Read gen Yudìt 4 Bible Online

Yudìt 4 - gen bible

Yudìt 4

¹Izràɛlvi kèwo ye nɔ̀nà Yudeà sè ènu kèwo kpata Hòlofernɔ̀, Nèbùkàdnɛzà Àsirìatɔwo be èfìɔ be àhùaga gã, wɔ̀ ku dùkɔ̃awo kudo àlekè e hlà woabe sɛ̃sɛ̃pewo eye e sɔ wo gble ɖɛ na cɔ̃crɔ̃a.

²Èha lɔ wo ŋutɔ ɖo e ŋuti eye àdìka sò wo ɖo Yeruzàlɛm ku woabe Mawu be àxuea ta.

³Ɖo ènu kè ŋutia, zãa ɖe kpò ye wo gbɔ̀ so woabe gàtɔnugbe, hùenu viɖe kpò ye Yudeà be dùkɔ̃ bliboa va bɔ̀ eye wo gbà sɔ ènuzãzãwo, vɔsakpe ku àxuea ɖo wo kɔ̀kɔɛɖe lè woabe èkɔ̀ gbegblea yomè.

⁴Wo ɖo àmèdɔ̃dɔ̃wo ɖoɖa Sàmarìa, Konà, Bɛt-horɔ̀n, Abɛl-maìn, Yerikò be ènutowo kpata mè kaka yì Kobà, Hasɔ̀r ku Salɛ̀m be bàlìa mè.

⁵Wo xɔ̀ èto gãwo be ètamèwo, wo gbìgbɔ̀ do ŋusɛ̃ èdùvi kèwo lè funua eye wo sɔ ènuɖùɖuwo bɔ̀ ɖɛ sɔ kpɔ àmèwo ji eye wo wɔ̀ jàjràɖowo na àhùa, ɖo zãa ɖe kpò wo ɖe àgblènukuwo va yì.

⁶Yòakim kè le ɖù Yeruzàlɛm be hũbonɔ gã lè àzã ŋuawo mèa, ŋlɔ̀ xoma ɖoɖa àmè kèwo nɔ̀nà Bètulìa ku Bètomèstaìm, kèwo kpã ŋùkɔ̀ Esdrelɔ̀n, jè ŋùkɔ̀ gbàjà ji, gogo Dotaìm.

⁷E gblɔ̃ na wo be woa xɔ̀ èto nyigbã be àbù ɖìɖiwo, ɖo funuawo nyi èmɔ sɔ va Yudeà eye wo teŋu tu èmɔa na àmè kèwo va yìnà èvè èvèa, ɖo èmɔa ŋutɔ miɔ̃.

⁸Izràɛlviwo wɔ̀ sìgbè àlekè hũbonɔ gã Yòakim ku Izràɛl dùkɔ̃a be àmègãwo be ètopòɖoha, àmè kèwo le gla lè Yeruzàlɛm, wo ɖo è na woa nène.

⁹Izràɛl be ŋusùwo kpata do àpa ɖoɖa Mawu ku vevedonu gãɖe eye wo gbe ènuɖùɖu kplikpã.

¹⁰Ŋusùwo, woabe nyɔnùwo, ɖèviwo ku woabe èlãhawo; kaka jè àmèjro kèwo lè woa dòmèa, èdɔsɔtɔwo ku kluviwo do èfũlòlo be àwùwo.

¹¹Izràɛl be ŋusùwo kpata, nyɔnùwo ku ɖèviwo, so Yeruzàlɛm, wo blìbɔ̀ lè ŋùkɔ̀ na mawuxɔa, wo sì àfi ɖo èta blìbà eye wo ɖo woabe èfũlòvɔwo ɖo Tɔhonɔ̀ be ŋùkɔ̀.

¹²Wo sɔ èfũlòvɔ ɖèka trɔ ɖo vɔsakpea ŋutɔ eye wo do àpa ɖoɖa Tɔhonɔ̀ ku vevedonu gãɖe, be ne mu gbà sɔ woabe èviwo ne woa hlà ò, woabe nyɔnùwo ne woa sòkɔ̃ ò, woabe crɔ̃nu be èdùwo na gbãgbã ò eye wo mu gbà dovlo tèpe kɔ̀kɔɛa àleke be dùkɔ̃a mu gbà ɖì kòkoe ò.

¹³Tɔhonɔ̀ sè woabe ègbè eye e ɖèkɔ̀ kpɔ woabe nuxàxa. Dùkɔ̃a nɔ̀ ènumàɖu ŋùkèkè sùgbɔwo lè Yudeà bliboa ku Yeruzàlɛm lè Tɔhonɔ̀ ŋusɛ̃kpatatɔa be mawuxɔa be ŋùkɔ̀.

¹⁴Hũbonɔ gã Yòakim, ku hũbonɔwo kpata kèwo nɔ̀tè lè Tɔhonɔ̀ be ŋùkɔ̀ kudo Tɔhonɔ̀ be sumɔviwo, èfũlòvɔ lè àlì, wo le wɔ̀ ènumèmevɔsa màjìjɔ, ènunanawo, ku dùkɔ̃a be jrònyuɛ̃ nunanawo.

¹⁵Wo sì àfi blìbàa ɖo woabe ŋùgoblanuwo ŋuti, le fã yɔ Tɔhonɔ̀ ku woabe ŋusɛ̃ keŋu ne bea va ji Izràɛl be àxue bliboa kpɔ, lè ɖàgbè mè.