Read gen Yudìt 7 Bible Online

Yudìt 7 - gen bible

Yudìt 7

¹Èŋù kè gbèa, Hòlofernɔ̀ ɖègbè na yebe àhùakɔ̃a kpata ku gbãdãgbã kèwo va la do è àlɔ̀a, be woa so jè Betulìa be èmɔ, woa xɔ̀ èto nyigbã be ènutomè be àbùɖìɖiwo eye woa sɔ àhùa ɖo Izràɛlviwo ŋuti.

²Gbè ŋua gbèa, ŋusù ɖe sia ɖe kè ɖo ŋusɛ̃a, so jè èmɔ. Àhùawɔ̀tɔwo be àhùakɔ̃ àfɔ̀zɔ̃tɔwo lè àmè hotu èkà èvè ci àtɔ̃ (170000), èsɔdotɔwo lè àmè hotu àdɛ̃ (12000), màxlɛ̃ àgbãwo ku àgbãdrotɔwo ò. Wo sùgbɔ fuu ŋutɔ.

³Wo ɖo àsàɖa ɖo bàlì kè gogo Betulìa, lè èsìjɔ̀pea gbɔ eye wo zɔ̃ yì gblɛ̀lɛ̀ɛ so Dotaìm kaka yì ɖo Belbaìm, gbà dìdi so Betulìa sùtè Kiamɔ̀n, lè Esdrelɔ̀n ŋùkɔ̀.

⁴Ekè Izràɛlviwo kpɔ woabe àhùakɔ̃ gbogbo ŋua, wo ci kpɔ̃ ŋutɔ eye wo gblɔ̃ na woa nɔ̀nɔwo be: «Fifìa wo la crɔ̃ ànyigbã bliboa. Èto gãgãwo, èsìsràdowo, ètokɔ̃ɛwo cã la tùkù lè woabe gbɔsùsua nu.»

⁵Kè àmè sia àmè jè yebe àhùawɔ̀wo jia, wo sũ èzò ɖo èjikpɔxɔawo mè eye wo ɖia lè èzã blibo ŋua mè.

⁶Ŋùkèkè èvègɔ̃a, Hòlofernɔ̀ ɖè yebe èsɔdotɔwo kpata to lè Izràɛlvi kèwo lè Betulìa be ŋùkɔ̀.

⁷E sã kpɔ àbùɖìɖi kèwo kplɔ̀nà àmè yì woabe èdùa mèa, e yì kpɔ woabe èsìjɔ̀pewo; e xɔ̀ wo, e ɖo yebe gbãɖãgbã ɖiatɔwo lè funuawo eye ye ŋutɔ trɔ va yebe àhùakɔ̃a gbɔ.

⁸Eye Edɔ̀m be ègawo, Mòab be àhùagawo kudo àpùta be àhùa fìɔgãwo dɔ̃ gogo è gblɔ̃ na ɛ̀ be:

⁹«Miabe àpetɔa ne lɔ̃ bèa ɖo èto ènyà ɖèka ne àmè ɖekpe mu la ci àhùa mè lè àpo àhùakɔ̃a mè ò.

¹⁰Ɖo Izràɛlviwo be dùkɔ̃ kèa mu kãna ɖo yebe èhuãwo ŋuti ò, bòhũa, èto kèwo ji wo nɔ̀nà be jiyìyiwo ŋuti; ɖo ènu kè ŋutia, woabe ètowo be tamè lialia mu fa ò.

¹¹Ye ŋuti fifìa, àpetɔ, mù gbà kpe àvũ kudo wo sìgbè lè àhùakpekpe mè nène ò, eye àpo àhùakɔ̃a be àmè ɖekpe mu la ci àhùa mè ò.

¹²Nɔ̀ àpo àsàɖa mè, sɔ le àpo àhùakɔ̃a be ŋusùwo kpata ɖo ànyi eye àpo sumɔviwo ne ɖo àsi èsìjɔ̀pe kè le kɔ̀ lè ètoa be àfɔ̀nua ji.

¹³Ɖoa funu ye Betulìa-tɔwo xɔ̀nà èsì so. Sìkɔtìamè la crɔ̃ wo eye wo la sɔ woabe èdùa na. Mi la lia èto kèwo trɔ doa be tamè ku miabe àhùakɔ̃wo. Mi la ɖo àsàɖa ɖo funua lè ŋùkɔ̀ gbe àleke be àmè ɖekpe mu gbà to lè èdùa mè ò.

¹⁴Àdɔ̀wùamè la hlà wo ɖù, woa ku woabe nyɔnùwo kudo ɖèviwo eye gbɔ̀xue èwui la jè woa ŋutia, wo la fɔtɔ lè woabe nɔ̀pewo be èmɔwo to.

¹⁵Wò la sɔ ŋɔji sɔ tu èfɛ̃ na wo, ɖo àgla kè ye wo jè eye wo mu va ɖogò wò fafaɖe òa ŋuti.»

¹⁶Ènyà kèawo jè ŋùkumè na Hòlofernɔ̀ ku yebe àhùakɔ̃ be kplɔ̀tɔwo eye e ɖègbè be wo ne wɔ̀ ɛ̀ tutu nènea.

¹⁷Amɔ̀nviwo yì ɖo àsàɖa ɖo bàlia mè ku Asirìavi hotu èvè èkà wuivɔatɔ̃ (5000); wo xɔ̀ Izràɛlviwo be èsìtèpe ku èsijɔ̀pewo.

¹⁸Edɔ̀mviwo ku Amɔ̀nviwo bɔ̀ yì ɖo àsàɖa ɖo èto nyigbã ji kpã ŋùkɔ̀ Dotaìm. Eye wo dɔ̃ woabe àmè ɖewo ɖoɖa àpùgo kudo èwezɛ̃pe kpã ŋùkɔ̀ Ègrebɛ̀l kè gogo Kus, lè Mokmùr be ètɔ sàsrà to. Àsirìat be àhùakɔ̃ kè kpɔ̀tɔ̀a ɖo yebe àsàɖa ɖo gbàjà ji eye wo xɔ̀ ànyigbã ŋua kpata. Woabe gòxɔwo kudo àgbãwo kpli ɖodu drì: wo nyi sùgbɔ fuu ŋutɔ.

¹⁹Izràɛlviwo do àpa ɖoɖa Tɔhonɔ̀, woabe Mawua, ɖo wo gbɔjɔ ŋutɔ. Woabe kɛ̃tɔwo trɔ do wo gòdò eye wo mu la teŋu si lè woabe ŋùkɔ̀ ò.

²⁰Àsirìa be àhùakɔ̃a kpata, woabe gbãdãgbã àfɔ̀zɔ̃tɔwo, woabe àhùakèkewo, woabe èsɔdotɔwo, wo trɔ do Izràɛlviwo sɔ na ŋùkèkè gbã vɔ ènɛ̀ (34). Èsì le vɔ̀ lè Betulìatɔwo be èsìzewo mè.

²¹Èsìdowo le ci gbalo eye èsì mu gbà le sù na àmèwo ŋùkèkè ɖèka ò, ɖo wo jijena èsìa.

²²Woabe èviwo gbɔjɔ, nyɔnùwo kudo ɖèkajɛ ku tùgbɛ̀jɛwo, sìkɔ tì wo kaka be wo ci blibɛ blibɛ eye wo le jè ànyi lè èdùa be àblɔwo mè kudo àgbowo mɔnu; ègã ɖeti mu gbà le woa ŋuti ò.

²³Dùkɔ̃ blibo, àmè màsĩmàsĩwo, nyɔnùwo ku ɖèviwo, wokpe ta lè Ozìas ku èdùa be àmègãwo gbɔ; wo do àpa ku ègbe sɛ̃sɛ̃ɖe eye wo pònu lè àmègãwo kpata be ŋùkumè be:

²⁴«Mawu ne ɖo kòjo na mì kudo mi. Ɖo mì wɔ̀ ènu dàdà gãɖe ɖo mia ŋuti lè ŋùkèkè yawo mè ekè mì mu pò ŋutifafa be nupo kudo Àsirìviwo ò.

²⁵Eye fifìa àmè ɖekpe mu lè kè la xɔ̀ na mi ò, vɔ̀a Mawu sɔ mi do woa simè be woa pò mi pu ànyi to sìkɔtìti ku èhiã gãɖe ji.

²⁶Ye ŋuti fifìa mì yɔ wo eye mìa sɔ èdù bliboa do àsi na Hòlofernɔ̀ ku yebe àhùakɔ̃a kpata.

²⁷Ɖo ènu kè ŋutia enyɔ be mia trɔ zũ woabe àhùalewo sɔ wu be mia to sìkɔtì àmè ji. Mi la trɔ kluviwo vɔ̀a mi la nɔ̀ àgbè eye mi mu la nɔ kpɔ miabe ɖèviwo be èku ò, eye gbɔ̃gbɔ̃ la nɔ ci pò na miabe nyɔnùwo ku miabe èviwo ò.

²⁸Mi le sɔ jiŋùkusi ku ànyigbã le àfɔ̀ na mì be miabe Mawu, mia tɔgbewo be Tɔhonɔ̀a, ye le biɔhlɔ̃ zɔ̃ ɖo miabe ènu drãwo ku mia tɔgbewo be vuɛ̃wo jia ne mìa wɔ̀ ɖo ènyà kèawo ji egbèa ne gbledo kèa bèa na àsà.»

²⁹Àmèhaa kpata ŋɛ̀ sɛ̃sɛ̃ɖe zè ɖèka. Woa kpata kpli ègbè ɖodu do àpa ɖoɖa Tɔhonɔ̀ sɛ̃sɛ̃ɖe.

³⁰Ozìas gblɔ̃ na wo be: «Mì le èjì, nɔ̀viwo. Mì na mia gbà nɔ̀tè ŋùkèkè àtɔ̃ kpe è, lè hùenu kèa mèa, Tɔhonɔ̀, miabe Mawua, la trɔ yebe ŋuzĩzĩkukua ɖoɖa mi; ɖo mu la ɖèkɔ̀ lè mia ŋuti kaka yì ò.

³¹Vɔ̀a ne àzã kèawo va yì ye àlɔ̀do ɖe mu va na mi òa, mù la wɔ̀ ènu kè mì gblɔ̃a fàa.»

³²E yomèa, e ɖo dùkɔ̃a trɔ yì yebe àhùa tèpewo; wo so yì àgbògbòwo ji ku woabe èdùa be èjikpɔxɔwo mè; eye wo ɖo nyɔnùwo ku ɖèviwo trɔ yì woabe àxuewo mè. Lè èdùa mèa, àmèwo lè nuxàxa gãɖe mè.