Read gen Yudìt 15 Bible Online

Yudìt 15 - gen bible

Yudìt 15

¹Wàlɛbɛ kè Àsirìa be gbãdãgbã kèwo lè gòxɔwo mèa sè ènyàa, wo kã yà lè ènu kè jɔ̀a mè.

²Èha lɔ àmè ku vɔ̃vɔ̃ jè woa ji: ŋusù ɖekpe mu gbà ci ye havi gbɔ ò; vɔ̀a woa keŋu wo kãkã zè ɖèka, wo si kã ɖogbe lè gbàjà ji ku èto nyigbã be èmɔwo kpata ji.

³Àmè kèwo bɔ̀ lè àsàɖa lè èto nyigbã ji be ènuto mè trɔ do Betulìa cã, wo tɔ sisi jo. Eŋua Izràɛlviwo, ŋusù àhùawɔ̀tɔwɔ lũ ɖo woa ji.

⁴Ozìas dɔ̃ àmèwo ɖoɖa Bètomèstaìm, Bebài, Kobà, Kolà ku Izràɛl be ènutowo mè ne woa ɖè ènu kè jɔ̀a sia, gbà biɔ àmèwo kpata be wo ne kãkã sɔ lũ ɖo kɛ̃tɔwo ji, sɔ crɔ̃ wo.

⁵Kè wo sè ekèa, Izràɛlviwo jè woa ji, kpàtà haɖèka ɖodu eye wo pò wo wù kaka va ɖo Kobà. Yeruzàlɛm dùamètɔwo cã va kɔ̀ ɖɛ sɔ bɔ̀ ɖo èto nyigbã ji nɔ̀tɔwo ŋuti, ɖo wo ɖè ènu kè jɔ̀ lè woabe kɛ̃tɔwo be àsàɖa mèa gblɔ̃ na wo. Gìlead ku Galileà be dùmètɔwo pò wo wù ku àdã lè àhà ji kaka yì Dàmaskò ku yebe ènutomè.

⁶Betulìa be èdùmètɔ kpɔ̀tɛawo lũ ɖo Àsirìa be àsàɖa ji, hlà ɛ̀ eye wo lɔ àmɔnyɔnuwo.

⁷Kè Izràɛlviwo gbɔ̀ so àhùagbeji vɔ̀a, wo hlà ènu kpɔ̀tɛawo; àmè kèwo nɔ̀nà èto nyigbã ji be ènuto mè be èdùviwo ku kɔpewo kudo gbàjà jia, wo lɔ àmɔnyɔnuawo fuu, ɖo ènu ŋuawo lè funu drì.

⁸Yòakim, hũbonɔ gã ku Izràɛlviwo be àmègãwo be àɖàŋùɖèha lè Yeruzàlɛm, va le ŋùku kpɔ ènu nyuɛ̃ kè Tɔhonɔ̀ wɔ̀ na Izràɛl, kpɔ Yudìt eye woa dogbè na ɛ̀.

⁹Kè wo ɖo e gbɔa, wo tusì na ɛ̀, kpata ɖodu eye wo gblɔ̃ na ɛ̀ be: «Wò nyi Yeruzàlɛm be gogo, Izràɛl be èglotùnu gã ŋutɔ, miabe kɔ̀ta be gòyiyi tɔ ŋùku!

¹⁰Wò wɔ̀ ekèa kpata to àpo àlɔ̀ ji, wò wɔ̀ ɖàgbè na Izràɛl eye Mawu kpɔ ŋùjèje lè e mè. Tɔhonɔ̀ ŋusɛ̃kpatatɔa ne tusì na wò tɛ̀gbɛ̀dò!» Eye dùkɔ̃ bliboa gblɔ̃ be: «Ne va e mè nène!»

¹¹Dùkɔ̃a hlà àsàɖa kaka ŋùkèkè ègbã (30). Wo sɔ Hòlofernɔ̀ be gòxɔa, yebe klòsalònuwo, yebe àbàtiwo, yebe gàgbãwo ku yebe ènuwo kpata na Yudìt. E xɔ̀ ɛ̀ be sɔ e ɖe dro na yebe èdɔwɔ̀lãa, e gla yebe kèkeviwo eye be do kpɔ̀tɛa ɖo woa ji.

¹²Izràɛl be nyɔnùwo kpata sidù va dogò è eye wo kafu ì. Woa dòmètɔ ɖewo kpà èhà le ɖu èwè sɔ mlã ɛ̀. E sɔ lɛ̃lɛ̃gbleàtiviwo ɖo àsi eye be ma wo na nyɔnù kèwo le kplɔ̀ ɛ̀a.

¹³Ye ŋutɔ ku nyɔnù kèwo lè kudo èa, woawo, wo xasa àmìtiviwo be sìxɛ̃ cɔ̃ èta, eye èzɔ̃ jè ŋùkɔ̀ na dùkɔ̃ bliboa, le kplɔ̀ nyɔnù kèwo le jì èhàa. Izràɛl be ŋusùwo kpata kplɔ̀ wo do ku woabe àhùanuwo, ku sepèpo xasawo lè èta, èhàwo le ɖì.

¹⁴Eŋua Yudìt do àkpedoha kèa lè Izràɛl bliboa dòmè eye dùkɔ̃a keŋu jì sɔ àyosòha kèa sɔ jì ku ègbè lelele.