Read gen Toto jo 11 Bible Online

Toto jo 11 - gen bible

Toto jo 11

¹Tɔhonɔ̀ gblɔ̃ na Mosè be: “Mù la hɛ̃ àyà do na àmè kpɔ̀tɛa va Faraɔ̀n ku Ejiptè be èdùa ji. Eŋuã yomè a, e la ɖè àsi lè mìa ŋuti, mì la jo lè àfi kèa. Eye, mu la ɖè àsi lè mìa ŋuti ɖèɖe kpò ò, vɔ̀a, e la nyà mì ŋutɔ cã kpàtà-kpàtà, jo lè tèpe kèa.

²Ekèa ŋutia, gblɔ̃ na dùkɔ̃a be, àmè sia àmè ne biɔ yebe àxuekɔ̀tɔwo, ŋusù ku nyɔ̃nù, ènu kèwo wo sɔ sìka ku klòsalò wɔ̀a.”

³Eye Tɔhonɔ̀ sɔ yebe dùkɔ̃a be ɖàgbè do Ejiptèviwo be èjì mè. Faraɔ̀n be ŋutimewo jo va le do bùbu tɔ̀xɛ ɖe Mosè ŋuti lè Ejiptè be ànyigbã a ji, lè dùkɔ̃a be ŋùmè.

⁴Mosè gblɔ̃ be: “Tɔhonɔ̀ be: Lè èzã gà woèvè lɔ̀gea, mù la va to Ejiptè be èdùa mè.

⁵Èvi cucugbãawo kpata la ku lè Ejiptè be èdùa mè; sɔ so Faraɔ̀n be èvi cucugbã, kè ɖo la nɔ̀ ànyi ɖo yebe èfìɔzìkpea jia ji, yì to kaka sumɔ̃vi-nyɔ̃nù kè le tù èlùa ji, kɔ̀ ɖo èlã kèwo wo jì cucugbãa ji.

⁶Àbòbo gãa ɖe, kè mu ɖì kpɔ, eye mu la gbà ɖì gbèɖe òa, la ɖì lè Ejiptè be ànyigbã ji.

⁷Vɔ̀a, lè Izràɛlviwo kpata dòmèa, àvũ ɖekpe mu la wɔ̀ àdã do àmè ɖe loo, àlo èlã ɖe ò. Ne mìa nya be Tɔhonɔ̀ dona vòvòtoto Ejiptè ku Izràɛl dòmè.”

⁸Mosè yì e ji, gblɔ̃ be: “Wàlɛbɛ ŋua ye ŋutimè wò kèawo keŋu la dɔ̃ va, la do èta gũ lè ŋùkɔ̀ na mù, la gblɔ̃ be: 'Èwò ku dùkɔ̃ ke lè yo wò mèa, mì jo.' Eŋuã yomè a, mù la jo.” Eye Mosè to ku àdɔ̀mèze lè Faraɔ̀n be àxuea mè.

⁹Tɔhonɔ̀ gblɔ̃ na Mɔsɛ̀ be: “Faraɔ̀n mu ji be yèa ɖo èto mì ò. Ènu kèa na be ŋùdãnu nyèwo lè sùgbɔ lè Ejiptè be èdùa mè.”

¹⁰Mosè ku Arɔ̀n wɔ̀ ŋùdãnu kèawo keŋu lè Faraɔ̀n be ŋùmè, vɔ̀a Tɔhonɔ̀ na be Faraɔ̀n be èjì trì, eye mu ɖè àsi lè Izràɛlviwo ŋuti, ne woa jo lè yebe èdùa mè ò.