Read gen Yudìt 6 Bible Online

Yudìt 6 - gen bible

Yudìt 6

¹Ekè zigìdia ɖoɖa lè ŋusù kèwo trɔ do àɖàŋùɖèha vɔ̀a, Hòlofernɔ̀, Àsirìa be àhùaga gã gblɔ̃ na Akìɔr lè àmèjro dùkɔ̃ bliboa ku Mòabviwo kpata be ŋùkumè be:

²«Àmè kɛwo mì nyi, èwò Akìɔr ku mì, sà mìa ɖokoewo na Efrayìm, la va ɖù gblɔ̃ɖɛtɔwo lè mia nu sìgbè egbè nène eye mì le gblɔ̃ na mi be mi mu gbà sɔ àhùa ɖo Izràɛl ŋuti ò, ɖo woabe Mawu la kpɔ woa ji ŋuti ɖo ò? Àmè kɛ nyi tɔhonɔ̀ tovò na Nèbùkàdnɛzà ò? E ya ye la ɖo yebe hɔ̃hlɔ̃ eye e la hlà wo jo lè ànyigbã be ŋùkumè eye woabe Mawua mu la hlùɛ̃ wo gã ò.

³Vɔ̀a mi nyi yebe sumɔviwo, mi la tùkù wo zè ɖèka eye wo mu la teŋu kpe miabe èsɔwo be ŋusɛ̃ ji ò.

⁴Ɖoa mi la tɔ wo èzò màgble ɖe ɖɛ. Woabe ètowo la nù woabe èhũ la mu eye woabe gbàjà jiwo la ɖɔ ku woabe àmèkukuwo. Wo mu la teŋu nɔ̀tè lè ŋùkɔ̀ na mi ò, vɔ̀a wo la crɔ̃, nène èfìɔ Nèbùkàdnɛzà, ànyigbã bliboa be tɔhonɔ̀a, gblɔ̃a yeŋu; ɖo e pò nupo eye yebe ènyàwo mu nyina ènyà gbalo ò.

⁵Eye èwò, Akìɔr, kè sà ye ɖokoe na Amɔ̀n, èwò kè pò nupo kèawo lè àpo tèsisi be àzã gbèa, wò mu la gbà kpɔ àpe ŋùkumè kaka na gà kè mè mù biɔhlɔ̃ so kɔ̀ta kèa, kè si to jo lè Ejiptèa si ò.

⁶Eŋua, àhùakɔ̃ nyèwo be èwui ku àpe sumɔviwo be àkplɔ̀ la ŋɔ àhàda mè na wò eye wò la jè ànyi lè àmè kèwo jè àfɔ̀kuawo dòmè, gà kè mè mù la trɔ gbɔ̀ va.

⁷Sumɔvi nyèwo la dɔ̃ wò yì èto nyigbã be ènutomè eye wo la sɔ wò ɖo yebe èdù ɖe be àbùɖiɖiwo mè.

⁸Wò mu la ku gbɔ̀xue la crɔ̃ ku Izràɛlviwo lè funu ò.

⁹Ekè wò le ɖoŋù lè àpo èjì mè be wo mu la va le wo òa, mù gbà ɖɔ̀ ŋùmè ò. Mù pò nupo vɔ̀, eye ènyà nyèwo be kui ɖèka mu la gɛ̃ ò.»

¹⁰Hòlofernɔ̀ ɖègbè na yebe sumɔvi kèwo lè yebe gòxɔa mè be woa jè Akìɔr ji, woa kplɔ̀ ɛ̀ yì Betulìa eye woa do è àsi na Izràɛlviwo.

¹¹Yebe sumɔviawo le è, kplɔ̀ ɛ̀ to lè àsàɖa mè yì gbàjà ji; wo jo so baliwo mè tùtà èto nyigbã be ènutomè gbɔ eye wo va ɖo èsìjɔ̀pe kèwo lè Betulìa gɔ̃mè.

¹²Kè wo kpɔ woa, ŋusù kèwo lè èdù kè lè ètoa tamèa jè woabe àhùawɔ̀nuwo ji eye wo to lè èdùa mè; ku woabe èkpedànuwo (rɔbàtuwo) lè àlɔ̀ mè, ŋusùwo xe èmɔ na wo ne wo mu gbà lia ètoa ò eye wo le dà èkpewo ɖoɖa wo.

¹³Àmèawo ɖiɖi yì ètoa gɔ̃mè, wo bla Akìɔr ɖo funua be le ŋɛ̀ eye wo trɔ yì woabe àpetɔa gbɔ.

¹⁴Vɔ̀a Izràɛlviwo ɖiɖi so woabe èdùa mè, va kè ɖo Akìɔr ŋuti: kè wo tu èkà na ɛ̀a, wo kplɔ̀ ɛ̀ yì Betulìa eye wo sɔ ɛ̀ yì fiɔ èdùa mè be ègawo.

¹⁵Woawo ye nyi: Ozìas, Mikà be èvia, so Simèɔn be kɔ̀ta mè ku Kabrìs, Ɔtnìɛl be èvia kudo Karmì, Mɛlkìɛl be èvia.

¹⁶Wo yɔ èdùa be àmègãwo kpata bɔ̀. Ɖèkajɛwo ku nyɔnùwo sidù va hòo. Wo sɔ Akìɔr ɖo dùkɔ̃ bliboa dòmè eye Ozìas biɔ ɛ̀ ènu kè jɔ̀a sè.

¹⁷Lè yebe ɖoŋutia mèa, e kã Hòlofernɔ̀ be àɖàŋùɖoha be ènyàwo ta na wo, ku ènyà kèwo kpata ye ŋutɔ gblɔ̃ lè Àsirìaviwo be kplɔ̀tɔwo be àgũ dòmè kudo Hòlofernɔ̀ be gãglo be nupowo ɖo Izràɛl be àxuedoa ŋuti.

¹⁸Kè wo do ènugũ vɔ̀a, dùkɔ̃a sɛ̃ Mawu eye e kɔ ègbè yì ji be:

¹⁹«Tɔhonɔ̀, jiŋùkusi be Mawu, kè ŋùku ɖo woabe jàjrawo ŋuti eye kpɔ ɖo e mè na miabe kɔ̀ta kè wo do ŋùkpɛ̃a eye egbèa, ɖè èkɔ̀ kpɔ àmè kèwo wò ɖè ɖovòa.»

²⁰Wo fa àkɔ na Akìɔr eye wo do è ŋusɛ̃ veveɖe.

²¹Ozìas kplɔ̀ ɛ̀ so àgũa dòmè yì yebe àxomè eye e ɖo àzãɖùkplɔ̃ na àmègãwo. Wo fã yɔ Izràɛl be Mawua sɔ biɔ ɛ̀ àlɔ̀do lè èzã bliboa mè.