Read gen Toto jo 1 Bible Online

Toto jo 1 - gen bible

Toto jo 1

¹Izràɛl be èvi ŋusù kèwo va Ejiptè awo be nyikɔwo ye nyi ekèawo; wo va ku Yakɔb, àmè sia àmè ku yebe àxuedo.

²Rubɛ̀n, Simeɔ̀n, Levì ku Yudà,

³Isakàr, Zabulɔ̀n ku Bɛnyamìn,

⁴Dàn ku Nɛftalì, Gad ku Àsɛr.

⁵Yakɔb be jìjimèviwo keŋu lè àgbètɔ èkà takpo ci èwo (70):

⁶Ekèa yomè a, Yosɛ̀f ku nɔ̀via kèwo nyi jìjimè ŋua mèviwoa keŋu ku.

⁷Eye Izràɛlviwo le jì ɖo e ji, le sùgbɔ ɖo e ji, gbà le kèkè èta ɖo e ji, eye wo va le ɖo ŋusɛ̃, eye wo ɖɔ èdùa keŋu.

⁸Èfìɔ yeye ɖe kè mu jèsi Yosɛ̀f ò a, va le ɖùfìɔ lè Ejiptè.

⁹E gblɔ̃ na yebe dùkɔ̃a be: “Mì kpɔ lekè Izràɛlviwo be dùkɔ̃a sùgbɔ eye be gbà sɛ̃ŋu cã wu mi ɖa!

¹⁰Mì na mia jè àyè ɖo woa ŋuti, ne wo mu gbà jì ɖo e ji ke ò. Ɖo, ne àhùa va jɔ̀ a, wo teŋu va nɔ̀ miabe kɛ̃tɔwo ji. Wo la wɔ̀ àhùa ku mi, eye wo la to jo lè miabe èdùa mè.”

¹¹Nène a ye, wo sɔ èdɔ sɛ̃sɛ̃ ji kpɔtɔwo ɖo woa nu, ne woa zĩ woa ji, ne woa nɔ wɔ̀ èdɔ sɛ̃sɛ̃wo. Eye wo tù èdù èvè: Pitɔ̀m ku Ramsɛ̀s, kèwo nyi àgbãwlapewo na Faraɔ̀n.

¹²Vɔ̀a, wàlɛbɛ kè wo le zĩ wo ɖo ànyia, wo gbà jo le jì kpe è, eye wo gbà le sùgbɔ kpe è. Wo gbà le kèkè èta, kaka be wo tɔ Izràɛlviwo vɔ̃vɔ̃.

¹³Fifìa, Ejiptètɔwo sɔ àkpasɛ̃sɛ̃ le zĩ Izràɛlviwo ji

¹⁴ku èdɔ sɛ̃sɛ̃ kèwo na be àgbènɔ̀nɔa la tì woa: wo nyànà ànyikɔ; wo mènà èxɔ̀ tùtu be èkpewo, wɔ̀nà àgblèdɔ vòvòvòwo, ku èdɔ sɛ̃sɛ̃ bu kèwo Ejiptètɔwo zĩna woa ji ku àkpasɛ̃sɛ̃ be woa wɔ̀a.

¹⁵Ejiptè be èfìɔa ɖè ègbè na Hebrù-nyɔ̃nù èvijìtɔ èvè kèwo dòmètɔ ɖèka tɔ̀ Cifrà, eye èvègɔ̃a tɔ̀ Puàa be:

¹⁶“Ne mì le jì èvi na Hebrù-nyɔ̃nùwoa, ne àmè ɖe jì ŋusùvia, mìa wù ì; ne nyɔ̃nùvi ye à, mìa tàsi ì ɖo àgbè.”

¹⁷Vɔ̀a, èvijìtɔawo vɔ̃ Mawu, eye wo mu wɔ̀ ɖo èse kè Ejiptè be èfìɔa do na woa ji ò, eye wo ɖè àsi lè ŋusùviawo ŋuti, wo ci àgbè.

¹⁸Ejiptè be èfìɔa yɔ wo, eye be biɔ wo sè be: “Nukɛ ŋuti mì wɔ̀ nènea, eye mì ɖè àsi lè ŋusùviawo ŋuti, eye wo ci àgbè ɖo ò?”

¹⁹Nyɔ̃nù èvijìtɔawo ɖo e ŋuti na Faraɔ̀n be: “Hebrùviwo be èsrɔ̃wo mu lè sìgbè Ejiptè be nyɔ̃nùwo nène ò. Lãmè sɛ̃naŋu na wo, eye wo jìnà ɖèviawo keŋu gbɔ̀xue èvijìtɔawo ne va ɖo woa gbɔ.”

²⁰Mawu tusì na èvijìtɔawo be èdɔa, eye dùkɔ̃a gbà sùgbɔ kpe è, eye wo gbà sɛ̃ŋu ɖo e ji.

²¹Kè èvijìtɔawo vɔ̃ Mawu, eye Mawu na be Izràɛlviwo gbà jì ɖo e ji kpe èa,

²²Faraɔ̀n ɖè ègbè na yebe dùkɔ̃a keŋu be: “Mì nɔ sɔ Izràɛlvi vifɛ̃ ɖe sia ɖe kè nyi ŋusùvia nɔ dãŋùgbe ɖo ètɔ̀ mè. Eye mì nɔ ɖè àsi lè nyɔ̃nùviawo ŋuti ɖo àgbè.”