Read gen Yudìt 3 Bible Online

Yudìt 3 - gen bible

Yudìt 3

¹Wo dɔ̃ àŋɛ̀dotɔwo ɖoɖa ku fafa be ènyàwo be:

²«Miawo ye lè àpo ŋùkumè, mi Nèbùkàdnɛzà, èfìɔ gã, be sumɔviwo. Wɔ̀ ènu kè wò jroa ku mi.

³Kpɔɖa: miabe kɔpewo, èlì be àgblèwo, èlãhawo, gãgã ku viviwo kudo èlãzɛ̃pewo kpata lè ŋùkɔ̀ na wò. Wɔ̀ kudo wo sìgbè àlekè e nyɔ na wòa.

⁴Kpɔɖa: miabe èdùwo ku woa mè-nɔtɔwo nyi àpo kluviwo; va, gɛ̃ ɖo woa mè sìgbè lekè e jè ŋùmè na wòa nène.»

⁵Ŋusùawo va ɖo Hòlofernɔ̀ gbɔ eye wo pò nupo na ɛ̀ tututu.

⁶E ɖì yì àpùa to, ye ŋutɔ ku yebe àhùakɔ̃a, e ɖo gbãdãgbãha sɛ̃sɛ̃ le ɖia àgbògbò be èdùwo eye e cã ŋusùwo na àlɔ̀dotɔwo be èdɔ.

⁷Lè funu ku ènutowo kpata kèwo trɔ doa, wo xɔ̀ ɛ̀ ku sepòpo be jègbàwo kudo èwèɖuɖuwo lè èhũviwo be ègbèɖìɖi mè.

⁸E gble woabe ènutoawo kpata, e sò woabe sɛ̃sɛ̃tiwo, ɖo èdɔdoàsi be nyi na ɛ̀ be e la crɔ̃ ànyigbã be ènusɛ̃sɛ̃wo kpata àleke be dùkɔ̃wo kpata la nɔ sɛ̃ Nèbùkàdnɛzà, ye ɖèka kpò, eye ègbè vòvò be dùkɔ̃wo kpata la nɔ fã yɔ ɛ̀ sìgbè tɔhonɔ̀ nène.

⁹Hòlofernɔ̀ zɔ̃ va ɖo Esdrelɔ̀n be ŋùkɔ̀, gogo Dòtaìm, kè lè Yudeà be èto gãgãwo be ŋùkɔ̀.

¹⁰Wo ɖo àsàɖa le Gebà ku Sìtopolìs be dòdòmè eye e nɔ funua sɔ na wètri ɖèka sɔ bɔ̀ yebe àhùakɔ̃a be ènuzãzãwo kpata.