Read gen Yudìt 5 Bible Online

Yudìt 5 - gen bible

Yudìt 5

¹Wo yì gblɔ̃ na Hòlofernɔ̀, Àsirìa be àhùaga gã be Izràɛlviwo le jràɖo na àhùa wɔ̀wɔ; wo gblɔ̃ be wo tu ètomè be topewo, gbìgbɔ̀ tù àgbògbòwo ɖo èto gãwo tamè, wo tre èmɔ̀wo ɖo gbàjà jiwo.

²E do àdɔ̀mèze gãaɖe ŋutɔ, yɔ Mòab be àmègãwo kpata bɔ̀, Amɔ̀n be àhùagawo ku àpùato be èdùdɔnunɔ̀tɔwo (fìɔgbɔfìɔwo).

³E gblɔ̃ na wo be: «Kanànviwo, mì to è na mù, dùkɔ̃ kɛ ye nɔ̀nà èto nyigbã ji be ènutowo mè ò? Èdù kɛwo mè be nɔ̀nà ò? Gbɔsùsu kɛ lè yebe àhùakɔ̃a si ò? Ènu kɛwo ye le nyi woabe hɔ̃hlɔ̃ ku woabe àdã ò? Èfìɔ kɛ ye lè woa nu, le kplɔ̀ wo ò?

⁴Eye nukɛ ŋuti wo gbe be yèwo mu la va dogò mù, tovò na èwèɖoxɔ̀petɔwo kpata ò?»

⁵Akìɔr, Amɔ̀nviwo be àhùakplɔ̀tɔa, gblɔ̃ na ɛ̀ be: «Eŋua àpetɔ nyèa ne ɖoto ènyà ɖèka so àpo sumɔvia gbɔ eye mù la to nyàwo na wò sɔ so dùkɔ̃ kè nɔ̀nà èto nyigbã ji ŋua be ènutowo mèa, gogo wò. Àjè be ènyà ɖekpe mu la to so àpo sumɔvia be ènumè ò.

⁶Dùkɔ̃ kèa jɔ̀ so Kaldeàtɔwo mè.

⁷Cucugbãa wo nɔ̀ Mèsòpòtamìa, ɖo ènu kè ŋutia wo mu ji be yèwoa nɔ wɔ̀ ɖo yèwo tɔgbewo be vòduwo be ɖoɖo ji lè Kaldeà ò.

⁸Wo tèjo lè woa tɔgbewo be kɔ̀dowo ŋuti eye wo sɛ̃ jiŋùkusi be Mawu, Mawua kè wo va jèsia. Wo nyà wo jo yì àzɔ̀ge lè woabe vòduwo be ŋùmè, wo si yì zɛ̃ Mèsòpòtamìa eye wo nɔ funua ŋùkèkè fuwo.

⁹Woabe Mawua gblɔ̃ na wo be wo ne to jo lè woabe zɛ̃pea eye wo ne yì Kanàn be èdùa mè. Wo yì nɔ̀ funua eye wo gbà ɖo woabe sìka, klòsalò ku woabe èlãha gbogbowo.

¹⁰Wo ɖiɖi yì Ejiptè, ɖo àdɔ̀ ɖe to dri ɖo Kanàn nyigbã ji, eye wo nɔ̀ funua àleke be woa teŋu ci àgbè gbà trɔ èhahòo gãaɖe eye wo trɔ kɔ̀ta màɖo hɛ̃hlɛ̃ mè.

¹¹Ejiptè be èfìɔa sitè kàkò ɖo woa ŋuti eye e jè àyè lè woa ŋuti ɖo ànyikpewo sòso be èdɔ na wo; e do wo ŋùkpɛ̃ eye e sɔ wo wɔ̀ kluviwo.

¹²Wo do àpa ɖoɖa woabe Mawu, kè pò Ejiptè nyigbã bliboa ku gbèsìvuɛ̃ màdà màdawo eye Ejiptètɔwo nyà wo jo lè woabe ŋùkumè.

¹³Mawu na plãŋùpòfɛ̃ be àpùa pu lè woabe ŋùkɔ̀

¹⁴eye be kplɔ̀ wo to Sinaì kudo Kadɛs-Barnèa be èmɔa. Wo nyà zògbè ji nɔ̀tɔwo jo.

¹⁵Wo ci Àmorìtɔwo be ànyigbã ji eye wo crɔ̃ Hɛsbɔ̀ntɔwo kpata lè àdã mè. Kè wo sò Yɔrdàn troloa, wo xɔ̀ èto nyigbãa kpata.

¹⁶Wo nyà Kanàntɔwo, Perizìtɔwo ku Yebusìtɔwo, Sikemviwo ku Girgasìviwo kpata eye wo ci funua ŋùkèkè dìdiwo.

¹⁷Kaka kè wo mu dàvò lè woabe Mawua be ŋùmè ò kpòa, ɖàgbè lè kudo wo, ɖo lè woa gbɔa wo ɖo Mawu kè crìnà ènu màye màyea.

¹⁸Vɔ̀a ne e tɔ̀ be wo tètè jo lè èmɔ kè be sɔ ɖɛ na woa ŋutia, wo ɖùnà woa jii bàɖà bàɖà lè àhùa sùgbɔ wɔ̀wɔ mè, eye wo kplɔ̀nà wo yì gàtɔnugbe lè àmèjro nyigbã ji. Wo gbã woabe Mawu be àxuea ŋutɔ cã ɖiwa ɖiwa eye woabe èdùwo ci woabe fũtɔwo simè.

¹⁹Eye fifìa, kè wo trɔ va woabe Mawua gbɔ vɔ̀a, wo gbɔ̀ so fikè wo kãkã wo doa, wo va xɔ̀ Yeruzàlɛm fikè woabe sɛ̃sɛ̃ tèpe lèa eye wo va tù àxue lè èto nyigbã be ènutowo mè, ɖo e ci gbalo.

²⁰Ye ŋuti fifìa, àpetɔ ku tɔhonɔ̀, ne àgɔ̀jèje ɖe lè dùkɔ̃ kèa mè, ne wo dà lè woabe Mawua ji eye ne mi kpɔ yebe jèsì ɖe lè woa gbɔa, mi la sɔ àhùa ɖo woa ŋuti.

²¹Vɔ̀ a ne ènu màye màye ɖekpe mu lè woabe dùkɔ̃ mè òa, àpetɔ nyè, ne to yì, ne mu gbà va nyi be woawo be Tɔhonɔ̀ ku Mawu a ye kpɔ woa ji ò. Eye miawo ya, mi la va nyi èvlodonu lè xixea kpata be ŋùmè.»

²²Eŋua kè Akìɔr wu nupoa nu vɔ̀a, dùkɔ̃ blibo kè trɔ do gòxɔa eye e le ɖotoa, lì lìhũi; Hòlofernɔ̀ be àhùakplɔ̀tɔ gãwo ku àpùtatɔwo ku Mòabviwo kpata ɖè susu be wo ne sòba na ɛ̀.

²³«Ɖo vɔ̃vɔ̃ mu la ɖo mi ɖo Izràɛlviwo ŋuti ò. Ɖo mi kpɔ dùkɔ̃ ŋua ɖa, mu ɖo hɔ̃hlɔ̃ ɖe àlo ŋusɛ̃ ɖe sɔ wɔ̀ àhùa klìkã ɖe ò.

²⁴Eŋua mia lia ètoa yì eye wo la va nyi àmɔnyɔnu bɛɖɛ ɖe kpò na mi, o àpetɔ Hòlofernɔ̀!»