Read gen TOBÌ 8 Bible Online

TOBÌ 8 - gen bible

TOBÌ 8

¹Kè wo ɖù ènu eye wo nù ènu vɔ̀a, wo ji be yewoa mlɔ̃ ànyi. Wo kplɔ̀ ɖèkajɛa jo sɔ yì yebe èxɔ̀a mè.

²Tobìa ɖo ŋùku Rafàɛl be ènyà ji, eye e sɔ ètɔ̀mèlã be àgòa ku èjìa, ɖè wo to lè àkpɛtɛ mè eye be sɔ kɔ ɖo lififiɔ̃nua be èzòka ji.

³Ètɔ̀mèlã be hɔ̃hɔ̃ɛa xe èmɔ na gbɔ̃gbɔ̃ vuɛ̃a, àmè kèa si lè àyawo mè jo yì Ejiptè be nutowo mè. Rafàɛl yì funua, eye be bla ɛ̀ ku kɔ̀sɔ̀kɔsɔa zè ɖèka.

⁴Wàlɛbɛ kè àjìtɔawo to lè èxɔ̀a mè, tu hɔ̃trua, Tobìa sitè lè àbaa ji eye e gblɔ̃ na Sarà be: «Sitè, nɔ̀vi nyè, mia fãkue eye mia blìbɔ̀ na miabe Tɔhonɔ̀ be ne ɖè yebe màje kudo àmèhlùɛ̃gã fiɔ.»

⁵E sitè eye wo tɔ kuefãfã ku blìbɔ̀ blɩ̀bɔa, be ne yewoa va kpɔ àmèhlùɛ̃gã xɔ̀. È tɔ e ji gblɔ̃ be: «Mamlã na wò, mia ètɔwo be Mawu! Wo ne mlã àpo nyikɔ lè jìjimè kèwo gbãnà kpata mè! Jiŋùkusiwo ne mlã wò kudo àpo ènuɖoɖowo kpata na hùenuwo keŋu!

⁶Èwò ye ɖo Aɖàm, èwò ye ɖo àlɔ̀dotɔ ku zìɔ̃ɖoŋutimɛ ɖèka na ɛ̀, yebe èsrɔ̃ Evà, eye àmè èvè ŋuawo mè ye àgbètɔwo be kɔ̀ta jɔ̀ so. Èwò ye gblɔ̃ be: ‘Mu nyɔ ne ŋusù ɖèka bèa nɔ̀ ànyi ò, mia wɔ̀ àlɔ̀dotɔ ɖe kè ɖìa na ɛ̀’.

⁷Eŋua fifìa, mu nyi gbòlò wɔ̀wɔ ŋuti mù le ɖè nɔ̀vi nyè kèa ɖo ò, vɔ̀ bòhũa, èbè lele na ànùkua wɔ̀wɔ ye. Ɖè ègbè na ŋuzĩzĩkuku ne sù mia si, eye mia sù àmègã kuku mè ɖodu.»

⁸E yomèa, wo gblɔ̃ lè gbèkpli mè be: «Amèn, amèn!»

⁹Eye wo jo yì mlɔ̃ ànyi.

¹⁰Kplà Ragùɛl fɔ̃ eye e yɔ sumɔviwo bɔ̀. Wo to yì èyɔ̀do ɖèka kùgbe. Ɖoa Ragùɛl gblɔ̃ na ye ɖokoe be: «E teŋu jɔ̀ be e la ku; mi la va nyi ènu ɖì kòkoe gbà ɖɔ ku ŋùkpɛ̃.»

¹¹Kè wo kù èdoa vɔ̀a, Ragùɛl trɔ va àxomè eye e yɔ èsrɔ̃a.

¹²E gblɔ̃ na ɛ̀ be: «Dɔ̃ àpo sumɔvi nyɔnù ɖèka ɖoɖa èxɔ̀a mè ne bèa kpɔ be Tobìa lè àgbè màa: lè ekèa mèa, ne e kua, mia teŋu ɖì ì, kè àmè ɖekpe mu la nya ènu ɖeti ò.»

¹³Wo sìa sumɔvi nyɔnùa, wo sũ kãligbɛ̃ eye wo hũ hɔ̃trua; e ɖo èxɔ̀a mè eye e kpɔ wo lè èdu lè àlɔ̃ mè boo.

¹⁴E to eye e sìa wo be e lè àgbè, ènu bàɖà ɖekpe mu kpe è ò.

¹⁵Ragùɛl mlã Mawu gblɔ̃ be: «Wo ne mlã wò ku mamlã ɖù blibo ɖe sia ɖe, oò Mawu!

¹⁶Wo ne mlã wò ɖo wò ɖɔ mù ku jìjɔɛ! Ɖoa ènu kè mù susua mu jɔ̀ ò, vɔ̀a wò wɔ̀ ku mi zɔ̃ ɖo àpo ŋuzĩzĩkuku gã ji.

¹⁷Wo ne mlã wò ɖo wò kpɔ ɖo e mè na ɖèvi àkòŋùgòvi èvèawo! Àpetɔ, ɖè àpo ŋuzĩzĩkuku ku àmèhlùɛ̃gã fiɔ wo. Ɖɔ woabe àgbèa ku jijɔɛ kudo màje.»

¹⁸Eye e ɖègbè na yebe sumɔviwo be wo ne tu èyɔ̀doa gbɔ̀xue èŋù ne kè.

¹⁹Ragùɛl to na èsrɔ̃a be ne mɛ̀ kpɔ̃nɔ lè gbɔsùsu mè, e yomèa, e yì èlãkpa mè eye e kplɔ̀ ènyì-su èvè ku àgbò ènè eye e na wo ɖà wo. Eye wo tɔ àzãa be jàjràɖowo ji.

²⁰E yɔ Tobìa va eye e tɛgbè ɖo e ji na ɛ̀ be: «Kaka sɔ na ŋùkèkè woènè (14) àpo àfɔ̀ ɖèka mu la ɖè lè fiyè ò, vɔ̀a wò la ci fikèa la nɔ ɖù ènu, nɔ nù àhà lè gbɔ nyè, eye wò la gbìgbɔ̀ sɔ jìjɔɛ ɖo èjì mè na èvi nyè nyɔnùvia kè gbà kpɔ̀tɔ̀ lè gbèsì gɔ̃mèa.

²¹Mù la sɔ àpe àdɔ̀kùnuwo kpata be màmamè na wò, eye wò la trɔ kplakacɛmàkpɔ yì ètɔ wò gbɔ. Màmamè ɖetɔa la va trɔ zũ mìa tɔ̀ ne mi va ku vɔ̀a. Dojì, èvi nyè, ètɔ wò mù nyi eye Ɛdnà nyi ènɔ̀ wò. Mi lè na wò ku nɔ̀vi wò nyɔnùa so fifìa kaka sɔyì, dojì, èvi nyè.»