Read gen Yudìt 9 Bible Online

Yudìt 9 - gen bible

Yudìt 9

¹Yudìt yì èklò ji, cɔ̃ ŋùmè ànyi, lɔ àfi kɔ̀ ɖo tamè, ɖè yebe àwù jè èfũlòvɔ kè be tàa ji, gàpòpo pɛpɛ kè ji wo wɔ̀nà fiɛ̃si be lifitɔzòvɔsa lè lè Yeruzàlɛm lè Mawu be àxuea mè. E na àle ɖoɖa Tɔhonɔ̀ ku ègbè sɛ̃sɛ̃ɖe le gblɔ̃ be:

²«Tɔhonɔ̀, ètɔ nyè Simèɔn be Mawu, àmè kè be àlɔ̀ mè wò sɔ èwui a do, ne bè a biɔhlɔ̃ lè àmèjro kèwo tu àtrɛvi lè tùgbɛ̀jɛ lèalɔ̀ji ɖe ŋuti, sɔ do è ŋùkpɛ̃, ɖè yebe àklito ɖo àma, sɔ do è vlo, eye wo pòɖi yebe àdɔ̀, sɔ ɖì ì gbɔ a! Nyàwo a wò gblɔ̃ be: ''Ekè a mu la jɔ̀ ò! Vɔ̀ a wo wɔ̀ ɛ̀.

³Eŋua ŋuti wò sɔ woabe àmègãwo do àsi na cɔ̃crɔ̃ gbàkudo woabe mlɔ̃pe kè wo sɔ flù tùgbɛ̀jɛa cã pò woabe èhũ. Wò pò woabe kluviwo lè àmègãwo gbɔ eye àmègãwo ya lè woabe fìɔzìkpewo ji.

⁴Wò sɔ woabe nyɔnùwo na kɔ̃sòso, woabe nyɔnùviwo na gàtɔnugbe ku woabe nunɔ̀amèsiwo na hàhla lè àpo èvi ɖèveawo dòmè, kèwo mè vevedonu ŋuhũatɔ̀ ɖo èta wòa lèa, kèwo ye nyɔŋu ɖo èɖipòpo ɖo yèwo be èhũ ŋuti eye wo fã yɔ wò be wòa va do àlɔ̀ yèwo. Oò Mawu, àpe Mawu, xɔ̀ ègbè na mù, ènyè kè nyi àhòsìa.

⁵Ɖo èwò ye wɔ̀ ènu kèwo kpata jɔ̀ gbè ɖe gbè sãa, fifì kudo kèwo la ɖɛ vaa. Ènu kè lè fifì ku kè la ɖɛ vaa, so gbɔ wò, eye àpo ɖoɖowo vana e mè godo.

⁶Jɔ̀ɖomè kèwo wò ɖoa va kɔ̀ ɖɛ eye wo gblɔ̃ be: “Miawo ye kè”. Ɖo àpo èmɔwo lè ègbèsɔ̀sɔɛ eye àpo kòjoɖoɖoa lè sòso ku nukpɔkpɔ sɔ̀gbè ɖɛ xoxo.

⁷Kpɔ àlekè Àsirìatɔwo va ɖo lè gbɔsùsu mè, wo kɔ woa ɖokoewo yì ji ɖo woabe èsɔwo ku èsɔdotɔwo ŋuti, le jra woa ɖokoewo ɖo woabe àhùakɔ̃ àfɔ̀zɔ̃tɔwo be ŋusɛ̃a ŋuti, wo dojì ɖo woabe àkpoxɔ̀nu, àkplɔ̀, àŋùdàti ku èkpedànuwo ŋuti; wo ŋlɔ̀be be wò nyi Tɔhonɔ̀ kè glina àhùawo.

⁸Àpò nyikɔ ye nyi Tɔhonɔ̀a. Gbã woabe tamèsɛ̃sɛ̃ be ŋusɛ̃a do, eye sɔ àpo àdɔ̀mèze mù woabe ŋusɛ̃a ɖo ànyi; ɖo wo ɖo è be yèwo ɖìgbɔ àpo mawuxɔ kɔ̀kɔɛ, gble kɔ̀do na gòxɔ kè mè wò ɖènà gogo wò fiɔ lèa, gbà ŋɛ vɔsakpe wòa be àzòwo ku èwui.

⁹Le ŋùku ɖo woabe jajra ŋuti, ɖè àpo àdɔ̀mèze ɖo woa ji, sɔ ŋusɛ̃ kè mù susua na àpe àhòsì be àlɔ̀a.

¹⁰To àpe àmèbèble be ènyàwo mèa, pò kluvia ku èga ɖodu. Tùkù woabe gãglo wɔ̀wɔa to nyɔnù be àlɔ̀a ji.

¹¹Ɖo àpo ŋusɛ̃ mu lè àmè gbogbo mè ò, àlo àpo ŋusɛ̃ mu lè hɔ̃hlɔ̃tɔwo mè ò, vɔ̀a èwò nyi àmè bɔ̀bɔɛwo be Mawu, àmè màɖìamèwo be hlùɛ̃tɔ, wò dona ŋusɛ̃ àmè gblɔ̃ ɛwo, àmè ci àgbawo jikpɔtɔ, àmè bu ŋùɖowo be hlùɛ̃tɔ.

¹²Ɛ̃ɛ, ɛ̃ɛ, ètɔ nyè be Mawu, Izràɛl be Mawu, jiŋùkusiwo ku ànyigbã be àpetɔ, èsìwo be ɖotɔ, xixe bliboa be èfìɔ, xɔ̀ àpe kuefã

¹³eye wɔ̀ be àpe àmè bèblè be ènyàa, ne do àbì gbà wù àmè kèwo ye wɔ̀ ɖoɖo càklìwo ɖo àpo zòɖùɖu, àpo àxue kɔ̀kɔɛa, Ziɔ̀n be ètokɔ̃ɛa kudo èvi wòwo be ànyigbãa ŋuti.

¹⁴Ɖè fiɔ dùkɔ̃ bliboa ku kɔ̀ta ɖe sia ɖe be èwò ye nyi ŋusɛ̃ ku hɔ̃hlɔ̃ kpata be Mawu eye, to vò na wòa, àmè ɖekpe mu kpɔ Izràɛl be kɔ̀ta ji ò.»