Read gen Yudìt 2 Bible Online

Yudìt 2 - gen bible

Yudìt 2

¹Lè èpè woenyigɔ̃a (18) be wètri cucugbãtɔ̀a be ŋùkèkè wìvɔvègɔ̃a (22) gbèa, wo le pò nupo lè èfìɔ be àxuea mè be Nèbùkàdnɛzà, Àsirìaviwo be èfìɔa le ji la biɔhlɔ̃ so ànyigbã bliboa ŋuti, sìgbè àlekè be gblɔ̃ ɛ̀ va yìa nène.

²E yɔ yebe àhùakplɔ̀tɔwo ku yebe cãmìwo kpata bɔ̀ sɔ yì èkpavi eye e ɖo àɖàŋù ku wo, eye ye ŋutɔ gblɔ̃ ànyigbã be ètodɔ̃wo kpata ɖɛ.

³Wo gblɔ̃ be e lè be woa crɔ̃ ŋutilã ɖe sia ɖe, kè mu wɔ̀ ɖo èfìɔa be ènyà ji òa.

⁴Eŋua, kè e wu yebe àɖàŋùa nu vɔ̀a, e va jɔ̀ be Nèbùkàdnɛzà, Àsirìa be èfìɔa, na wo yɔ Hòlofernɔ̀ yebe àhùaga gã ku yebe gɔ̃mènɔ̀tɔa eye e gblɔ̃ na ɛ̀ be:

⁵«Ekè a ye nyi èfìɔ gã, ànyigbã blibo a be àpetɔ a, be ègbèdoàsi be: To yì bɔ̀ àhùàmèsuka hotu èkà takpo (120000) ku èsɔdotɔ hotu àdɛ̃ (12000) kudo woabe èsɔwo.

⁶Eye wò la sɔ àhùa yì kpe ànyigbã blibo a lè èwèɖoxɔ̀pe, ɖo wo mu ɖo èto àpe ènyà ò.

⁷Wò la biɔ wo be wo a jrà ànyigbã ku èsì ɖo ɖɛ, ɖo mù la to ɖo woa ŋuti lè àpe ànyrãwɔ̀wɔ mè, mù la cɔ̃ ànyigbã bliboa be ŋùkumè kudo àpe àhùakɔ̃a be àfɔ̀wo eye mù la ɖè wo àbòyo.

⁸Àmè kèwo jè àfɔ̀kuawo la ci èmɔwo to eye woabe gbàjà jiwo ku ètɔ̀ sàsrawo la ɖɔ ku àmèkukuwo, kaka la gbãgo.

⁹Mù la dɔ̃ woabe àhùalewo yì kaka xixe bliboa be nukpòpe.

¹⁰Èwò ya, jo yì xɔ̀ woabe ànyigbãwo kpata; wo la sɔ woa ɖokoewo do àsi na wò, eye wò la le wo ɖɛ na mù, na woabe ètodɔ̃ be ŋùkèkèa.

¹¹Mù gbà kpɔ ɖo e mè na àmè kèwo la sitè ɖo ŋuti wò ò, crɔ̃ wo ku woabe ènuwo lè ànyigbã bliboa ji.

¹²Ɖo mù tà àgbè nyè ku àpe èfìɔɖùɖu a be ŋusɛ̃ be mù gblɔ̃ ɛ̀ vɔ̀, eye mù la wɔ̀ ɛ̀.

¹³Èwò ya, mù gbà dà lè àpetɔ wò be ènyàwo be ɖèka tètè ji ò; vɔ̀a wɔ̀ ɖo woa ji màglo màdà sìgbè lekè mù ɖègbè na wòa nène eye mù gbà yì ŋùgbe ò.”

¹⁴Hòlofernɔ̀ to so yebe àpetɔa gbɔ eye e yɔ èfìɔviwo, àhùagawo ku Àsirìa be àhùakɔ̃a be kplɔ̀tɔwo kpata bɔ̀.

¹⁵E cã ŋusùtiwo na àhùawɔ̀wɔ, sìgbè àlekè yebe àpetɔ ɖègbè na ɛ̀a nène, kaka sù àmè hotu èkà takpo (120000) ku àŋùtidàtɔ èsɔdotɔawo àmè hotu àdɛ̃ (12000).

¹⁶E ɖo wo sìgbè lekè wo ɖona àhùakɔ̃ ɖo àhùawɔ̀wɔ jia nène.

¹⁷E sɔ èsɔ èkpovènɔ̀wo, èsɔàkɛtɛwo, èsɔàkɛtɛviwo lè gbɔsùsu gãɖe mè ɖo àgbãwo be dodro ŋuti gbàku àlɛ̃gbɔwo, ènyìwo, ègbɔwo màɖohɛ̃hlɛ̃wo ɖo woawo be hɛ̃hɛ̃ ŋuti,

¹⁸ku ènu vòvòwo na àmè si àmè lè gbɔsùsu mè, ku èfìɔxomè be sìka ku klòsalò be zãzã.

¹⁹E jo yì àhùagbe ji, ye ŋutɔ ku yebe àhùakɔ̃ bliboa, xɔ̀ ŋùkɔ̀ na èfìɔa Nèbùkàdnɛzà sɔ cɔ̃ ànyigbã bliboa be ŋùkumè ku woabe àhùakèkèwo, èsɔdotɔwo kudo gbãdãgbã kèwo zɔ̃nà lè èwèɖoxɔ̀pe be ènutowo mèa.

²⁰Àmèha gãɖe kplɔ̀ ɛ̀ do sìgbè hùesuviwo nène, sìgbè ànyigbã ji be èkɔkuiwo nène, ɖoa wo mu teŋu xlɛ̃ wo ò, ɖo wo sùgbɔ fuu.

²¹Wo jo lè Nìnivè eye wo zɔ̃ ŋùkèkè ètɔ̃ tùtà Bèktilè be gbàjà ji, wo yì bɔ̀ àsàɖa lè èto kè lè Kìlikìa be tàmè lè èmìɔ̃ mè gbɔ.

²²So funua e kplɔ̀ yebe àhùakɔ̃ blibo, yebe gbãdãgbã àfɔ̀zɔ̃tɔwo, èsɔdotɔwo ku yebe àhùakèkèwo eye e ɖota èto nyigbã ji lɔ̀ge.

²³E ɖu Fudò ku Ludò ji, e le Rasìs-viwo ku Ismàɛl-viwo kpata kèwo le kpã ŋùkɔ̀ zògbèa lè Keleɔ̀n be àpùgo.

²⁴E fla Efratà, e so Mèsopotamìa va yì gbã èdù sɛ̃ŋu kèwo lè Abrɔ̀n be gbàjà jia ɖiwa ɖiwa kaka yì àpùa to.

²⁵E xɔ̀ Kìlikìa be ànyigbãwo, e flì àmè kèwo kpata le sĩkã kɔ̀ ɖɛ eye e va kaka Yafɛ̀t be ènuto kèwo ye lè àpùgo kpã ŋùkɔ̀ Àrabìa.

²⁶E dotò trɔ do Madìan-viwo kpata, tɔ èzò woabe àsàɖawo eye e hlà woabe èlãhawo.

²⁷E ɖì yì Dàmaskò be gbàjà ji lè èlì ɖèɖe be hùenu eye e tɔ èzò woabe àgblèwo kpata; e gũta na woabe àlɛ̃hawo ku ènyìwo, e hlà woabe èdùwo, e gbidi woabe gbàjà jiwo eye e crɔ̃ àmè màsĩ màsĩwo lè èwui nu.

²⁸Vɔ̃vɔ̃ ku èha lɔ àmè jè àpùtatɔwo ji. Woawo ye lè Sidɔ̀n ku Tirò, Sur ku Okinà be èdùmèviwo kudo Yamnìa-tɔwo kpata; èha lɔ Azɔ̀t ku Askalɔ̀n tɔwo ŋutɔ cã.