nyuɛ̃ɖea?» Wo gblɔ̃ na ɛ̀ be: «E lè àgbè gbà lè sɛ̃sɛ̃ɖe.» Eye Tobìa yì eji gblɔ̃ be: «Ètɔ nyè ye.»

⁶Ragùɛl sitè piam eye e kpla àsi èkɔ̀ na ɛ̀ ku lɔ̃lɔ̃vivi eye e fã àvi. E yomèa, e gblɔ̃ na ɛ̀ be: «Sìtu na wò, èvi nyè. Ètɔ ɖɔ̀hũi ye wò ɖo nyàwo. Jɔ̀gbèvuɛ̃ gã kɛ nyi be ŋusù jɔ̀jɔɛ hati kèa, kè nana ènu fàa nènea, bèa trɔ ŋùkugbãgbãnɔ̀ ɖo!» Eye e kù kpla èkɔ̀ na nɔ̀vi Tobìa, gbà fã àvi.

⁷Èsrɔ̃a Ɛdnà cã fã àvi kɔ̀ ɖo Tobìa ji eye woabe èvi Sarà lɔ àvi fãfã nèneake.

⁸E yomèa, e wù yebe èlãhaa be àgbò ɖèka eye be xɔ̀ wo àmèjro ku zĩzĩ tɔ̀xɛ.

⁹Kè wo lè èsì eye wo nyì àfɔ̀ kɔklɔ be èkɔ̀ vɔ̀a, wàlɛbɛ kè wo nɔ̀ ànyi ɖo èkplɔ̃ ŋutia, Tobìa gblɔ̃ na Rafàɛl be: «Àzarìa, nɔ̀vi nyè, biɔ Ragùɛl be bèa sɔ nɔ̀vi nyè Sarà na mù.»

¹⁰Ragùɛl sè ènyà kèa eye e gblɔ̃ na ɖèkajɛvia be: «Ɖù ènu ne wòa nù eye wlui yɛyì lè wètrɔ kpa-ji, ɖo ènu kè ŋutia èmɔnu mu lè na àmè ɖeti bèa ɖè èvi nyè Sarà ò, ne mu nyi èwò nɔ̀vi nyè ò; eye nyè ŋutɔ cã nye mu kpɔ èmɔ be ma sɔ ɛ̀ na àmè bu ò, kè e nyi be wò nyi xòmè nyè troloa. Vɔ̀ gãkea, èvi nyè, ma to nyàwo bliboa na wò.

¹¹Mù sɔ ɛ̀ na ŋusù ɖèka ɖèka adrɛ̃ lè mia nɔ̀viwo dòmè eye woa kpata ku le èzã kè mè wo yi e gbɔa. Vɔ̀ fifìa, èvi nyè, ɖù ènu ne wòa nù eye Tɔhonɔ̀ la wɔ̀ ɖàgbèwo na mì.»

¹²Vɔ̀a Tobìa gblɔ̃ be: «Nyè mu la ɖù ènu àlo la nù ne wò mu sò ènyà ò.» Ragùɛl gblɔ̃ na ɛ̀ be: «Yoo, e nyɔ, mù la wɔ̀ ɛ̀. Kè e nyi be e ya nyi tɔ̀wò vɔ̀ zɔ̃ ɖo Mɔsè be xoma be ɖoɖo jia, Jiŋùkusi ye ɖo è be woa sɔ ɛ̀ na wò. Ye ŋutia xɔ̀ nɔ̀vi wòa. Sɔ so fifìa, wò nyi nɔ̀vi na ɛ̀ eye e cã nyi nɔ̀vi na wò. Wo sɔ ɛ̀ na wò so egbè ji kaka sɔyì. Jiŋùkusi be Tɔhonɔ̀ la wɔ be èzã kèa la nɔ̀ nyuɛ̃ɖe na mi, èvi nyè. Ne ɖè yebe ŋutifafa ku ŋuzĩzĩkuku fiɔ mì.»

¹³Gà ŋua mèa, Ragùɛl yɔ yebe èvi nyɔnùvia Sarà eye e va e gbɔ. Kè e le àsi na ɛ̀a, e sɔ ɛ̀ do àsi na Tobìa le gblɔ̃ be: «Xɔ̀ ɛ̀ zɔ̃ ɖo Èsea ji, gbà zɔ̃ ɖo èsedodo kè wo ŋlɔ̀ ɖɛ lè Mɔsè be xoma mèa ye le sɔ ɛ̀ na wò bèa nyi èsrɔ̃ wòa ji. Sɔ ɛ̀ eye wòa kplɔ̀ ɛ̀ kplakacɛ màkpɔ yì ètɔ wò gbɔ. Jiŋùkusi be Mawu ne kplɔ̀ mì lè ŋutifafa mè.»

¹⁴E yomèa, e yɔ Sarà be ènɔ̀a eye e to na ɛ̀ be bèa ji ènu ŋlɔ̀nuwo sɔ va. E ŋlɔ̀ èsrɔ̃ɖèɖe be ɖase-xoma be e sɔ èvia na yè be e nyi yè srɔ̃ zɔ̃ ɖo Mɔsè be Èse be ɖoɖoa ji. Gà ŋua mè kpò ye, wo tɔ ènuɖùɖu ku ènunùnu.

¹⁵Ragùɛl yɔ èsrɔ̃a Ɛdnà eye e gblɔ̃ na ɛ̀ be: «Nɔ̀vi nyè, jrà èxɔ̀ ɖetɔa ɖo eye kplɔ̀ Sarà yì ɖo e mè.»

¹⁶E yi jrà àbaa ɖo lè èxɔ̀a mè, sìgbè àlekè be gblɔ̃ ɛ̀ na ɛ̀a nène. E kplɔ yebe èvi nyɔnùvia ɖo e mè eye e tɔ àvifãfã ɖo e ji, e yomèa, e tutu yebe àɖàsìwo eye e gblɔ̃ na ɛ̀ be:

¹⁷«Dojì, èvi nyè, jiŋùkusi be Tɔhonɔ̀a ne trɔ àpo ènuxàxa wɔ̀ jìjɔɛ, dojì, èvi nyè.» Eye e to jo.