Read gen Toto jo 12 Bible Online

Toto jo 12 - gen bible

Toto jo 12

¹Tɔhonɔ̀ gblɔ̃ na Mosè ku Arɔ̀n lè Ejiptè be ànyigbã ji be:

²“Wètri kèa la nyi wètriwo be cucugbãa na mì; e ye mì la sɔ ɖo èpèa be tɔtɔji.

³Mì gblɔ̃ na Izràɛl be àmèha bliboa be: Wètri kèa be ŋùkèkè èwogɔ̃a gbèa, xòmè ɖe sia ɖe, àxuedo ɖe sia ɖe, ne sɔ èlã ɖèka.

⁴Ne àmèwo hùe lè àxue ɖe mè wu nu, ne èlã blibo ɖèka ɖùɖua, mì la kpɔ be àxue kɛ gogo mì wu, ekè be àxomètɔwo be hlɛ̃hlɛ̃mè sɔ̀ ku èlã ɖèka ɖùɖu ku mì màa. Mì la cã èlã kè sɔ̀ ɖo ènu kè àmè sia àmè la teŋu ɖù a nu.

⁵Mì la sɔ èlã àsuvi kè lè blibo, kè ènu ɖekpe mu wɔ̀ ò eye be ɖo èpè ɖèkaa. Mì la le è, lè àlɛ̃viwo, àlo ègbɔviwo dòmè.

⁶Mì la sɔ ɛ̀ ɖɛ, kaka na wètri kèa be ŋùkèkè woènègɔ̃a gbè. Izràɛlviwo keŋu be àmèha bliboa la wù ì lè fìɛ̃si mè.

⁷Wo la sɔ yebe èhũa, sìsì ɖo àxue kè mè wo la ɖù ì lèa be àgbo be hɔ̃truti èvèawo ŋuti ku àgboa be tamè.

⁸Wo la ɖù èlãa, èzã ŋua mè; mì la mè ɛ̀ lè èzò nu eye wo la ɖù ì ku kpɔ̃nɔ àkpiti, kudo ègbe vevewo.

⁹Mì mu la ɖù yebe tèpe ɖekpe mumu, àlo kè wo fìɔsìa ò, vɔ̀a kè wo mè lè èzò nu ku ètaa, àfɔ̀wo kudo àdɔ̀mènuawo.

¹⁰Yebe àkpa ɖekpe mu la kpɔ̀tɔ̀ ŋùdekɛ̃nyɛ mè ò. Ne èɖe kpɔ̀tɔ̀a, mì la tɔ ɛ̀ èzò.

¹¹Mì la blago, àfɔ̀kpa la nɔ̀ àfɔ̀, mì la sɔ mìabe èmɔzɔ̃tiwo gbɔ̀xue, mì la ɖù ì. Mì la ɖù ì zòkplà. Tɔhonɔ̀ be Toŋutivayì ye be nyi.

¹²Mù la to Ejiptè be ànyigbã ji va yì, èzã ŋua mè, eye mù la wù ŋùkɔ̀gbeviwo keŋu lè Ejiptè, so àgbètɔ ji, jè èlãwo ji. Eye mù la ɖokòjo na Ejiptè be vòduwo keŋu. Ènyè ye nyi Tɔhonɔ̀.

¹³Èhũ la nyi jèsìdo na mì, lè àxue kèwo mè, mì la nɔ̀awo ji. Mù la fla mì va yì, eye àfɔ̀ku kè la gble ènua, mu la kpe mì, wàlɛbɛ kè mù la dɔ̃ èto na Ejiptè be èdùa ò.

¹⁴Àzã ŋua la nyi ŋùkuɖoji-zã na mì. Mì la ɖù àzã ŋua, sɔ do bùbu Tɔhonɔ̀ ŋuti. Ekèa la nyi èse na mì, so jìjimè, yì jìjimè, mì la nɔ ɖù àzã kèa.

¹⁵Mì la ɖù kpɔ̃nɔ àkpiti, ŋùkèkè adrɛ̃ sɔ̃ŋu. So ŋùkèkè cucugbãa ji xoxoa, mawɛhũanu mu gbà ɖo la nɔ̀ mìabe àxuewo mè ò. Eye àmè ɖekpekpe àmè kè la ɖù kpɔ̃nɔ kè mè mawɛhũanu lè, so ŋùkèkè cucugbãa ji, sɔ yì adrɛ̃gɔ̃ a jia, àmè ŋua, wo la crɔ̃ ɛ̀ lè Izràɛlviwo dòmè.

¹⁶Ŋùkèkè cucugbãa gbèa, mì la wɔ̀ bɔ̀bɔ kɔ̀kɔ̀ɛ. Ŋùkèkè adrɛ̃gɔ̃ a cã gbèa, mì la gbà wɔ bɔ̀bɔ̀ kɔ̀kɔ̀ɛ bu. Àzã ŋuawo jia, àmè ɖekpekpe mu la wɔ̀ èdɔ ɖekpe ò, vɔ̀ àmè sia àmè be ènu ɖùɖu kpò wo la wɔ̀.

¹⁷Mì la nɔ ɖù kpɔ̃nɔ àkpiti be àzãa. Ɖo, àzã ŋua ji tututu, mù ɖè mìabe àhùakɔ̃wo to so Ejiptè lè. Mì la nɔ ɖù àzã ŋua, so jìjimè, yì jìjimè. Èse màdà màdà ye be nyi na mì.

¹⁸Wètri cucugbãa, ŋùkèkè woènègɔ̃a, lè wètria mè be fìɛ̃sia, mì la ɖù kpɔ̃nɔ àkpiti kaka na wètria be ŋùkèkè wìvɔɖèkagɔ̃a be fìɛ̃si mè.

¹⁹Ŋùkèkè adrɛ̃gɔ̃ a gbèa, wo mu la kpɔ mawɛhũanu lè mìabe àxuewo mè ò. Eye àmè ɖekpekpe àmè kè la ɖù kpɔ̃nɔ kè mè mawɛhũanu lèa, e nyi àmèjro loo, àlo èdùmèvi ò, àmè ŋua, wo la crɔ̃ ɛ̀ to lè Izràɛlviwo be àmèhaa mè.

²⁰Mì mu la ɖù èma xuãxuã be ènu ɖekpe ò. Àfi ɖekpekpe àfi kè mì nɔ̀nàa, mì la ɖù kpɔ̃nɔ àkpiti.”

²¹Mosè yɔ Izràɛlviwo be àmèsĩsĩwo keŋu, eye be gblɔ̃ na wo be: “Mì yì le èlã ɖo mìabe kɔ̀tawo nu, eye mìa wù wo na Toŋutivayì be àzãa.

²²Mì la ŋɛ̃ kpatima[1] togba ɖèka; mì la nyrɔ̃ ɖo àdàwa kè mè èhũa lèa mè. Mì la sɔ èhũa sìsì ɖo hɔ̃truti èvèawo ŋuti ku àgboa tamè, eye àmè ɖekpekpe lè mìa dòmè mu la to jè yebe àgbonu, kaka èŋù la kè ò.

²³Tɔhonɔ̀ la to Ejiptè be ànyigbã ji, va yì, ne bèa pò Ejiptèviwo. E la kpɔ èhũa lè àgboa tamè ku hɔ̃truti èvèawo ŋuti. Eye Tɔhonɔ̀ la to mìabe àgboa nu, la va yì, eye mu la ɖè àsi lè Ènugbletɔa ŋuti, bèa ɖo mìabe àxuewo mè, la gble ènu ò.

²⁴Mì la wɔ̀ ɖo ènu kèa keŋu ji. Èse be nyi na èwò ku èvi wòwo kaka sɔ yì.

²⁵Ne mì ɖo èdù kè Tɔhonɔ̀ la sɔ na mìa mè, sìgbè lekè be gblɔ̃ ɛ̀a nènea, mì la nɔ wɔ̀ ɖo èkɔ̀nu kèa ji.

²⁶Ne mìabe èviwo biɔ mì sè be: 'Nukɛ ye nyi èkɔ̀nu kè a kè mì le wɔ̀ ò?'

²⁷Mì ɖo e ŋuti be: 'Tɔhonɔ̀ gblɔ̃ be Toŋutivayì be vɔsa ye be nyi; Tɔhonɔ̀ kè to Izràɛlviwo be àxuewo ŋuti va yì, lè Ejiptè be ànyigbã ji, wàlɛbɛ kè be pò Ejiptè be èdùa, sɔ hlùɛ̃ mìabe àxuewo gãa.'” Dùkɔ̃a jè èklò, eye be do èta gũ sɔ sumɔ Tɔhonɔ̀.

²⁸Izràɛlviwo yì, eye wo wɔ̀ ɖo ɖoɖo, kèwo Tɔhonɔ̀ sɔ do àsi na Mosè ku Arɔ̀n, na woa ji pɛpɛpɛ.

²⁹Ekè èzã gà woèvè pòa, Tɔhonɔ̀ wù Ejiptè be èvi cucugbãawo keŋu, so Faraɔ̀n be èvi cucugbã kè ɖo la nɔ̀ yebe èfìɔzìkpea jia ji, va to gàmènɔ̀tɔ be èvi cucugbãa ji, kaka jè èlãwo be èvi cucugbãawo keŋu ji.

³⁰Èzã ŋua mèa, Faraɔ̀n sitè ku yebe ŋutimeawo keŋu, kudo Ejiptèviwo keŋu, eye àbòbo gã ɖe ɖì lè Ejiptè be ànyigbã ji, ɖoa, àxue ɖekpekpe mu lè kè mè àmè mu ku lè ò.

³¹Èzã ŋua mèa, Faraɔ̀n yɔ Mosè ku Arɔ̀n, eye be gblɔ̃ na wo be: “Mì sitè! Mìa ku Izràɛlviwo, mì to lè àpe dùkɔ̃a dòmè. Mì yì sɛ̃ Tɔhonɔ̀, sìgbè lekè mì gblɔ̃ ɛ̀a nène.

³²Mì kplɔ̀ mìabe àlɛ̃wo ku mìabe ènyìwo cã ɖo àsi, sìgbè lekè mì gblɔ̃ ɛ̀a nène, eye mìa jo. Eye mìa fãkue ɖo èta nyè!”

³³Ejiptètɔwo ciji na dùkɔ̃a, eye wo ɖè àsi lè e ŋuti, be jo lè èdùa mè kaba, ɖoa, wo le gblɔ̃ be: “Mia kpata, mi la ku!”

³⁴Dùkɔ̃a jo va sɔ yebe mawɛ kè mu kpɔ xuã hàɖe ò a ɖo àsi. Wo bla èmakpakuawo ɖo woabe àvɔwo mè, eye wo kɔ wo ɖo àbɔta.

³⁵Izràɛlviwo zɔ̃ ɖo Mosè be ègbèa ji; wo biɔ klòsalò ku sìkanu wɔ̀wɔwo kudo àvɔwo Ejiptètɔwo.

³⁶Tɔhonɔ̀ na be dùkɔ̃a kpɔ ɖàgbè lè Ejiptètɔwo gbɔ, eye Ejiptètɔwo lɔ̃, sɔ ènu kè Izràɛlviwo biɔa na wo. Nène a, wo xɔ̀ ènuwo kpata lè Ejiptètɔwo si!

³⁷Kè Izràɛlviwo jo lè Ramsɛ̀s, yì Sukɔ̀t be èdùa mèa, wo lè sìgbè àhùakɔ̃ kè la sù àgbètɔ hotu àlɔ̀ ètɔ̃ (600000) nène, àmè kèawo nyi ŋusùwo ɖèɖe, wo mu hlɛ̃ ɖèviwo ò.

³⁸Àmèjro sùgbɔ cã kplɔ̀ wo do ku woabe àlɛ̃wo kudo woabe ènyìwo. Èlãha gã ɖe ŋutɔ ye wo nyi, ègbɔwo ku ènyìwo.

³⁹Wo sɔ mawɛ kè wo hɛ̃ so Ejiptè a wɔ̀ klàko kè mè mawɛhũanu mu lè ò a, ɖoa, èmaa mu xuã ò. Kè wo nyà wo to lè Ejiptè a, wo mu ɖo gàmè kè wo la sɔ ji èmɔzɔ̃zɔ̃ be ènuwo ɖo àsi ò.

⁴⁰Èpè nenè kè Izràɛlviwo nɔ̀ Ejiptè a kpata lè èpè èkà èwo ci ègbã (430).

⁴¹Lè èpè èkà èwo ci ègbã (430) yomè a, àzã kèa tutu jia, Tɔhonɔ̀ be àhùakɔ̃wo keŋu to lè Ejiptè be èdùa mè.

⁴²Èzã kèa nyi ŋùtè-zã na Tɔhonɔ̀ kè kplɔ̀ wo to so Ejiptè a. Èzã kèa nyi Tɔhonɔ̀ be èzã. Ŋùtèzã be la nyi na Izràɛlviwo, so jìjimè yì jìjimè.

⁴³Tɔhonɔ̀ gblɔ̃ na Mosè ku Arɔ̀n be: “Lekè mì la nɔ wɔ̀ Toŋutivayì be kɔ̀nuawo ye nyi ekèa: Àmèjro ɖekpe mu la ɖù ì ò.

⁴⁴Èdùmèvi ɖekpe kè wo sɔ èci plèa, wo la sò èvo na ɛ̀, keŋu gbɔ̀xue be la teŋu ɖù ì.

⁴⁵Àmèjro kè zɛ̃ mìa gbɔ, àlo àgbãtè gbãdãgbã mu kpɔ èmɔ̃ la ɖù ì ò.

⁴⁶Àxue ɖèka mè kpò ye wo la ɖù ì lè. Wò mu la ɖè èlãa to lè àxuea mè ò. Mì mu la gbã èlãa be èpuwo ò[2].

⁴⁷Izràɛl be dùkɔ̃a kpata la ɖù àzã kèa.

⁴⁸Ne àmèjro ɖe ke zɛ̃ gbɔ wòa ji be yèa ɖù Toŋutivayì be àzãa, sɔ do bùbu Tɔhonɔ̀ ŋutia, wo ne sò èvo na ŋusù ɖekpekpe kè lè yebe àxomèa. Eyomè kpò ye, èmɔ̃ ɖèɖe lè na ɛ̀ be ne tètè va ɖù àzãa; wàlɛbɛ ŋua, e la nɔ̀ sìgbè èdùmèvi nène. Vɔ̀a, àmè kè wo mu sò èvo na ò a ɖekpe mu ɖo la ɖù ì ò.

⁴⁹Èsea la nyi ɖèka na èdùmèvi ku àmèjro kèwo va zɛ̃ mìa gbɔa.”

⁵⁰Izràɛlviwo keŋu wɔ̀ ènu kèawo, wo zɔ̃ ɖo ènu kè Tɔhonɔ̀ gblɔ̃ na Mosè ku Arɔ̀n ji tututu.

⁵¹Gbè ŋua gbè tututua, Tɔhonɔ̀ ɖè Izràɛlviwo to so Ejiptè, lè woabe àmèhawo be ɖoɖo nu.