Read gen Yudìt 11 Bible Online

Yudìt 11 - gen bible

Yudìt 11

¹Hòlofernɔ̀ gblɔ̃ na ɛ̀ be: «Gbɔ̃ jì ɖɛ, nyɔnù, mù gbà vɔ̃ ò, ɖo nyè mu wɔ̀ èvuɛ̃ ɖe ku ŋusù ɖe kè lɔ̃ be yèa sumɔ Nèbùkàdnɛzà, ànyigbã bliboa be èfìɔa ò.

²Eye fifìa, ne àpo dùkɔ̃ kè nɔ̀nà èto nyigbã be nutomèa mu crì mù òa, nyè mu la kè sɔ àpe èhuã ɖo e ji ò. Vɔ̀a wo wɔ̀ ɛ̀ na woa ŋutɔ ɖokoe.

³Fifìa, to ènu kè ŋuti wò si jo lè woa gbɔ eye wò va mia gbɔ ɖoa na mù. Ɖekpekpe ɖea, wò va be yèa hlùɛ̃ yèbe àgbè gã, mu nyi nène yea? Àgbɔ̃ ne jèpò na wò! Wò la nɔ̀ àgbè èzã kèa kudo èsɔ̀ godo cã.

⁴Àmè ɖekpe mu la wɔ̀ màjɔ̀ màjɔ ɖe ɖo ŋuti wò ò; bòhũa, wo la kpɔ ji wò nyuɛ̃ɖe, sìgbè àpetɔ nyè, èfìɔ Nèbùkàdnɛzà be sumɔviwo ke nène.»

⁵Yudìt gblɔ̃ na ɛ̀ be: «Xɔ̀ àpo kluvia be ènyàwo, àpo sumɔvia ne pò nupo lè ŋùkɔ̀ na wò eye nyè mu la gblɔ̃ àjènya ɖekpe na àpetɔ nyè èzã kèa mè ò.

⁶Ne wò kplɔ̀ àpo sumɔvia be ènyàwo doa, Mawu la wɔ̀ yebe èdɔa kudo wò eye àpetɔ nyèa mu la va jèsi gbledo lè yebe èdɔ sɔsɔwo mè ò.

⁷Mù tà Nèbùkàdnɛzà, ànyigbã bliboa be èfìɔ, be àgbè be e dɔ̃ wò ne wòa sɔ àmè ɖekpekpe dà ɖo èmɔ nyuɛ̃a ji. Wò ɖèka kpò ye la na àmèwo la bù èfìɔ. Wu ekèa, àpo ŋusɛ̃a ye la na be ègbemèlãwo, èlãhawo kudo xèviwo la teŋu ci àgbè na èfìɔ Nèbùkàdnɛzà kudo yebe xòmèa.

⁸Ɖoa mi sè wo pò nupo so àpo nunyanya ku gbɔ̃gbɔ̃ mè be bibi ŋuti. Àmè sia àmè nya be wò donajì ŋutɔ eye wò ŋɔjè àhùa wɔ̀wɔ mè nyuɛ̃ɖe.

⁹Sɔ kù ɖo nupo kè Akìɔr pò lè àpo àɖàŋùɖoha mèa ŋutia, mi sè yebe ènyàwo, ɖo Betulìa be èdùmètɔwo hlùɛ̃ ɛ̀ gã eye e kã ènu kèwo kpata be gblɔ̃ lè àpo ŋùkumèa ta na wo.

¹⁰Ekèa ŋuti ye, àpetɔ ku tɔhonɔ̀ nyè, mù gbà ɖèkɔ̀ lè yebe nupo ŋuti ò, vɔ̀a le è ɖo èjì mè, ɖo nyàwo ye be nyi. Ɖo miabe kɔ̀ta mu la xɔ̀ ètodɔ̃ ò, èwui mu la ɖù e ji ò: ne e gbea, e wɔ̀ nuvuɛ̃ ɖo yebe Mawua ŋuti ye.

¹¹Eye fifìa, àpetɔ nyè mu la trɔ ŋùgbe ŋùgbe ku ŋusɛ̃màɖo tɔ̀ ò. Èkujèsu la zrò jè woa ji, nuvuɛ̃ bla wo, wo gbà fɔ̃ Mawu be àdɔ̀mèzea ke.

¹²Ekè ne nuɖùɖu dɛ̃ wo eye èsìkpɔkpɔ va ve gloa, wo ɖo susu be yèwoa ɖù yèwo be èlãhawo ku ènu kèwo kpata be èse Mawu do na yèwoa fàa.

¹³Eli be kusɛ̃sɛ̃ cucugbãwo, vɛ̃ ku àmì be àkpa èwogɔ̃ kèwo wo ɖo kɔ̀kɔɛɖe eye wo le ɖɛ na hũbonɔ kèwo nɔ̀nà tènu le miabe Mawua be ŋùkumè lè Yeruzàlɛm, wo ɖoe kplikpã be yèwo la ɖù wo, vɔ̀a èmɔ ɖèɖe mu lè na àmè ɖeti lè dùkɔ̃a dòmè bèa do àsi woa ŋuti ò.

¹⁴Wo dɔ̃ àmèwo ɖoɖa Yeruzàlɛm, funutɔwo cã wo wɔ ekea, be woa xɔ̀ àmègãwo be àɖàŋùɖèha be ègbè nana va na yèwo.

¹⁵E la va jɔ̀ be wàlɛbɛ kè ekèa la va ɖo woa gbɔ eye wo la wɔ̀ ɖo e jia, gbè ŋua gbè ke, wo la sɔ wo na wò na woabe cɔ̃crɔ̃.

¹⁶Ye ŋuti ye, ènyè sumɔvi wòa, kè mù sè ènu kèa kpata vɔ̀a, mù si jo lè woa gbɔ eye Mawu dɔ̃ mù be ma bɔ̀ ɖo ŋuti wò wɔ̀ èdɔ kèwo ŋuti ànyigbã bliboa la ku bòbò, kaka jè àmè kèwo kpata la va sèa cã ji.

¹⁷Ɖo kluvi wò nyɔnùa sɛ̃nà Mawu: e sumɔna jiŋùkusi be Mawua èzã ku kedè. So fifìa mù la nɔ̀ gbɔ wò, tɔhonɔ̀ nye, kluvi wò nyɔnùa la nɔ to èzã mè yì bàlìa mè eye mù la nɔ fãkue na Mawu kè la to gà kè mè àmè kèawo la wɔ̀ woabe vuɛ̃awo.

¹⁸Mù la va kã e ta na wò eye wò ya, wò la to ku àpo àhùakɔ̃ bliboa, eye àmè ɖekpe mu lè woa dòmè, la teŋu nɔ̀tè ò.

¹⁹Eye mù la kplɔ̀ wò to Yudeè bliboa kaka wò la va sùtè Yeruzàlɛm be ŋùkɔ̀: mù la sɔ àpo fìɔzìkpea ɖotè lè dòdòmè eye wò la kplɔ̀ wo sìgbè àlɛ̃ kèwo mu ɖo kplɔ̀tɔ ò, àvũ ɖèka tètè mu la gbo ɖo ŋuti wò ò. Ɖo wo gblɔ̃ ekèa na mù xoxo zɔ̃ ɖo àpe ènunya jè ŋùkɔ̀ ji eye wo dɔ̃ mù ɖoɖa be ma va kã e ta na wò.»

²⁰Yebe ènyàwo jɔ̀jì na Hòlofernɔ̀ kudo yebe àhùakplɔ̀tɔwo kpata; yebe nunyanya wɔ̀ ŋùdã na wo eye wo gblɔ̃ be:

²¹«Nyɔnù hati ɖekpe mu lè so ànyigbã be àgo ɖe yì àgo bu, ɖo ŋùmè be nyɔnyɔ kudo ènyàwo be nunyanya sìgbè nyɔnù kèa ò.»

²²Hòlofernɔ̀ gblɔ̃ na ɛ̀ be: «Mawu wɔ̀ nu nyuɛ̃ɖe kè be dɔ̃ wò ɖoɖa jè ŋùkɔ̀ na dùkɔ̃a, ne bèa sɔ hɔ̃hlɔ̃ do àsi na mù gbàkudo cɔ̃crɔ̃ na àmè kèwo crì àpetɔ nyèa.

²³Na wòa, wò jè tùgbɛ̀jɛ gbà ɖo àɖàŋù lè àpo ènyàwo mè. Ne wò wɔ̀ sìgbè àlekè wò gblɔ̃ ɛ̀a nènea, àpo Mawu la nyi àpe Mawu, èwò ŋutɔa, la nɔ èfìɔ Nèbùkàdnɛzà be àxomè eye wò la ɖìnyi lè xixea kpata mè.»