Read gen Yudìt 16 Bible Online

Yudìt 16 - gen bible

Yudìt 16

¹Yudìt gblɔ̃ be: «Mì to àyosòha ɖèka na àpe Mawu ku àsihũviwo, mì jì èhà na Tɔhonɔ̀ ku gàkokoewo, mì kpà mamlã be kafuha jì na ɛ̀, mì do è ɖo èji eye mì fã yɔ yebe nyikɔ!

²Ɖo Tɔhonɔ̀ nyi Mawu kè nɔ̀tè àhùawo. E ɖè mù lè kɛ̃tɔwo be àlɔ̀wo mè, kplɔ̀ mù gbɔ̀ va yebe àsàɖa mè, lè yebe dùkɔ̃a be dòdòmè.

³Àsirìa ɖì so àvego be èto nyigbã ji, e va ku yebe àhùakɔ̃a lè gbɔsùsu mè. Woabe gbɔsùsua tu èmɔ na ètɔ̀sàsrawo eye woabe èsɔdotɔwo cɔ̃ ètokɔ̃ɛwo vĩi.

⁴E be yèa tɔ èzò èdù nyèa, sɔ crɔ̃ àpe ɖèkajɛwo lè èwui nu, la xla àpe ànɔnuviwo ɖo ànyigbã, la sɔ vifɛ̃ nyèwo wɔ̀ àdè be èlã la sò èkɔ̃ tùgbɛ̀jɛ nyèwo.

⁵Tɔhonɔ̀, hɔ̃hlɔ̃ keŋu tɔa, tɔ wo tè to nyɔnù be àlɔ̀ ji.

⁶Woabe kãlìsuka mu ci ènyà mè ɖo ɖèkajɛwo simè ò, àmè kàkò be èviwo mu pò è ò, àmè jɔ̀asuwo mu pò àvũ ku ì ò, vɔ̀a Yudìt, Mèrarì be èvi nyɔnùa ye gbɔjɔ ɛ̀ to yebe ŋùmè be nyɔnyɔa ji.

⁷E ɖè yebe àhòvɔa ɖɛ gbìgbɔ̀ fɔ̃ Izràɛl be èfũmɛwo ɖotè. E sì ànùwɛtrɛ̀ ɖo yebe ŋùmè,

⁸e sɔ àvɔnu zɛ̃zɛ̃ bla yebe èɖàwo, e fɔ àvɔ bìɖì bìɖì be àwù kpla, la sɔ flù ì.

⁹Yebe cokota dɔ̃ àhùaga gã be ŋùkuviwo eye yebe nyɔnyɔa le èjì na ɛ̀, e yomèa, èwuia sò èkɔ̀ na ɛ̀!

¹⁰Pɛrsìatɔwo hũhũ lè yebe kãlì wɔ̀wɔ mè eye Medìatɔwo sàvò ɖo yebe èjì dodo ŋuti.

¹¹Gà ŋua mèa dùkɔ̃ nyè kè wo ɖìgbɔa do àhùa be àpa, eye Àsirìatɔwo ci jojojoe. miabe dùkɔ̃ gbɔjɔa ɖè ègbè eye vɔ̃vɔ̃ jè woa ji.

¹²Sìgbè nyɔnù gblɔ̀ɛwo be èviwo nènea, mi sɔ ènu ŋɔ wo jè e godo, Mi do èkubi woa ŋuti lè woabe sisiwo mè. Wo crɔ̃ lè Tɔhonɔ̀ nyèa be àhùa kpekpe na wo mè.

¹³Mù la jì èhà yeye na àpe Mawu, Tɔhonɔ̀, wò lòlò gbà trì àkɔ, ŋùdãtɔ to hɔ̃hlɔ̃ mè, wo mu la teŋu ɖù èji wò ò.

¹⁴Nuɖoɖo ɖe sia ɖe ne sumɔ wò, wò pò nupo eye ènua va jɔ̀, wò dɔ̃ àpo gbɔ̃gbɔ̃a ɖoɖa eye e ɖo wo. Àmè ɖekpe mu lè kè la teŋu gbe àpo ègbè ò.

¹⁵Ètowo la hɔ̃ to so woabe dodoewo mè la caka ku èsìwo, àkpãwo la srè sìgbè ànyi be àgbà nène lè àpo ŋùmè. Vɔ̀a àmè kèwo ɖona sisi na wòa, wò kpɔna ŋùjèje lè woa mè.

¹⁶Ɖo vɔsawo kpata hùe àkpa ne bèa la huɛ̃ titi jèŋùmè eye àmì be tèpewo kpata kè wo fiɔ̃a mu sù ènu ɖe lè àpo ŋùmè ò. Vɔ̀a àmè kè ɖona sisi na Tɔhonɔ̀a, lè gãa tɛ̀gbɛ̀.

¹⁷Bàbà na dùkɔ̃ kèwo sinatè ɖo àpe kɔ̀ta ŋuti. Tɔhonɔ̀ ŋusɛ̃kpatatɔa la biɔhlɔ̃ lè kòjoɖoɖo zãgbè, la sɔ èzò ku èŋɔviwo ɖo woabe ŋutilãwo mè, eye wo la nɔ fã àvi ku vevesèse kaka sɔ yì.»

¹⁸Kè wo va ɖo Yeruzàlɛm vɔ̀a, wo yì do ènu gũ na Mawu lè mawuxɔa mè. Wo kɔ̀ woa ɖokoe ŋuti, eye wo wɔ̀ woabe numème, èjronyuɛ̃ ku ènunana vòvòwo be vɔsawo.

¹⁹Yudìt sɔ Hòlofernɔ̀ be ènu kèwo kpata dùkɔ̃a na ɛ̀a, sɔ ɖo àhovìnu lè mawuxɔa mè. So muɖɔ kè be sɔ na ye ɖokoe, lè yebe xɔ̀dɔ̃mɛ mèa ŋutia, e sɔ ɛ̀ na Mawu, ɖo àhovìnu nu.

²⁰Dukɔ̃ bliboa nɔ̀ jìjɔɛ mè lè Yeruzàlɛm lè kɔ̀kɔɛpea be ŋùkɔ̀a kaka na wètri ètɔ̃ eye Yudìt nɔ̀ woa gbɔ.

²¹Lè ŋùkèkè ŋuawo yomèa, àmè sia àmè gbìgbɔ̀ trɔ yì yebe crɔ̃ nyigbãa ji. Yudìt so yì Betulìa eye be ci yebe àxomè. Yebe nyikɔ yì ji lè yebe hùenu lè èdù bliboa mè.

²²Àmè sùgbɔ ji la nɔ̀ kudo è, vɔ̀a ŋusù ɖekpe mu gbà do è àta kpɔ so gà kè mè èsrɔ̃a Manasè ku gble è ɖɛ eye be trɔ va yebe dùkɔ̃a gbɔa ò.

²³E sĩ lè gogo gãaɖe mè eye e va ku nyagã lè èsrɔ̃a be àxomè kaka be ɖo èpè èkà èvè takpo ci àtɔ̃ (105). E ɖo yebe nyɔnù sumɔvia ye ɖokoe sinu, eye e ku lè Betulìa. Wo ɖì ì ɖo èsrɔ̃a Manasè be èyɔ̀do mè.

²⁴Izràɛl be àxuedoa wɔ̀ yebe ècɔa na ŋùkèkè adrɛ̃. Gbɔ̀xue be la kua, e ma yebe àdɔ̀kùnuwo na èsrɔ̃a Manasè ku ye ŋutɔ be xòmètɔwo.

²⁵Àmè ɖekpe mu gbà do ŋùklɛ̃ na Izràɛlviwo lè Yudìt be ŋùkèkèwo mè kaka jè ŋùkèkè sùgbɔ fuu lè yebe èku yomè kpɔ ò.