Read gen Yudìt 14 Bible Online

Yudìt 14 - gen bible

Yudìt 14

¹Yudìt gblɔ̃ na wo be: «Mì ɖoto mù, nɔ̀viwo. Mì xɔ̀ èta yà, mì kù ì sekple ɖo miabe àgbògbòa be tamè yì ji hũia.

²Eŋua ne èŋù la kè eye dɔ̃ŋùkusu la hũ ɖo ànyigbã jia, àmè sia àmè, la sɔ yebe àhùawɔ̀nuwo; ŋusù ɖo ŋusɛ̃wo kpata, mì la to lè èdùa mè. Mì ɖo ŋùkɔ̀nɔ̀tɔ ɖèka na mìa ɖokoe sìgbè mì le ɖùɖù yì gbàjà ji, tùtà Àsirìaviwo be ɖiatɔwo gbɔ nène, vɔ̀a mì mu gbà ɖì ò.

³Àmè kèawo la sɔ woabe èlãnuwo, la dri ɖo woabe àsàɖa mè; wo la nyɔ Àsirìa be àhùakɔ̃a be àhùagawo; woawo ya la pudù yì Hòlofernɔ̀ be gòxɔa mè eye wo mu la kpɔ ɛ̀ ò. Vɔ̃vɔ̃ la jè woa ji eye wo la si jo boo lè ŋùkumè na mi.

⁴Eye mì ku Izràɛlviwo kpata, mì la tĩ woa yomè, yì pò wo wù lè woabe sìsi be èmɔwo ji.

⁵Vɔ̀a gbɔ̀xue mì la wɔ̀ ɛ̀a, mì yɔ Akìɔr Àmɔ̀nvia na mù ne bèa va kpɔ eye bèa jèsi àmè kè pònu bàɖà ɖo Izràɛl be àxuedoa ŋuti eye be ɖo è ɖoɖa mia dòmè na èkua.»

⁶Wo yɔ Akìɔr to so Ozìas be àxomè. Kè e va eye be kpɔ Hòlofernɔ̀ be èta lè dùkɔ̃a be ŋusù ɖèka sia, e jèklò, cɔ̃ ŋùmè ànyi eye gbɔ̃gbɔ̃ cipò na ɛ̀.

⁷Kè wo fɔ̃ ɛ̀ ɖotèa, e jè Yudìt be àfɔ̀ ji, e blìbɔ̀ lè ŋùkɔ̀ na ɛ̀ eye e gblɔ̃ be: «Sìtu na wò lè Yudà be gòxɔwo kpata be dòmè kudo dùkɔ̃ kèwo kpata la sè àpo nyikɔ ye wo la pò tìtìtìa dòmè.

⁸Fifìa, to ènu kè kpata wò wɔ̀ lè ŋùkèkè kèawo mèa, na mù.» Yudìt kã e ta na ɛ̀ lè dùkɔ̃a dòmè àlekè be wɔ̀a kpata ɖo so gbè kè gbè be so to lè èdùa mè kpà kaka va ɖo wàlɛbɛ kè be le pò nupo na woa.

⁹Kè e wu nupoa nu vɔ̀a, dùkɔ̃a kpà àbobo sɛ̃sɛ̃ɖe eye jìjɔɛ be àpadodowo ɖì lè èdùa mè.

¹⁰Kè e kpɔ ènu kè kpata Izràɛl be Mawu wɔ̀a, Akìɔr xɔ̀ Mawu ji sè àkòŋùka, e na wo sò àyu na ɛ̀ eye e bɔ̀ha kudo Izràɛl be àxuedoa kaka na egbè egbè.

¹¹Wàlɛbɛ kè èŋù kèa, wo sɔ Hòlofernɔ̀ be ètaa, kù sekple ɖo àgbògbòa ŋuti. Ŋusù ɖe sia ɖe sɔ yebe àhùawɔ̀nuwo eye woa kpata wo to èhasòso èhasòso yì ètoa be àbùɖìɖiwo ji.

¹²Kè Àsirìatɔwo kpɔ woa, wo dɔ̃ àmè ɖoɖa woabe ŋùkɔ̀nɔ̀tɔwo; àmè yàwo yì sìa woabe àhùagawo, woabe àmè èkà wìvɔàtɔ̃wo (1000) be ègawo ku woabe àhùakplɔ̀tɔwo.

¹³Wo yì Hòlofernɔ̀ be gòxɔa nu eye wo gblɔ̃ na àmè kè kpɔna yebe ènyàtiwo kpata jia be: «Gbe yì kpò, nyɔ̀ miabe tɔhonɔ̀a, ɖo kluviawo xà ɖì va la wɔ̀ àhùa ku mi, co wo la crɔ̃ kaka jè mlɛ̃a ji.»

¹⁴Bagòa gɛ̃ ɖo e mè eye e pò àsikpe lè gòxɔa mɔnu, ɖo e le susu be Hòlofernɔ̀ le dɔ̃ àlɔ̃ ku Yudìt.

¹⁵Vɔ̀a kè àmè ɖekpe mu sè ɖoŋuti ɖe òa, e ɖè ŋutivɔa ɖo àkpa ɖèka eye be ɖo mlɔ̃pea eye e kpɔ ɛ̀ kuku lè àfɔ̀glanu ji, èta sò jo lè ŋutilã ŋuti.

¹⁶Bagòa do àpa ku ègbè sɛ̃sɛ̃ɖe ku àlenanawo kudo ŋɛ̀ŋɛwo gbàkudo àdã be àpadodowo eye e trɛ̃ yebe àwùwo lè èkɔ̀.

¹⁷E ɖo gòxɔ kè mè Yudìt nɔ̀nà eye mu kpɔ ɛ̀ ò. E sidù jàjàjà yì àhùakɔ̃a gbɔ lè àpa dodo ji be:

¹⁸«Kluviawo viɔ̃ e nu: Hebrù nyɔnù ɖèka pɛ sɔ ŋùkpɛ̃ ɖo èfìɔ Nèbùkàdnɛzà be àxuea mè. Ɖoa Hòlofernɔ̀ lè ànyigbã, eye èta mu gbà lè e ŋuti ò.»

¹⁹Ekè wo sè ènyà kèawoa, Àsirìa be àhùakɔ̃a be ègawo zɛ̃ woabe èjiwuwo lè èkɔ̀; woabe èkla mè blù to e mè. Wo tɔ àpadodo, le gbo hòo lè àsàɖa kpata mè.