Read gen Yudìt 1 Bible Online

Yudìt 1 - gen bible

Yudìt 1

¹Èpè woèvègɔ̃a (12) kè Nèbùkàdnɛzà ɖùfìɔ lè Àsirìatɔwo nu lè Nìnivè, èdù gã, Àrfaksàd le ɖùfìɔ lè Medìatɔwo nu lè Ekbàtanà.

²Àmè kèa sɔ èkpe kpàkpawo sɔ tù àgbògbòwo trɔ do Ekbàtanà, kèwo be kèkemè sù àbɔglìgo ètɔ̃ kudo dìdimè yì àbɔglìgo àdɛ̃: e ɖo àgbògbòa be jiyìyimè sùtè àbɔglìgo èkà takpo ci èwo (70) ku yebe kèkemè sù àbɔglìgo èkà ci èwo (50).

³E tù tawà ɖo àgbowo nu, kèwo be jiyìyi sù àbɔglìgo èkà èvè takpo (100) eye e ɖo dodoe kèwo be kèkemè lè àbɔglìgo èkà takpo (60).

⁴E wɔ̀ hɔ̃truwo; hɔ̃tru kèawo be jiyìyimè lè àbɔglìgo èkà takpo ci èwo (70) eye dìdimèa lè àbɔglìgo èkà ɖèka (40), sɔ dàɖɛ na yebe àhùawɔ̀tɔwo be dùkɔ̃ ku àhùawɔ̀tɔ kèwo zɔ̃nàwo be èhasòsowo be toto yì.

⁵Lè ŋùkèkè ŋuawo jia, Nèbùkàdnɛzà sɔ àhùa yì kpe èfìɔ Àrfaksàd lè gbàjà gã ji kè nyi Ragò be ènutowo be gbàjà jia.

⁶Èto nyigbã ji tɔwo kpata ɖota e gbɔ, kudo àmè kèwo kpata nɔ̀nà Efratà, Tigrò ku Hìdaspè be ètɔ̀wo to, kudo Arìɔk, Èlimètɔwo be èfìɔa be bàlìmètɔwo gbàkudo dùkɔ̃ gbogbowo, wo va kpe èta la yì wɔ̀ àhùa ku Keleùd be èviwo.

⁷Nèbùkàdnɛzà, Àsirìatɔwo be èfìɔa, dɔ̃ àŋɛ̀ɖotɔwo ɖoɖa Pɛrsìatɔwo kpata ku àmè kèwo kpata lè èwèɖoxɔ̀pe be ènutowo mèa kudo àmè kèwo nɔ̀nà Kìlikìa, Dàmaskò, Libàn ku Libàn be èwèzɛ̃pea kudo àpùtatɔwo,

⁸àmè kèwo jɔ̀ so dùkɔ̃ kèwo lè Karmɛ̀l, Galad, Gàlìlea àvegotɔ̀a, ku Esdrelɔ̀n be gbàjà gã ji,

⁹Sàmarìa ku yebe èdùwo kudo kèwo lè Yɔrdàn godo kaka yì Yeruzàlɛm, Bàtaneà, Kelùs, Kadɛ̀s, Ejiptè be ètɔ̀ to, Tafnɛ̀s, Ramsɛ̀s gbàkudo Gosɛ̀m be ànyigbã bliboa,

¹⁰kaka yì Tanìs ku Mɛnfìs be àgo ɖea ji, ku àmè kèwo kpata nɔ̀nà Ejiptè kaka yì jè Etiopìa be lipòwo ji.

¹¹Ànyigbã ŋuawo ji nɔ̀tɔwo kpata crì Nèbùkàdnɛzà, Àsirìa fìɔa be ènyà eye wo mu bɔ̀ ɖodu na àhùawɔ̀wɔ ò, ɖo wo mu vɔ̃na ɛ̀ ò, ɖo àgbètɔ kpò be nyi na wo, wo tù àdãfɔ̀tè ɖo e ŋuti eye wo nyà yebe àŋɛ̀ɖotɔwo àsi gba àlɔ̀ gba ku ŋùkpɛ̃.

¹²Nèbùkàdnɛzà do àdɔ̀mèze veveɖe ŋutɔ ɖo ànyigbã ŋua ji tɔwo kpata eye e tà yebe fìɔzìkpe ku yebe fìɔdua be yè la biɔhlɔ̃ lè Kìlikìa, Dàmaskò ku Sirìa si eye nèneake yè la sɔ èwui sɔ crɔ̃ Mòabviwo, Amɔ̀nviwo, Yudà bliboa ku Ejiptèviwo kpata kaka va ɖo àpù èvèawo be lipòwo ji.

¹³Ye ŋutɔ ku yebe àhùakɔ̃a yì kpe àvũ ku èfìɔ Àrfaksàd, lè èpè woeadrɛ̃gɔ̃a (17) mè, eye e ɖù e ji lè àhùa ŋua mè eye e nyà Àrfaksàd be àhùakɔ̃ bliboa ɖo gbe ku yebe èsɔdotɔwo kpata kudo yebe àhùakèkewo keŋu;

¹⁴E ɖo àsi yebe èdùwo ji, e va ɖo kaka Ekbàtanà, e xɔ̀ yebe tawàwo, e hlà yebe ègòdope gbàjàwo eye e sɔ yebe èglowɔ̀nua trɔ àlɔmèɖènu.

¹⁵E va ke ɖo Àrfaksàd ŋuti lè Ragò be èto nyigbã ji, e dà yebe àkplɔ̀wo ŋɔ ɛ̀ eye be crɔ̃ ɛ̀ gbidi.

¹⁶E trɔ gbɔ̀ va Nìnivè kudo wo: ye ŋutɔ ku àhùkɔ̃a, gbãdãgbãwo be èha gãɖe; e ci funua lè gbɔ̃jɛ̃, le ɖù àgɔ, ye ku yebe àhùakɔ̃a sɔ na ŋùkèkè èkà ètɔ̃ (120) sɔ̃ŋu.